| Library / Tipiṭaka / திபிடக • Tipiṭaka / விமானவத்து²பாளி • Vimānavatthupāḷi |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
கு²த்³த³கனிகாயே
Khuddakanikāye
விமானவத்து²பாளி
Vimānavatthupāḷi
1. இத்தி²விமானங்
1. Itthivimānaṃ
1. பீட²வக்³கோ³
1. Pīṭhavaggo
1. பட²மபீட²விமானவத்து²
1. Paṭhamapīṭhavimānavatthu
1.
1.
‘‘பீட²ங் தே ஸோவண்ணமயங் உளாரங், மனோஜவங் க³ச்ச²தி யேனகாமங்;
‘‘Pīṭhaṃ te sovaṇṇamayaṃ uḷāraṃ, manojavaṃ gacchati yenakāmaṃ;
அலங்கதே மல்யத⁴ரே 1 ஸுவத்தே², ஓபா⁴ஸஸி விஜ்ஜுரிவப்³ப⁴கூடங்.
Alaṅkate malyadhare 2 suvatthe, obhāsasi vijjurivabbhakūṭaṃ.
2.
2.
‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;
‘‘Kena tetādiso vaṇṇo, kena te idha mijjhati;
உப்பஜ்ஜந்தி ச தே போ⁴கா³, யே கேசி மனஸோ பியா.
Uppajjanti ca te bhogā, ye keci manaso piyā.
3.
3.
‘‘புச்சா²மி தங் தே³வி மஹானுபா⁴வே, மனுஸ்ஸபூ⁴தா கிமகாஸி புஞ்ஞங்;
‘‘Pucchāmi taṃ devi mahānubhāve, manussabhūtā kimakāsi puññaṃ;
கேனாஸி ஏவங் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
4.
4.
பஞ்ஹங் புட்டா² வியாகாஸி, யஸ்ஸ கம்மஸ்ஸித³ங் ப²லங்.
Pañhaṃ puṭṭhā viyākāsi, yassa kammassidaṃ phalaṃ.
5.
5.
‘‘அஹங் மனுஸ்ஸேஸு மனுஸ்ஸபூ⁴தா, அப்³பா⁴க³தானாஸனகங் அதா³ஸிங்;
‘‘Ahaṃ manussesu manussabhūtā, abbhāgatānāsanakaṃ adāsiṃ;
அபி⁴வாத³யிங் அஞ்ஜலிகங் அகாஸிங், யதா²னுபா⁴வஞ்ச அதா³ஸி தா³னங்.
Abhivādayiṃ añjalikaṃ akāsiṃ, yathānubhāvañca adāsi dānaṃ.
6.
6.
‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;
‘‘Tena metādiso vaṇṇo, tena me idha mijjhati;
உப்பஜ்ஜந்தி ச மே போ⁴கா³, யே கேசி மனஸோ பியா.
Uppajjanti ca me bhogā, ye keci manaso piyā.
7.
7.
‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமகாஸி புஞ்ஞங்;
‘‘Akkhāmi te bhikkhu mahānubhāva, manussabhūtā yamakāsi puññaṃ;
தேனம்ஹி ஏவங் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி.
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
பட²மபீட²விமானங் பட²மங்.
Paṭhamapīṭhavimānaṃ paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / விமானவத்து²-அட்ட²கதா² • Vimānavatthu-aṭṭhakathā / 1. பட²மபீட²விமானவண்ணனா • 1. Paṭhamapīṭhavimānavaṇṇanā
