| Library / Tipiṭaka / তিপিটক • Tipiṭaka / ৰিনযৰিনিচ্ছয-উত্তরৰিনিচ্ছয • Vinayavinicchaya-uttaravinicchaya |
ভিক্খুৰিভঙ্গো
Bhikkhuvibhaṅgo
পারাজিককথা
Pārājikakathā
পঠমপারাজিককথা
Paṭhamapārājikakathā
৬.
6.
তিৰিধে তিলমত্তম্পি, মগ্গে সেৰনচেতনো।
Tividhe tilamattampi, magge sevanacetano;
অঙ্গজাতং পৰেসেন্তো, অল্লোকাসে পরাজিতো॥
Aṅgajātaṃ pavesento, allokāse parājito.
৭.
7.
পৰেসনং পৰিট্ঠং ৰা, ঠিতমুদ্ধরণম্পি ৰা।
Pavesanaṃ paviṭṭhaṃ vā, ṭhitamuddharaṇampi vā;
সসিক্খো সাদিযন্তো সো, ঠপেত্ৰা কিরিযং চুতো॥
Sasikkho sādiyanto so, ṭhapetvā kiriyaṃ cuto.
৮.
8.
সন্থতেনঙ্গজাতেন, সন্থতং ৰা অসন্থতং।
Santhatenaṅgajātena, santhataṃ vā asanthataṃ;
মগ্গং পন পৰেসেন্তো, তথেৰাসন্থতেন চ॥
Maggaṃ pana pavesento, tathevāsanthatena ca.
৯.
9.
উপাদিন্নেনুপাদিন্নে, অনুপাদিন্নকেন ৰা।
Upādinnenupādinne, anupādinnakena vā;
ঘট্টিতে অনুপাদিন্নে, সচে সাদিযতেত্থ সো॥
Ghaṭṭite anupādinne, sace sādiyatettha so.
১০.
10.
হোতি পারাজিকক্খেত্তে, পৰিট্ঠে তু পরাজিতো।
Hoti pārājikakkhette, paviṭṭhe tu parājito;
খেত্তে থুল্লচ্চযং তস্স, দুক্কটঞ্চ ৰিনিদ্দিসে॥
Khette thullaccayaṃ tassa, dukkaṭañca viniddise.
১১.
11.
মতে অক্খাযিতে চাপি, যেভুয্যক্খাযিতেপি চ।
Mate akkhāyite cāpi, yebhuyyakkhāyitepi ca;
মেথুনং পটিসেৰন্তো, হোতি পারাজিকো নরো॥
Methunaṃ paṭisevanto, hoti pārājiko naro.
১২.
12.
যেভুয্যক্খাযিতে চাপি, উপড্ঢক্খাযিতেপি চ।
Yebhuyyakkhāyite cāpi, upaḍḍhakkhāyitepi ca;
হোতি থুল্লচ্চযাপত্তি, সেসে আপত্তি দুক্কটং॥
Hoti thullaccayāpatti, sese āpatti dukkaṭaṃ.
১৩.
13.
নিমিত্তমত্তং সেসেত্ৰা, খাযিতেপি সরীরকে।
Nimittamattaṃ sesetvā, khāyitepi sarīrake;
নিমিত্তে মেথুনং তস্মিং, সেৰতোপি পরাজযো॥
Nimitte methunaṃ tasmiṃ, sevatopi parājayo.
১৪.
14.
উদ্ধুমাতাদিসম্পত্তে, সব্বত্থাপি চ দুক্কটং।
Uddhumātādisampatte, sabbatthāpi ca dukkaṭaṃ;
খাযিতাক্খাযিতং নাম, সব্বং মতসরীরকে॥
Khāyitākkhāyitaṃ nāma, sabbaṃ matasarīrake.
১৫.
15.
ছিন্দিত্ৰা পন তচ্ছেত্ৰা, নিমিত্তুপ্পাটিতে পন।
Chinditvā pana tacchetvā, nimittuppāṭite pana;
ৰণসঙ্খেপতো তস্মিং, সেৰং থুল্লচ্চযং ফুসে॥
Vaṇasaṅkhepato tasmiṃ, sevaṃ thullaccayaṃ phuse.
১৬.
16.
ততো মেথুনরাগেন, পতিতায নিমিত্ততো।
Tato methunarāgena, patitāya nimittato;
তাযং উপক্কমন্তস্স, দুক্কটং মংসপেসিযং॥
Tāyaṃ upakkamantassa, dukkaṭaṃ maṃsapesiyaṃ.
