| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. ပဌမသင္ဂာမသုတ္တဝဏ္ဏနာ
4. Paṭhamasaṅgāmasuttavaṇṇanā
၁၂၅. ဝေဒေန ဉာဏေန ဤဟတိ ဣရိယတီတိ ဝေဒေဟီ, ကောသလရာဇဘဂိနီ အဇာတသတ္တုနော မာတာ, သာ ကိရ သမ္ပဇညဇာတိကာ။ တေနာဟ ‘‘ပဏ္ဍိတာဓိဝစန’’န္တိ, စတ္တာရိ အင္ဂာနိ ဧတိသ္သန္တိ စတုရင္ဂိနီ။ ဒ္ဝိန္နံ ရဇ္ဇာနန္တိ ကာသိကရဇ္ဇမဂဓရဇ္ဇာနံ အန္တရေ, သော ပန ဂာမော ကာသိကရဇ္ဇော။
125. Vedena ñāṇena īhati iriyatīti vedehī, kosalarājabhaginī ajātasattuno mātā, sā kira sampajaññajātikā. Tenāha ‘‘paṇḍitādhivacana’’nti, cattāri aṅgāni etissanti caturaṅginī. Dvinnaṃ rajjānanti kāsikarajjamagadharajjānaṃ antare, so pana gāmo kāsikarajjo.
ပာပာတိ လာမကာ နိဟီနာစာရာ။ မေဇ္ဇတိ သိနိယ္ဟတီတိ မေတ္တိ, သာ ဧတေသု အတ္ထီတိ မိတ္တာ။ သဟ အယန္တိ ပဝတ္တန္တီတိ သဟာယာ။ သမ္ပဝင္ကန္တိ သုဋ္ဌု ဩနတံ။ ဇယကာရဏံ ဒိသ္ဝာ အာဟ, တထာ ဟိ ‘‘အဇ္ဇ ဣမံ ရတ္တိံ ဒုက္ခံ သေတီ’’တိ ကာလပရိစ္ဆေဒဝသေန ဝုတ္တံ။ ဝေရိဃာတော နာမ ဝေရိပုဂ္ဂလေ သတီတိ အာဟ ‘‘ဝေရိပုဂ္ဂလံ လဘတီ’’တိ။
Pāpāti lāmakā nihīnācārā. Mejjati siniyhatīti metti, sā etesu atthīti mittā. Saha ayanti pavattantīti sahāyā. Sampavaṅkanti suṭṭhu onataṃ. Jayakāraṇaṃ disvā āha, tathā hi ‘‘ajja imaṃ rattiṃ dukkhaṃ setī’’ti kālaparicchedavasena vuttaṃ. Verighāto nāma veripuggale satīti āha ‘‘veripuggalaṃ labhatī’’ti.
ပဌမသင္ဂာမသုတ္တဝဏ္ဏနာ နိဋ္ဌိတာ။
Paṭhamasaṅgāmasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ပဌမသင္ဂာမသုတ္တံ • 4. Paṭhamasaṅgāmasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ပဌမသင္ဂာမသုတ္တဝဏ္ဏနာ • 4. Paṭhamasaṅgāmasuttavaṇṇanā
