| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. ပဌမရူပာရာမသုတ္တဝဏ္ဏနာ
3. Paṭhamarūpārāmasuttavaṇṇanā
၁၃၆. သမ္မုဒိတာ သမ္မောဒပ္ပတ္တာ, ပမောဒိတာ သဉ္ဇာတပမောဒာ။ ဒုက္ခာတိ ဒုက္ခဝန္တော သဉ္ဇာတဒုက္ခာ။ တေနာဟ ‘‘ဒုက္ခိတာ’’တိ။ သုခံ ဧတသ္သ အတ္ထီတိ သုခော, သုခီ။ တေနာဟ ‘‘သုခိတော’’တိ။ ယတ္တကာ ရူပာဒယော ဓမ္မာ လောကေ အတ္ထီတိ ဝုစ္စတိ။ ပသ္သန္တာနန္တိ သစ္စပဋိဝေဓေန သမ္မဒေဝ ပသ္သန္တာနံ။ ‘‘ပစ္စနီကံ ဟောတီ’’တိ ဝတ္ဝာ တံ ပစ္စနီကဘာဝံ ဒသ္သေတုံ ‘‘လောကော ဟီ’’တိအာဒိ ဝုတ္တံ။ အသုဘာတိ ‘‘အာဟူ’’တိပဒံ အာနေတ္ဝာ သမ္ဗန္ဓော။ သဗ္ဗမေတန္တိ ‘‘သုခံ ဒိဋ္ဌမရိယေဘိ။ပေ.။ တဒရိယာ သုခတော ဝိဒူ’’တိ စ ဝုတ္တံ။ သဗ္ဗမေတံ နိဗ္ဗာနမေဝ သန္ဓာယ ဝုတ္တံ။ နိဗ္ဗာနမေဝ ဟိ ဧကန္တတော သုခံ နာမ။
136.Sammuditā sammodappattā, pamoditā sañjātapamodā. Dukkhāti dukkhavanto sañjātadukkhā. Tenāha ‘‘dukkhitā’’ti. Sukhaṃ etassa atthīti sukho, sukhī. Tenāha ‘‘sukhito’’ti. Yattakā rūpādayo dhammā loke atthīti vuccati. Passantānanti saccapaṭivedhena sammadeva passantānaṃ. ‘‘Paccanīkaṃ hotī’’ti vatvā taṃ paccanīkabhāvaṃ dassetuṃ ‘‘loko hī’’tiādi vuttaṃ. Asubhāti ‘‘āhū’’tipadaṃ ānetvā sambandho. Sabbametanti ‘‘sukhaṃ diṭṭhamariyebhi…pe… tadariyā sukhato vidū’’ti ca vuttaṃ. Sabbametaṃ nibbānameva sandhāya vuttaṃ. Nibbānameva hi ekantato sukhaṃ nāma.
ပဉ္စနဝုတိပာသဏ္ဍိနော တေသဉ္စ ပာသဏ္ဍိဘာဝော ပပဉ္စသူဒနိဋ္ဌကထာယံ ပကာသိတော ဧဝ။ ကိလေသနီဝရဏေန နိဝုတာနန္တိ ကိလေသခန္ဓာ ကိလေသနီဝရဏံ, တေန နိဝာရိတာနံ။ နိဗ္ဗာနဒသ္သနံ နာမ အရိယမဂ္ဂော, တေန တသ္သ ပဋိဝိဇ္ဈနဉ္စ ကာဠမေဃအဝစ္ဆာဒိတံ ဝိယ စန္ဒမဏ္ဍလံ။
Pañcanavutipāsaṇḍino tesañca pāsaṇḍibhāvo papañcasūdaniṭṭhakathāyaṃ pakāsito eva. Kilesanīvaraṇena nivutānanti kilesakhandhā kilesanīvaraṇaṃ, tena nivāritānaṃ. Nibbānadassanaṃ nāma ariyamaggo, tena tassa paṭivijjhanañca kāḷameghaavacchāditaṃ viya candamaṇḍalaṃ.
ပရိစ္ဆိန္ဒိတ္ဝာတိ အသုဘဘာဝပရိစ္ဆိန္ဒနေန သမ္မာဝိညာဏဒသ္သနေန စ ပရိစ္ဆိန္ဒိတ္ဝာ။ မဂ္ဂဓမ္မသ္သာတိ အရိယမဂ္ဂဓမ္မသ္သ။
Paricchinditvāti asubhabhāvaparicchindanena sammāviññāṇadassanena ca paricchinditvā. Maggadhammassāti ariyamaggadhammassa.
အနုပန္နေဟီတိ အနု အနု အဝိဟာယ ပဋိပန္နေဟိ။ ကော နု အညော ဇာနိတုံ အရဟတိ, အညော န ဇာနာတီတိ ဒသ္သေတိ။
Anupannehīti anu anu avihāya paṭipannehi. Ko nu añño jānituṃ arahati, añño na jānātīti dasseti.
ပဌမရူပာရာမသုတ္တဝဏ္ဏနာ နိဋ္ဌိတာ။
Paṭhamarūpārāmasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. ပဌမရူပာရာမသုတ္တံ • 3. Paṭhamarūpārāmasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. ပဌမရူပာရာမသုတ္တဝဏ္ဏနာ • 3. Paṭhamarūpārāmasuttavaṇṇanā