১৭.
17.
নখপিট্ঠিপ্পমাণেপি, মংসে ন্হারুম্হি ৰা সতি।
Nakhapiṭṭhippamāṇepi, maṃse nhārumhi vā sati;
মেথুনং পটিসেৰন্তো, জীৰমানে পরাজিতো॥
Methunaṃ paṭisevanto, jīvamāne parājito.
১৮.
18.
কণ্ণচ্ছিদ্দক্খিনাসাসু, ৰত্থিকোসে ৰণেসু ৰা।
Kaṇṇacchiddakkhināsāsu, vatthikose vaṇesu vā;
অঙ্গজাতং পৰেসেন্তো, রাগা থুল্লচ্চযং ফুসে॥
Aṅgajātaṃ pavesento, rāgā thullaccayaṃ phuse.
১৯.
19.
অৰসেসসরীরস্মিং, উপকচ্ছূরুকাদিসু।
Avasesasarīrasmiṃ, upakacchūrukādisu;
ৰসা মেথুনরাগস্স, সেৰমানস্স দুক্কটং॥
Vasā methunarāgassa, sevamānassa dukkaṭaṃ.
২০.
20.
অস্সগোমহিসাদীনং, ওট্ঠগদ্রভদন্তিনং।
Assagomahisādīnaṃ, oṭṭhagadrabhadantinaṃ;
নাসাসু ৰত্থিকোসেসু, সেৰং থুল্লচ্চযং ফুসে॥
Nāsāsu vatthikosesu, sevaṃ thullaccayaṃ phuse.
২১.
21.
তথা সব্বতিরচ্ছানং, অক্খিকণ্ণৰণেসুপি।
Tathā sabbatiracchānaṃ, akkhikaṇṇavaṇesupi;
অৰসেসসরীরেসু, সেৰমানস্স দুক্কটং॥
Avasesasarīresu, sevamānassa dukkaṭaṃ.
২২.
22.
তেসং অল্লসরীরেসু, মতানং সেৰতো পন।
Tesaṃ allasarīresu, matānaṃ sevato pana;
তিৰিধাপি সিযাপত্তি, খেত্তস্মিং তিৰিধে সতি॥
Tividhāpi siyāpatti, khettasmiṃ tividhe sati.
২৩.
23.
বহি মেথুনরাগেন, নিমিত্তং ইত্থিযা পন।
Bahi methunarāgena, nimittaṃ itthiyā pana;
নিমিত্তেন ছুপন্তস্স, তস্স থুল্লচ্চযং সিযা॥
Nimittena chupantassa, tassa thullaccayaṃ siyā.
২৪.
24.
কাযসংসগ্গরাগেন, নিমিত্তেন মুখেন ৰা।
Kāyasaṃsaggarāgena, nimittena mukhena vā;
নিমিত্তং ইত্থিযা তস্স, ছুপতো গরুকং সিযা॥
Nimittaṃ itthiyā tassa, chupato garukaṃ siyā.
২৫.
25.
তথেৰোভযরাগেন, নিমিত্তং পুরিসস্সপি।
Tathevobhayarāgena, nimittaṃ purisassapi;
নিমিত্তেন ছুপন্তস্স, হোতি আপত্তি দুক্কটং॥
Nimittena chupantassa, hoti āpatti dukkaṭaṃ.
২৬.
26.
নিমিত্তেন নিমিত্তং তু, তিরচ্ছানগতিত্থিযা।
Nimittena nimittaṃ tu, tiracchānagatitthiyā;
থুল্লচ্চযং ছুপন্তস্স, হোতি মেথুনরাগতো॥
Thullaccayaṃ chupantassa, hoti methunarāgato.
২৭.
27.
কাযসংসগ্গরাগেন, তিরচ্ছানগতিত্থিযা।
Kāyasaṃsaggarāgena, tiracchānagatitthiyā;
নিমিত্তেন নিমিত্তস্স, ছুপনে দুক্কটং মতং॥
Nimittena nimittassa, chupane dukkaṭaṃ mataṃ.
২৮.
28.
অঙ্গজাতং পৰেসেত্ৰা, তমাৰট্টকতে মুখে।
Aṅgajātaṃ pavesetvā, tamāvaṭṭakate mukhe;
তত্থাকাসগতং কত্ৰা, নীহরন্তস্স দুক্কটং॥
Tatthākāsagataṃ katvā, nīharantassa dukkaṭaṃ.
