| Library / Tipiṭaka / திபிடக • Tipiṭaka / வினயவினிச்ச²ய-உத்தரவினிச்ச²ய • Vinayavinicchaya-uttaravinicchaya |
பி⁴க்கு²விப⁴ங்கோ³
Bhikkhuvibhaṅgo
பாராஜிககதா²
Pārājikakathā
பட²மபாராஜிககதா²
Paṭhamapārājikakathā
6.
6.
திவிதே⁴ திலமத்தம்பி, மக்³கே³ ஸேவனசேதனோ;
Tividhe tilamattampi, magge sevanacetano;
அங்க³ஜாதங் பவேஸெந்தோ, அல்லோகாஸே பராஜிதோ.
Aṅgajātaṃ pavesento, allokāse parājito.
7.
7.
பவேஸனங் பவிட்ட²ங் வா, டி²தமுத்³த⁴ரணம்பி வா;
Pavesanaṃ paviṭṭhaṃ vā, ṭhitamuddharaṇampi vā;
ஸஸிக்கோ² ஸாதி³யந்தோ ஸோ, ட²பெத்வா கிரியங் சுதோ.
Sasikkho sādiyanto so, ṭhapetvā kiriyaṃ cuto.
8.
8.
ஸந்த²தேனங்க³ஜாதேன, ஸந்த²தங் வா அஸந்த²தங்;
Santhatenaṅgajātena, santhataṃ vā asanthataṃ;
மக்³க³ங் பன பவேஸெந்தோ, ததே²வாஸந்த²தேன ச.
Maggaṃ pana pavesento, tathevāsanthatena ca.
9.
9.
உபாதி³ன்னேனுபாதி³ன்னே, அனுபாதி³ன்னகேன வா;
Upādinnenupādinne, anupādinnakena vā;
க⁴ட்டிதே அனுபாதி³ன்னே, ஸசே ஸாதி³யதெத்த² ஸோ.
Ghaṭṭite anupādinne, sace sādiyatettha so.
10.
10.
ஹோதி பாராஜிகக்கெ²த்தே, பவிட்டே² து பராஜிதோ;
Hoti pārājikakkhette, paviṭṭhe tu parājito;
கெ²த்தே து²ல்லச்சயங் தஸ்ஸ, து³க்கடஞ்ச வினித்³தி³ஸே.
Khette thullaccayaṃ tassa, dukkaṭañca viniddise.
11.
11.
மதே அக்கா²யிதே சாபி, யேபு⁴ய்யக்கா²யிதேபி ச;
Mate akkhāyite cāpi, yebhuyyakkhāyitepi ca;
மேது²னங் படிஸேவந்தோ, ஹோதி பாராஜிகோ நரோ.
Methunaṃ paṭisevanto, hoti pārājiko naro.
12.
12.
யேபு⁴ய்யக்கா²யிதே சாபி, உபட்³ட⁴க்கா²யிதேபி ச;
Yebhuyyakkhāyite cāpi, upaḍḍhakkhāyitepi ca;
ஹோதி து²ல்லச்சயாபத்தி, ஸேஸே ஆபத்தி து³க்கடங்.
Hoti thullaccayāpatti, sese āpatti dukkaṭaṃ.
13.
13.
நிமித்தமத்தங் ஸேஸெத்வா, கா²யிதேபி ஸரீரகே;
Nimittamattaṃ sesetvā, khāyitepi sarīrake;
நிமித்தே மேது²னங் தஸ்மிங், ஸேவதோபி பராஜயோ.
Nimitte methunaṃ tasmiṃ, sevatopi parājayo.
14.
14.
உத்³து⁴மாதாதி³ஸம்பத்தே, ஸப்³ப³த்தா²பி ச து³க்கடங்;
Uddhumātādisampatte, sabbatthāpi ca dukkaṭaṃ;
கா²யிதாக்கா²யிதங் நாம, ஸப்³ப³ங் மதஸரீரகே.
Khāyitākkhāyitaṃ nāma, sabbaṃ matasarīrake.
15.
15.
சி²ந்தி³த்வா பன தச்செ²த்வா, நிமித்துப்பாடிதே பன;
Chinditvā pana tacchetvā, nimittuppāṭite pana;
வணஸங்கே²பதோ தஸ்மிங், ஸேவங் து²ல்லச்சயங் பு²ஸே.
Vaṇasaṅkhepato tasmiṃ, sevaṃ thullaccayaṃ phuse.
16.
16.
ததோ மேது²னராகே³ன, பதிதாய நிமித்ததோ;
Tato methunarāgena, patitāya nimittato;
தாயங் உபக்கமந்தஸ்ஸ, து³க்கடங் மங்ஸபேஸியங்.
