| Library / Tipiṭaka / តិបិដក • Tipiṭaka / ឧទានបាឡិ • Udānapāḷi |
៨. បាដលិគាមិយវគ្គោ
8. Pāṭaligāmiyavaggo
១. បឋមនិព្ពានបដិសំយុត្តសុត្តំ
1. Paṭhamanibbānapaṭisaṃyuttasuttaṃ
៧១. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន ភគវា ភិក្ខូ និព្ពានបដិសំយុត្តាយ ធម្មិយា កថាយ សន្ទស្សេតិ សមាទបេតិ សមុត្តេជេតិ សម្បហំសេតិ។ តេធ ភិក្ខូ 1 អដ្ឋិំ កត្វា 2 មនសិ កត្វា សព្ពំ ចេតសោ 3 សមន្នាហរិត្វា ឱហិតសោតា ធម្មំ សុណន្តិ។
71. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Tedha bhikkhū 4 aṭṭhiṃ katvā 5 manasi katvā sabbaṃ cetaso 6 samannāharitvā ohitasotā dhammaṃ suṇanti.
អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘អត្ថិ, ភិក្ខវេ, តទាយតនំ, យត្ថ នេវ បថវី, ន អាបោ, ន តេជោ, ន វាយោ, ន អាកាសានញ្ចាយតនំ, ន វិញ្ញាណញ្ចាយតនំ, ន អាកិញ្ចញ្ញាយតនំ, ន នេវសញ្ញានាសញ្ញាយតនំ, នាយំ លោកោ, ន បរលោកោ, ន ឧភោ ចន្ទិមសូរិយា។ តត្រាបាហំ, ភិក្ខវេ, នេវ អាគតិំ វទាមិ , ន គតិំ, ន ឋិតិំ, ន ចុតិំ, ន ឧបបត្តិំ; អប្បតិដ្ឋំ, អប្បវត្តំ, អនារម្មណមេវេតំ។ ឯសេវន្តោ ទុក្ខស្សា’’តិ។ បឋមំ។
‘‘Atthi, bhikkhave, tadāyatanaṃ, yattha neva pathavī, na āpo, na tejo, na vāyo, na ākāsānañcāyatanaṃ, na viññāṇañcāyatanaṃ, na ākiñcaññāyatanaṃ, na nevasaññānāsaññāyatanaṃ, nāyaṃ loko, na paraloko, na ubho candimasūriyā. Tatrāpāhaṃ, bhikkhave, neva āgatiṃ vadāmi , na gatiṃ, na ṭhitiṃ, na cutiṃ, na upapattiṃ; appatiṭṭhaṃ, appavattaṃ, anārammaṇamevetaṃ. Esevanto dukkhassā’’ti. Paṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឧទាន-អដ្ឋកថា • Udāna-aṭṭhakathā / ១. បឋមនិព្ពានបដិសំយុត្តសុត្តវណ្ណនា • 1. Paṭhamanibbānapaṭisaṃyuttasuttavaṇṇanā