২৯.
29.
তথা চতূহি পস্সেহি, ইত্থিযা হেট্ঠিমত্তলং।
Tathā catūhi passehi, itthiyā heṭṭhimattalaṃ;
অছুপন্তং পৰেসেত্ৰা, নীহরন্তস্স দুক্কটং॥
Achupantaṃ pavesetvā, nīharantassa dukkaṭaṃ.
৩০.
30.
উপ্পাটিতোট্ঠমংসেসু , বহি নিক্খন্তকেসু ৰা।
Uppāṭitoṭṭhamaṃsesu , bahi nikkhantakesu vā;
দন্তেসু ৰাযমন্তস্স, তস্স থুল্লচ্চযং সিযা॥
Dantesu vāyamantassa, tassa thullaccayaṃ siyā.
৩১.
31.
অট্ঠিসঙ্ঘট্টনং কত্ৰা, মগ্গে দুৰিধরাগতো।
Aṭṭhisaṅghaṭṭanaṃ katvā, magge duvidharāgato;
সুক্কে মুত্তেপি ৰামুত্তে, ৰাযমন্তস্স দুক্কটং॥
Sukke muttepi vāmutte, vāyamantassa dukkaṭaṃ.
৩২.
32.
ইত্থিং মেথুনরাগেন, আলিঙ্গন্তস্স দুক্কটং।
Itthiṃ methunarāgena, āliṅgantassa dukkaṭaṃ;
হত্থগ্গাহপরামাস-চুম্বনাদীস্ৰযং নযো॥
Hatthaggāhaparāmāsa-cumbanādīsvayaṃ nayo.
৩৩.
33.
অপদে অহযো মচ্ছা, কপোতা দ্ৰিপদেপি চ।
Apade ahayo macchā, kapotā dvipadepi ca;
গোধা চতুপ্পদে হেট্ঠা, ৰত্থু পারাজিকস্সিমে॥
Godhā catuppade heṭṭhā, vatthu pārājikassime.
৩৪.
34.
সেৰেতুকামতাচিত্তং, মগ্গে মগ্গপ্পৰেসনং।
Sevetukāmatācittaṃ, magge maggappavesanaṃ;
ইদমঙ্গদ্ৰযং ৰুত্তং, পঠমন্তিমৰত্থুনো॥
Idamaṅgadvayaṃ vuttaṃ, paṭhamantimavatthuno.
৩৫.
35.
দুক্কটং পঠমস্সেৰ, সামন্তমিতি ৰণ্ণিতং।
Dukkaṭaṃ paṭhamasseva, sāmantamiti vaṇṇitaṃ;
সেসানং পন তিণ্ণম্পি, থুল্লচ্চযমুদীরিতং॥
Sesānaṃ pana tiṇṇampi, thullaccayamudīritaṃ.
৩৬.
36.
‘‘অনাপত্তী’’তি ঞাতব্বং, অজানন্তস্স ভিক্খুনো।
‘‘Anāpattī’’ti ñātabbaṃ, ajānantassa bhikkhuno;
তথেৰাসাদিযন্তস্স, জানন্তস্সাদিকম্মিনো॥
Tathevāsādiyantassa, jānantassādikammino.
৩৭.
37.
ৰিনযে অনযূপরমে পরমে।
Vinaye anayūparame parame;
সুজনস্স সুখানযনে নযনে।
Sujanassa sukhānayane nayane;
পটু হোতি পধানরতো ন রতো।
Paṭu hoti padhānarato na rato;
ইধ যো পন সারমতে রমতে॥
Idha yo pana sāramate ramate.
৩৮.
38.
ইমং হিতৰিভাৰনং ভাৰনং।
Imaṃ hitavibhāvanaṃ bhāvanaṃ;
অৰেদি সুরসম্ভৰং সম্ভৰং।
Avedi surasambhavaṃ sambhavaṃ;
স মারবল়িসাসনে সাসনে।
Sa mārabaḷisāsane sāsane;
সমো ভৰতুপালিনা পালিনা॥
Samo bhavatupālinā pālinā.
ইতি ৰিনযৰিনিচ্ছযে পঠমপারাজিককথা নিট্ঠিতা।
Iti vinayavinicchaye paṭhamapārājikakathā niṭṭhitā.