Tāyaṃ upakkamantassa, dukkaṭaṃ maṃsapesiyaṃ.
17.
17.
நக²பிட்டி²ப்பமாணேபி, மங்ஸே ந்ஹாரும்ஹி வா ஸதி;
Nakhapiṭṭhippamāṇepi, maṃse nhārumhi vā sati;
மேது²னங் படிஸேவந்தோ, ஜீவமானே பராஜிதோ.
Methunaṃ paṭisevanto, jīvamāne parājito.
18.
18.
கண்ணச்சி²த்³த³க்கி²னாஸாஸு, வத்தி²கோஸே வணேஸு வா;
Kaṇṇacchiddakkhināsāsu, vatthikose vaṇesu vā;
அங்க³ஜாதங் பவேஸெந்தோ, ராகா³ து²ல்லச்சயங் பு²ஸே.
Aṅgajātaṃ pavesento, rāgā thullaccayaṃ phuse.
19.
19.
அவஸேஸஸரீரஸ்மிங், உபகச்சூ²ருகாதி³ஸு;
Avasesasarīrasmiṃ, upakacchūrukādisu;
வஸா மேது²னராக³ஸ்ஸ, ஸேவமானஸ்ஸ து³க்கடங்.
Vasā methunarāgassa, sevamānassa dukkaṭaṃ.
20.
20.
அஸ்ஸகோ³மஹிஸாதீ³னங், ஒட்ட²க³த்³ரப⁴த³ந்தினங்;
Assagomahisādīnaṃ, oṭṭhagadrabhadantinaṃ;
நாஸாஸு வத்தி²கோஸேஸு, ஸேவங் து²ல்லச்சயங் பு²ஸே.
Nāsāsu vatthikosesu, sevaṃ thullaccayaṃ phuse.
21.
21.
ததா² ஸப்³ப³திரச்சா²னங், அக்கி²கண்ணவணேஸுபி;
Tathā sabbatiracchānaṃ, akkhikaṇṇavaṇesupi;
அவஸேஸஸரீரேஸு, ஸேவமானஸ்ஸ து³க்கடங்.
Avasesasarīresu, sevamānassa dukkaṭaṃ.
22.
22.
தேஸங் அல்லஸரீரேஸு, மதானங் ஸேவதோ பன;
Tesaṃ allasarīresu, matānaṃ sevato pana;
திவிதா⁴பி ஸியாபத்தி, கெ²த்தஸ்மிங் திவிதே⁴ ஸதி.
Tividhāpi siyāpatti, khettasmiṃ tividhe sati.
23.
23.
ப³ஹி மேது²னராகே³ன, நிமித்தங் இத்தி²யா பன;
Bahi methunarāgena, nimittaṃ itthiyā pana;
நிமித்தேன சு²பந்தஸ்ஸ, தஸ்ஸ து²ல்லச்சயங் ஸியா.
Nimittena chupantassa, tassa thullaccayaṃ siyā.
24.
24.
காயஸங்ஸக்³க³ராகே³ன, நிமித்தேன முகே²ன வா;
Kāyasaṃsaggarāgena, nimittena mukhena vā;
நிமித்தங் இத்தி²யா தஸ்ஸ, சு²பதோ க³ருகங் ஸியா.
Nimittaṃ itthiyā tassa, chupato garukaṃ siyā.
25.
25.
ததே²வோப⁴யராகே³ன, நிமித்தங் புரிஸஸ்ஸபி;
Tathevobhayarāgena, nimittaṃ purisassapi;
நிமித்தேன சு²பந்தஸ்ஸ, ஹோதி ஆபத்தி து³க்கடங்.
Nimittena chupantassa, hoti āpatti dukkaṭaṃ.
26.
26.
நிமித்தேன நிமித்தங் து, திரச்சா²னக³தித்தி²யா;
Nimittena nimittaṃ tu, tiracchānagatitthiyā;
து²ல்லச்சயங் சு²பந்தஸ்ஸ, ஹோதி மேது²னராக³தோ.
Thullaccayaṃ chupantassa, hoti methunarāgato.
27.
27.
காயஸங்ஸக்³க³ராகே³ன, திரச்சா²னக³தித்தி²யா;
Kāyasaṃsaggarāgena, tiracchānagatitthiyā;
நிமித்தேன நிமித்தஸ்ஸ, சு²பனே து³க்கடங் மதங்.
Nimittena nimittassa, chupane dukkaṭaṃ mataṃ.
28.
28.
அங்க³ஜாதங் பவேஸெத்வா, தமாவட்டகதே முகே²;
Aṅgajātaṃ pavesetvā, tamāvaṭṭakate mukhe;
தத்தா²காஸக³தங் கத்வா, நீஹரந்தஸ்ஸ து³க்கடங்.
