| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
५. पठमसम्पदासुत्तं
5. Paṭhamasampadāsuttaṃ
७५. ‘‘अट्ठिमा , भिक्खवे, सम्पदा। कतमा अट्ठ? 1 उट्ठानसम्पदा, आरक्खसम्पदा, कल्याणमित्तता, समजीविता, सद्धासम्पदा, सीलसम्पदा, चागसम्पदा, पञ्ञासम्पदा – इमा खो, भिक्खवे, अट्ठ सम्पदा’’ति।
75. ‘‘Aṭṭhimā , bhikkhave, sampadā. Katamā aṭṭha? 2 Uṭṭhānasampadā, ārakkhasampadā, kalyāṇamittatā, samajīvitā, saddhāsampadā, sīlasampadā, cāgasampadā, paññāsampadā – imā kho, bhikkhave, aṭṭha sampadā’’ti.
‘‘उट्ठाता कम्मधेय्येसु, अप्पमत्तो विधानवा।
‘‘Uṭṭhātā kammadheyyesu, appamatto vidhānavā;
समं कप्पेति जीविकं, सम्भतं अनुरक्खति॥
Samaṃ kappeti jīvikaṃ, sambhataṃ anurakkhati.
‘‘सद्धो सीलेन सम्पन्नो, वदञ्ञू वीतमच्छरो।
‘‘Saddho sīlena sampanno, vadaññū vītamaccharo;
निच्चं मग्गं विसोधेति, सोत्थानं सम्परायिकं॥
Niccaṃ maggaṃ visodheti, sotthānaṃ samparāyikaṃ.
‘‘इच्चेते अट्ठ धम्मा च, सद्धस्स घरमेसिनो।
‘‘Iccete aṭṭha dhammā ca, saddhassa gharamesino;
अक्खाता सच्चनामेन, उभयत्थ सुखावहा॥
Akkhātā saccanāmena, ubhayattha sukhāvahā.
‘‘दिट्ठधम्महितत्थाय, सम्परायसुखाय च।
‘‘Diṭṭhadhammahitatthāya, samparāyasukhāya ca;
एवमेतं गहट्ठानं, चागो पुञ्ञं पवड्ढती’’ति॥ पञ्चमं।
Evametaṃ gahaṭṭhānaṃ, cāgo puññaṃ pavaḍḍhatī’’ti. pañcamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ३-९. मरणस्सतिसुत्तद्वयादिवण्णना • 3-9. Maraṇassatisuttadvayādivaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-१०. सद्धासुत्तादिवण्णना • 1-10. Saddhāsuttādivaṇṇanā
