| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៥. បឋមសន្ទិដ្ឋិកសុត្តំ
5. Paṭhamasandiṭṭhikasuttaṃ
៤៧. អថ ខោ មោឡិយសីវកោ 1 បរិព្ពាជកោ យេន ភគវា តេនុបសង្កមិ; ឧបសង្កមិត្វា ភគវតា សទ្ធិំ សម្មោទិ។ សម្មោទនីយំ កថំ សារណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ មោឡិយសីវកោ បរិព្ពាជកោ ភគវន្តំ ឯតទវោច – ‘‘‘សន្ទិដ្ឋិកោ ធម្មោ, សន្ទិដ្ឋិកោ ធម្មោ’តិ, ភន្តេ, វុច្ចតិ។ កិត្តាវតា នុ ខោ, ភន្តេ, សន្ទិដ្ឋិកោ ធម្មោ ហោតិ អកាលិកោ ឯហិបស្សិកោ ឱបនេយ្យិកោ បច្ចត្តំ វេទិតព្ពោ វិញ្ញូហី’’តិ?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘តេន ហិ, សីវក, តញ្ញេវេត្ថ បដិបុច្ឆាមិ។ យថា តេ ខមេយ្យ តថា នំ ព្យាករេយ្យាសិ។ តំ កិំ មញ្ញសិ, សីវក, សន្តំ វា អជ្ឈត្តំ លោភំ ‘អត្ថិ មេ អជ្ឈត្តំ លោភោ’តិ បជានាសិ, អសន្តំ វា អជ្ឈត្តំ លោភំ ‘នត្ថិ មេ អជ្ឈត្តំ លោភោ’តិ បជានាសី’’តិ? ‘‘ឯវំ, ភន្តេ’’។ ‘‘យំ ខោ ត្វំ, សីវក, សន្តំ វា អជ្ឈត្តំ លោភំ ‘អត្ថិ មេ អជ្ឈត្តំ លោភោ’តិ បជានាសិ, អសន្តំ វា អជ្ឈត្តំ លោភំ ‘នត្ថិ មេ អជ្ឈត្តំ លោភោ’តិ បជានាសិ – ឯវម្បិ ខោ, សីវក, សន្ទិដ្ឋិកោ ធម្មោ ហោតិ…បេ.…។
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘តំ កិំ មញ្ញសិ, សីវក, សន្តំ វា អជ្ឈត្តំ ទោសំ…បេ.… សន្តំ វា អជ្ឈត្តំ មោហំ…បេ.… សន្តំ វា អជ្ឈត្តំ លោភធម្មំ…បេ.… សន្តំ វា អជ្ឈត្តំ ទោសធម្មំ…បេ.… សន្តំ វា អជ្ឈត្តំ មោហធម្មំ ‘អត្ថិ មេ អជ្ឈត្តំ មោហធម្មោ’តិ បជានាសិ, អសន្តំ វា អជ្ឈត្តំ មោហធម្មំ ‘នត្ថិ មេ អជ្ឈត្តំ មោហធម្មោ’តិ បជានាសី’’តិ? ‘‘ឯវំ, ភន្តេ’’។ ‘‘យំ ខោ ត្វំ, សីវក, សន្តំ វា អជ្ឈត្តំ មោហធម្មំ ‘អត្ថិ មេ អជ្ឈត្តំ មោហធម្មោ’តិ បជានាសិ, អសន្តំ វា អជ្ឈត្តំ មោហធម្មំ ‘នត្ថិ មេ អជ្ឈត្តំ មោហធម្មោ’តិ បជានាសិ – ឯវំ ខោ, សីវក, សន្ទិដ្ឋិកោ ធម្មោ ហោតិ អកាលិកោ ឯហិបស្សិកោ ឱបនេយ្យិកោ បច្ចត្តំ វេទិតព្ពោ វិញ្ញូហី’’តិ។
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘អភិក្កន្តំ, ភន្តេ, អភិក្កន្តំ, ភន្តេ…បេ.… ឧបាសកំ មំ, ភន្តេ, ភគវា ធារេតុ អជ្ជតគ្គេ បាណុបេតំ សរណំ គត’’ន្តិ។ បញ្ចមំ។
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥-៦. សន្ទិដ្ឋិកសុត្តទ្វយវណ្ណនា • 5-6. Sandiṭṭhikasuttadvayavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៣-៦. ឥណសុត្តាទិវណ្ណនា • 3-6. Iṇasuttādivaṇṇanā