Tatthākāsagataṃ katvā, nīharantassa dukkaṭaṃ.
29.
29.
ததா² சதூஹி பஸ்ஸேஹி, இத்தி²யா ஹெட்டி²மத்தலங்;
Tathā catūhi passehi, itthiyā heṭṭhimattalaṃ;
அசு²பந்தங் பவேஸெத்வா, நீஹரந்தஸ்ஸ து³க்கடங்.
Achupantaṃ pavesetvā, nīharantassa dukkaṭaṃ.
30.
30.
உப்பாடிதொட்ட²மங்ஸேஸு , ப³ஹி நிக்க²ந்தகேஸு வா;
Uppāṭitoṭṭhamaṃsesu , bahi nikkhantakesu vā;
த³ந்தேஸு வாயமந்தஸ்ஸ, தஸ்ஸ து²ல்லச்சயங் ஸியா.
Dantesu vāyamantassa, tassa thullaccayaṃ siyā.
31.
31.
அட்டி²ஸங்க⁴ட்டனங் கத்வா, மக்³கே³ து³வித⁴ராக³தோ;
Aṭṭhisaṅghaṭṭanaṃ katvā, magge duvidharāgato;
ஸுக்கே முத்தேபி வாமுத்தே, வாயமந்தஸ்ஸ து³க்கடங்.
Sukke muttepi vāmutte, vāyamantassa dukkaṭaṃ.
32.
32.
இத்தி²ங் மேது²னராகே³ன, ஆலிங்க³ந்தஸ்ஸ து³க்கடங்;
Itthiṃ methunarāgena, āliṅgantassa dukkaṭaṃ;
ஹத்த²க்³கா³ஹபராமாஸ-சும்ப³னாதீ³ஸ்வயங் நயோ.
Hatthaggāhaparāmāsa-cumbanādīsvayaṃ nayo.
33.
33.
அபதே³ அஹயோ மச்சா², கபோதா த்³விபதே³பி ச;
Apade ahayo macchā, kapotā dvipadepi ca;
கோ³தா⁴ சதுப்பதே³ ஹெட்டா², வத்து² பாராஜிகஸ்ஸிமே.
Godhā catuppade heṭṭhā, vatthu pārājikassime.
34.
34.
ஸேவேதுகாமதாசித்தங், மக்³கே³ மக்³க³ப்பவேஸனங்;
Sevetukāmatācittaṃ, magge maggappavesanaṃ;
இத³மங்க³த்³வயங் வுத்தங், பட²மந்திமவத்து²னோ.
Idamaṅgadvayaṃ vuttaṃ, paṭhamantimavatthuno.
35.
35.
து³க்கடங் பட²மஸ்ஸேவ, ஸாமந்தமிதி வண்ணிதங்;
Dukkaṭaṃ paṭhamasseva, sāmantamiti vaṇṇitaṃ;
ஸேஸானங் பன திண்ணம்பி, து²ல்லச்சயமுதீ³ரிதங்.
Sesānaṃ pana tiṇṇampi, thullaccayamudīritaṃ.
36.
36.
‘‘அனாபத்தீ’’தி ஞாதப்³ப³ங், அஜானந்தஸ்ஸ பி⁴க்கு²னோ;
‘‘Anāpattī’’ti ñātabbaṃ, ajānantassa bhikkhuno;
ததே²வாஸாதி³யந்தஸ்ஸ, ஜானந்தஸ்ஸாதி³கம்மினோ.
Tathevāsādiyantassa, jānantassādikammino.
37.
37.
வினயே அனயூபரமே பரமே;
Vinaye anayūparame parame;
ஸுஜனஸ்ஸ ஸுகா²னயனே நயனே;
Sujanassa sukhānayane nayane;
படு ஹோதி பதா⁴னரதோ ந ரதோ;
Paṭu hoti padhānarato na rato;
இத⁴ யோ பன ஸாரமதே ரமதே.
Idha yo pana sāramate ramate.
38.
38.
இமங் ஹிதவிபா⁴வனங் பா⁴வனங்;
Imaṃ hitavibhāvanaṃ bhāvanaṃ;
அவேதி³ ஸுரஸம்ப⁴வங் ஸம்ப⁴வங்;
Avedi surasambhavaṃ sambhavaṃ;
ஸ மாரப³ளிஸாஸனே ஸாஸனே;
Sa mārabaḷisāsane sāsane;
ஸமோ ப⁴வதுபாலினா பாலினா.
Samo bhavatupālinā pālinā.
இதி வினயவினிச்ச²யே பட²மபாராஜிககதா² நிட்டி²தா.
Iti vinayavinicchaye paṭhamapārājikakathā niṭṭhitā.
