| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. ပဌမဣသိဒတ္တသုတ္တဝဏ္ဏနာ
2. Paṭhamaisidattasuttavaṇṇanā
၃၄၄. ဒုတိယေ အာယသ္မန္တံ ထေရန္တိ တေသု ထေရေသု ဇေဋ္ဌကံ မဟာထေရံ။ တုဏ္ဟီ အဟောသီတိ ဇာနန္တောပိ အဝိသာရဒတ္တာ န ကိဉ္စိ ဗ္ယာဟရိ။ ဗ္ယာကရောမဟံ ဘန္တေတိ ‘‘အယံ ထေရော နေဝ အတ္တနာ ဗ္ယာကရောတိ, န အညေ အဇ္ဈေသတိ, ဥပာသကောပိ ဘိက္ခုသင္ဃံ ဝိဟေသေတိ, အဟမေတံ ဗ္ယာကရိတ္ဝာ ဖာသုဝိဟာရံ ကတ္ဝာ ဒသ္သာမီ’’တိ စိန္တေတ္ဝာ အာသနတော ဝုဋ္ဌာယ ထေရသ္သ သန္တိကံ ဂန္တ္ဝာ ဧဝံ ဩကာသမကာသိ, ကတာဝကာသော ပန အတ္တနော အာသနေ နိသီဒိတ္ဝာ ဗ္ယာကာသိ။
344. Dutiye āyasmantaṃ theranti tesu theresu jeṭṭhakaṃ mahātheraṃ. Tuṇhī ahosīti jānantopi avisāradattā na kiñci byāhari. Byākaromahaṃ bhanteti ‘‘ayaṃ thero neva attanā byākaroti, na aññe ajjhesati, upāsakopi bhikkhusaṅghaṃ viheseti, ahametaṃ byākaritvā phāsuvihāraṃ katvā dassāmī’’ti cintetvā āsanato vuṭṭhāya therassa santikaṃ gantvā evaṃ okāsamakāsi, katāvakāso pana attano āsane nisīditvā byākāsi.
သဟတ္ထာတိ သဟတ္ထေန။ သန္တပ္ပေသီတိ ယာဝဒိစ္ဆကံ ဒေန္တော သုဋ္ဌု တပ္ပေသိ။ သမ္ပဝာရေသီတိ ‘‘အလံ အလ’’န္တိ ဟတ္ထသညာယ စေဝ ဝာစာယ စ ပဋိက္ခိပာပေသိ။ ဩနီတပတ္တပာဏိနောတိ ပာဏိတော အပနီတပတ္တာ ဓောဝိတ္ဝာ ထဝိကာယ ဩသာပေတ္ဝာ အံသေ လဂ္ဂိတပတ္တာတိ အတ္ထော။
Sahatthāti sahatthena. Santappesīti yāvadicchakaṃ dento suṭṭhu tappesi. Sampavāresīti ‘‘alaṃ ala’’nti hatthasaññāya ceva vācāya ca paṭikkhipāpesi. Onītapattapāṇinoti pāṇito apanītapattā dhovitvā thavikāya osāpetvā aṃse laggitapattāti attho.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ပဌမဣသိဒတ္တသုတ္တံ • 2. Paṭhamaisidattasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ပဌမဣသိဒတ္တသုတ္တဝဏ္ဏနာ • 2. Paṭhamaisidattasuttavaṇṇanā
