| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៩. បឋមមរណស្សតិសុត្តវណ្ណនា
9. Paṭhamamaraṇassatisuttavaṇṇanā
១៩. នវមេ នាតិកេតិ ឯវំនាមកេ គាមេ។ គិញ្ជកាវសថេតិ ឥដ្ឋកាមយេ បាសាទេ។ អមតោគធាតិ និព្ពានោគធា, និព្ពានបតិដ្ឋាតិ អត្ថោ។ ភាវេថ នោតិ ភាវេថ នុ។ មរណស្សតិន្តិ មរណស្សតិកម្មដ្ឋានំ។ អហោ វតាតិ បត្ថនត្ថេ និបាតោ។ ពហុំ វត មេ កតំ អស្សាតិ តុម្ហាកំ សាសនេ មម កិច្ចំ ពហុ កតំ អស្ស។ តទន្តរន្តិ តំ អន្តរំ ខណំ ឱកាសំ។ អស្សសិត្វា វា បស្សសាមីតិ ឯត្ថ អស្សាសោ វុច្ចតិ អន្តោ បវិសនវាតោ, បស្សាសោ ពហិ និក្ខមនវាតោ។ ឥតិ អយំ ភិក្ខុ យាវ អន្តោ បវិដ្ឋវាតោ ពហិ និក្ខមតិ, ពហិ និក្ខន្តោ វាតោ អន្តោ បវិសតិ, តាវ ជីវិតំ បត្ថេន្តោ ឯវមាហ។ ទន្ធន្តិ មន្ទំ គរុកំ អសីឃប្បវត្តំ។ អាសវានំ ខយាយាតិ អរហត្តផលត្ថាយ។ ឥមស្មិំ សុត្តេ មរណស្សតិ អរហត្តំ បាបេត្វា កថិតាតិ។
19. Navame nātiketi evaṃnāmake gāme. Giñjakāvasatheti iṭṭhakāmaye pāsāde. Amatogadhāti nibbānogadhā, nibbānapatiṭṭhāti attho. Bhāvetha noti bhāvetha nu. Maraṇassatinti maraṇassatikammaṭṭhānaṃ. Aho vatāti patthanatthe nipāto. Bahuṃvata me kataṃ assāti tumhākaṃ sāsane mama kiccaṃ bahu kataṃ assa. Tadantaranti taṃ antaraṃ khaṇaṃ okāsaṃ. Assasitvā vā passasāmīti ettha assāso vuccati anto pavisanavāto, passāso bahi nikkhamanavāto. Iti ayaṃ bhikkhu yāva anto paviṭṭhavāto bahi nikkhamati, bahi nikkhanto vāto anto pavisati, tāva jīvitaṃ patthento evamāha. Dandhanti mandaṃ garukaṃ asīghappavattaṃ. Āsavānaṃ khayāyāti arahattaphalatthāya. Imasmiṃ sutte maraṇassati arahattaṃ pāpetvā kathitāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៩. បឋមមរណស្សតិសុត្តំ • 9. Paṭhamamaraṇassatisuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩. បឋមមរណស្សតិសុត្តវណ្ណនា • 9. Paṭhamamaraṇassatisuttavaṇṇanā
