| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. பட²மஸமணப்³ராஹ்மணஸுத்தங்
6. Paṭhamasamaṇabrāhmaṇasuttaṃ
828. ‘‘யே ஹி கேசி, பி⁴க்க²வே, அதீதமத்³தா⁴னங் ஸமணா வா ப்³ராஹ்மணா வா மஹித்³தி⁴கா அஹேஸுங் மஹானுபா⁴வா, ஸப்³பே³ தே சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, அனாக³தமத்³தா⁴னங் ஸமணா வா ப்³ராஹ்மணா வா மஹித்³தி⁴கா ப⁴விஸ்ஸந்தி மஹானுபா⁴வா, ஸப்³பே³ தே சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, ஏதரஹி ஸமணா வா ப்³ராஹ்மணா வா மஹித்³தி⁴கா மஹானுபா⁴வா, ஸப்³பே³ தே சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா.
828. ‘‘Ye hi keci, bhikkhave, atītamaddhānaṃ samaṇā vā brāhmaṇā vā mahiddhikā ahesuṃ mahānubhāvā, sabbe te catunnaṃ iddhipādānaṃ bhāvitattā bahulīkatattā. Ye hi keci, bhikkhave, anāgatamaddhānaṃ samaṇā vā brāhmaṇā vā mahiddhikā bhavissanti mahānubhāvā, sabbe te catunnaṃ iddhipādānaṃ bhāvitattā bahulīkatattā. Ye hi keci, bhikkhave, etarahi samaṇā vā brāhmaṇā vā mahiddhikā mahānubhāvā, sabbe te catunnaṃ iddhipādānaṃ bhāvitattā bahulīkatattā.
‘‘கதமேஸங் சதுன்னங்? இத⁴ , பி⁴க்க²வே, பி⁴க்கு² ச²ந்த³ஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, வீரியஸமாதி⁴…பே॰… சித்தஸமாதி⁴…பே॰… வீமங்ஸாஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி. யே ஹி கேசி, பி⁴க்க²வே, அதீதமத்³தா⁴னங் ஸமணா வா ப்³ராஹ்மணா வா மஹித்³தி⁴கா அஹேஸுங் மஹானுபா⁴வா, ஸப்³பே³ தே இமேஸங்யேவ சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, அனாக³தமத்³தா⁴னங் ஸமணா வா ப்³ராஹ்மணா வா மஹித்³தி⁴கா ப⁴விஸ்ஸந்தி மஹானுபா⁴வா, ஸப்³பே³ தே இமேஸங்யேவ சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, ஏதரஹி ஸமணா வா ப்³ராஹ்மணா வா மஹித்³தி⁴கா மஹானுபா⁴வா, ஸப்³பே³ தே இமேஸங்யேவ சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா’’தி. ச²ட்ட²ங்.
‘‘Katamesaṃ catunnaṃ? Idha , bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti. Ye hi keci, bhikkhave, atītamaddhānaṃ samaṇā vā brāhmaṇā vā mahiddhikā ahesuṃ mahānubhāvā, sabbe te imesaṃyeva catunnaṃ iddhipādānaṃ bhāvitattā bahulīkatattā. Ye hi keci, bhikkhave, anāgatamaddhānaṃ samaṇā vā brāhmaṇā vā mahiddhikā bhavissanti mahānubhāvā, sabbe te imesaṃyeva catunnaṃ iddhipādānaṃ bhāvitattā bahulīkatattā. Ye hi keci, bhikkhave, etarahi samaṇā vā brāhmaṇā vā mahiddhikā mahānubhāvā, sabbe te imesaṃyeva catunnaṃ iddhipādānaṃ bhāvitattā bahulīkatattā’’ti. Chaṭṭhaṃ.
