| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๕. ปฐมสมฺปทาสุตฺตํ
5. Paṭhamasampadāsuttaṃ
๗๕. ‘‘อฎฺฐิมา , ภิกฺขเว, สมฺปทาฯ กตมา อฎฺฐ? 1 อุฎฺฐานสมฺปทา, อารกฺขสมฺปทา, กลฺยาณมิตฺตตา, สมชีวิตา, สทฺธาสมฺปทา, สีลสมฺปทา, จาคสมฺปทา, ปญฺญาสมฺปทา – อิมา โข, ภิกฺขเว, อฎฺฐ สมฺปทา’’ติฯ
75. ‘‘Aṭṭhimā , bhikkhave, sampadā. Katamā aṭṭha? 2 Uṭṭhānasampadā, ārakkhasampadā, kalyāṇamittatā, samajīvitā, saddhāsampadā, sīlasampadā, cāgasampadā, paññāsampadā – imā kho, bhikkhave, aṭṭha sampadā’’ti.
‘‘อุฎฺฐาตา กมฺมเธเยฺยสุ, อปฺปมโตฺต วิธานวา;
‘‘Uṭṭhātā kammadheyyesu, appamatto vidhānavā;
สมํ กเปฺปติ ชีวิกํ, สมฺภตํ อนุรกฺขติฯ
Samaṃ kappeti jīvikaṃ, sambhataṃ anurakkhati.
‘‘สโทฺธ สีเลน สมฺปโนฺน, วทญฺญู วีตมจฺฉโร;
‘‘Saddho sīlena sampanno, vadaññū vītamaccharo;
นิจฺจํ มคฺคํ วิโสเธติ, โสตฺถานํ สมฺปรายิกํฯ
Niccaṃ maggaṃ visodheti, sotthānaṃ samparāyikaṃ.
‘‘อิเจฺจเต อฎฺฐ ธมฺมา จ, สทฺธสฺส ฆรเมสิโน;
‘‘Iccete aṭṭha dhammā ca, saddhassa gharamesino;
อกฺขาตา สจฺจนาเมน, อุภยตฺถ สุขาวหาฯ
Akkhātā saccanāmena, ubhayattha sukhāvahā.
‘‘ทิฎฺฐธมฺมหิตตฺถาย, สมฺปรายสุขาย จ;
‘‘Diṭṭhadhammahitatthāya, samparāyasukhāya ca;
เอวเมตํ คหฎฺฐานํ, จาโค ปุญฺญํ ปวฑฺฒตี’’ติฯ ปญฺจมํ;
Evametaṃ gahaṭṭhānaṃ, cāgo puññaṃ pavaḍḍhatī’’ti. pañcamaṃ;
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๓-๙. มรณสฺสติสุตฺตทฺวยาทิวณฺณนา • 3-9. Maraṇassatisuttadvayādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๑๐. สทฺธาสุตฺตาทิวณฺณนา • 1-10. Saddhāsuttādivaṇṇanā
