| Library / Tipiṭaka / திபிடக • Tipiṭaka / விமானவத்து²பாளி • Vimānavatthupāḷi |
11. பட²மபதிப்³ப³தாவிமானவத்து²
11. Paṭhamapatibbatāvimānavatthu
93.
93.
‘‘கோஞ்சா மயூரா தி³வியா ச ஹங்ஸா, வக்³கு³ஸ்ஸரா கோகிலா ஸம்பதந்தி;
‘‘Koñcā mayūrā diviyā ca haṃsā, vaggussarā kokilā sampatanti;
புப்பா²பி⁴கிண்ணங் ரம்மமித³ங் விமானங், அனேகசித்தங் நரனாரிஸேவிதங் 1.
Pupphābhikiṇṇaṃ rammamidaṃ vimānaṃ, anekacittaṃ naranārisevitaṃ 2.
94.
94.
‘‘தத்த²ச்ச²ஸி தே³வி மஹானுபா⁴வே, இத்³தீ⁴ விகுப்³ப³ந்தி அனேகரூபா;
‘‘Tatthacchasi devi mahānubhāve, iddhī vikubbanti anekarūpā;
இமா ச தே அச்ச²ராயோ ஸமந்ததோ, நச்சந்தி கா³யந்தி பமோத³யந்தி ச.
Imā ca te accharāyo samantato, naccanti gāyanti pamodayanti ca.
95.
95.
‘‘தே³வித்³தி⁴பத்தாஸி மஹானுபா⁴வே, மனுஸ்ஸபூ⁴தா கிமகாஸி புஞ்ஞங்;
‘‘Deviddhipattāsi mahānubhāve, manussabhūtā kimakāsi puññaṃ;
கேனாஸி ஏவங் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
96.
96.
ஸா தே³வதா அத்தமனா, மொக்³க³ல்லானேன புச்சி²தா;
Sā devatā attamanā, moggallānena pucchitā;
பஞ்ஹங் புட்டா² வியாகாஸி, யஸ்ஸ கம்மஸ்ஸித³ங் ப²லங்.
Pañhaṃ puṭṭhā viyākāsi, yassa kammassidaṃ phalaṃ.
97.
97.
‘‘அஹங் மனுஸ்ஸேஸு மனுஸ்ஸபூ⁴தா, பதிப்³ப³தானஞ்ஞமனா அஹோஸிங்;
‘‘Ahaṃ manussesu manussabhūtā, patibbatānaññamanā ahosiṃ;
மாதாவ புத்தங் அனுரக்க²மானா, குத்³தா⁴பிஹங் 3 நப்ப²ருஸங் அவோசங்.
Mātāva puttaṃ anurakkhamānā, kuddhāpihaṃ 4 nappharusaṃ avocaṃ.
98.
98.
‘‘ஸச்சே டி²தா மோஸவஜ்ஜங் பஹாய, தா³னே ரதா ஸங்க³ஹிதத்தபா⁴வா;
‘‘Sacce ṭhitā mosavajjaṃ pahāya, dāne ratā saṅgahitattabhāvā;
அன்னஞ்ச பானஞ்ச பஸன்னசித்தா, ஸக்கச்ச தா³னங் விபுலங் அதா³ஸிங்.
Annañca pānañca pasannacittā, sakkacca dānaṃ vipulaṃ adāsiṃ.
99.
99.
‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;
‘‘Tena metādiso vaṇṇo, tena me idha mijjhati;
உப்பஜ்ஜந்தி ச மே போ⁴கா³, யே கேசி மனஸோ பியா.
Uppajjanti ca me bhogā, ye keci manaso piyā.
100.
100.
‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமகாஸி புஞ்ஞங்;
‘‘Akkhāmi te bhikkhu mahānubhāva, manussabhūtā yamakāsi puññaṃ;
தேனம்ஹி ஏவங் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி.
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
பட²மபதிப்³ப³தாவிமானங் ஏகாத³ஸமங்.
Paṭhamapatibbatāvimānaṃ ekādasamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / விமானவத்து²-அட்ட²கதா² • Vimānavatthu-aṭṭhakathā / 11. பட²மபதிப்³ப³தாவிமானவண்ணனா • 11. Paṭhamapatibbatāvimānavaṇṇanā
