| Library / Tipiṭaka / ཏིཔིཊཀ • Tipiṭaka / ཨུདཱནཔཱལི༹ • Udānapāḷi |
༨. པཱཊལིགཱམིཡཝགྒོ
8. Pāṭaligāmiyavaggo
༡. པཋམནིབྦཱནཔཊིསཾཡུཏྟསུཏྟཾ
1. Paṭhamanibbānapaṭisaṃyuttasuttaṃ
༧༡. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷགཝཱ བྷིཀྑཱུ ནིབྦཱནཔཊིསཾཡུཏྟཱཡ དྷམྨིཡཱ ཀཐཱཡ སནྡསྶེཏི སམཱདཔེཏི སམུཏྟེཛེཏི སམྤཧཾསེཏི། ཏེདྷ བྷིཀྑཱུ 1 ཨཊྛིཾ ཀཏྭཱ 2 མནསི ཀཏྭཱ སབྦཾ ཙེཏསོ 3 སམནྣཱཧརིཏྭཱ ཨོཧིཏསོཏཱ དྷམྨཾ སུཎནྟི།
71. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Tedha bhikkhū 4 aṭṭhiṃ katvā 5 manasi katvā sabbaṃ cetaso 6 samannāharitvā ohitasotā dhammaṃ suṇanti.
ཨཐ ཁོ བྷགཝཱ ཨེཏམཏྠཾ ཝིདིཏྭཱ ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘ཨཏྠི, བྷིཀྑཝེ, ཏདཱཡཏནཾ, ཡཏྠ ནེཝ པཐཝཱི, ན ཨཱཔོ, ན ཏེཛོ, ན ཝཱཡོ, ན ཨཱཀཱསཱནཉྩཱཡཏནཾ, ན ཝིཉྙཱཎཉྩཱཡཏནཾ, ན ཨཱཀིཉྩཉྙཱཡཏནཾ, ན ནེཝསཉྙཱནཱསཉྙཱཡཏནཾ, ནཱཡཾ ལོཀོ, ན པརལོཀོ, ན ཨུབྷོ ཙནྡིམསཱུརིཡཱ། ཏཏྲཱཔཱཧཾ, བྷིཀྑཝེ, ནེཝ ཨཱགཏིཾ ཝདཱམི , ན གཏིཾ, ན ཋིཏིཾ, ན ཙུཏིཾ, ན ཨུཔཔཏྟིཾ; ཨཔྤཏིཊྛཾ, ཨཔྤཝཏྟཾ, ཨནཱརམྨཎམེཝེཏཾ། ཨེསེཝནྟོ དུཀྑསྶཱ’’ཏི། པཋམཾ།
‘‘Atthi, bhikkhave, tadāyatanaṃ, yattha neva pathavī, na āpo, na tejo, na vāyo, na ākāsānañcāyatanaṃ, na viññāṇañcāyatanaṃ, na ākiñcaññāyatanaṃ, na nevasaññānāsaññāyatanaṃ, nāyaṃ loko, na paraloko, na ubho candimasūriyā. Tatrāpāhaṃ, bhikkhave, neva āgatiṃ vadāmi , na gatiṃ, na ṭhitiṃ, na cutiṃ, na upapattiṃ; appatiṭṭhaṃ, appavattaṃ, anārammaṇamevetaṃ. Esevanto dukkhassā’’ti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཨུདཱན-ཨཊྛཀཐཱ • Udāna-aṭṭhakathā / ༡. པཋམནིབྦཱནཔཊིསཾཡུཏྟསུཏྟཝཎྞནཱ • 1. Paṭhamanibbānapaṭisaṃyuttasuttavaṇṇanā
