| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੮-੯. ਪਠਮਗਿਞ੍ਜਕਾવਸਥਸੁਤ੍ਤਾਦਿવਣ੍ਣਨਾ
8-9. Paṭhamagiñjakāvasathasuttādivaṇṇanā
੧੦੦੪-੫. ਦ੍વੇ ਗਾਮਾ ਦ੍વਿਨ੍ਨਂ ਞਾਤੀਨਂ ਗਾਮਾਤਿ ਕਤ੍વਾ। ਞਾਤਿਕੇਤਿ ਏવਂਲਦ੍ਧਨਾਮੇ ਏਕਸ੍ਮਿਂ ਗਾਮਕੇ। ਗਿਞ੍ਜਕਾવਸਥੇਤਿ ਗਿਞ੍ਜਕਾ વੁਚ੍ਚਨ੍ਤਿ ਇਟ੍ਠਕਾ, ਗਿਞ੍ਜਕਾਹਿ ਏવ ਕਤੋ ਆવਸਥੋ, ਤਸ੍ਮਿਂ। ਸੋ ਕਿਰ ਆવਾਸੋ ਯਥਾ ਸੁਧਾਹਿ ਪਰਿਕਮ੍ਮੇਨ ਪਯੋਜਨਂ ਨਤ੍ਥਿ, ਏવਂ ਇਟ੍ਠਕਾਹਿ ਏવ ਚਿਨਿਤ੍વਾ ਕਤੋ। ਤੇਨ વੁਤ੍ਤਂ ‘‘ਇਟ੍ਠਕਾਮਯੇ ਆવਸਥੇ’’ਤਿ। ਤੁਲਾਥਮ੍ਭਦ੍વਾਰਬਨ੍ਧਕવਾਟਫਲਕਾਨਿ ਪਨ ਦਾਰੁਮਯਾ ਏવ। ਓਰਂ વੁਚ੍ਚਤਿ ਕਾਮਧਾਤੁ, ਪਚ੍ਚਯਭਾવੇਨ ਤਂ ਓਰਂ ਭਜਨ੍ਤੀਤਿ ਓਰਮ੍ਭਾਗਿਯਾਨਿ, ਓਰਮ੍ਭਾਗਸ੍ਸ વਾ ਹਿਤਾਨਿ ਓਰਮ੍ਭਾਗਿਯਾਨਿ। ਤੇਨਾਹ ‘‘ਹੇਟ੍ਠਾਭਾਗਿਯਾਨ’’ਨ੍ਤਿਆਦਿ। ਤੀਹਿ ਮਗ੍ਗੇਹੀਤਿ ਹੇਟ੍ਠਿਮੇਹਿ ਤੀਹਿ ਮਗ੍ਗੇਹਿ। ਤੇਹਿ ਪਹਾਤਬ੍ਬਤਾਯ ਹਿ ਤੇਸਂ ਸਞ੍ਞੋਜਨਾਨਂ ਓਰਮ੍ਭਾਗਿਯਤਾ, ਓਰਂ ਭਞ੍ਜਿਯਾਨਿ વਾ ਓਰਮ੍ਭਾਗਿਯਾਨਿ વੁਤ੍ਤਾਨਿ ਨਿਰੁਤ੍ਤਿਨਯੇਨ। ਇਦਾਨਿ ਬ੍ਯਤਿਰੇਕਮੁਖੇਨ ਨੇਸਂ ਓਰਮ੍ਭਾਗਿਯਭਾવਂ વਿਭਾવੇਤੁਂ ‘‘ਤਤ੍ਥਾ’’ਤਿਆਦਿ વੁਤ੍ਤਂ। વਿਕ੍ਖਮ੍ਭਿਤਾਨਿ ਸਮਤ੍ਥਤਾવਿਘਾਤੇਨ ਪੁਥੁਜ੍ਜਨਾਨਂ, ਸਮੁਚ੍ਛਿਨ੍ਨਾਨਿ ਸਬ੍ਬਸੋ ਅਭਾવੇਨ ਅਰਿਯਾਨਂ ਰੂਪਾਰੂਪਭવੂਪਪਤ੍ਤਿਯਾ વਿਬਨ੍ਧਨਾਯ ਨ ਹੋਨ੍ਤੀਤਿ વੁਤ੍ਤਂ ‘‘ਅવਿਕ੍ਖਮ੍ਭਿਤਾਨਿ ਮਗ੍ਗੇਨ વਾ ਅਸਮੁਚ੍ਛਿਨ੍ਨਾਨੀ’’ਤਿ। ਨਿਬ੍ਬਤ੍ਤਿવਸੇਨਾਤਿ ਪਟਿਸਨ੍ਧਿਗ੍ਗਹਣવਸੇਨ ਗਨ੍ਤੁਂ ਨ ਦੇਨ੍ਤਿ। ਮਹਗ੍ਗਤਭવਗਾਮਿਕਮ੍ਮਾਯੂਹਨਸ੍ਸ વਿਬਨ੍ਧਨਤੋ ਸਕ੍ਕਾਯਦਿਟ੍ਠਿਆਦੀਨਿ ਤੀਣਿ ਸਞ੍ਞੋਜਨਾਨਿ ਕਾਮਚ੍ਛਨ੍ਦਬ੍ਯਾਪਾਦਾ વਿਯ ਮਹਗ੍ਗਤਭવੂਪਪਤ੍ਤਿਯਾ વਿਸੇਸਪਚ੍ਚਯਤ੍ਤਾ ਤਤ੍ਥ ਮਹਗ੍ਗਤਭવੇ ਨਿਬ੍ਬਤ੍ਤਮ੍ਪਿ ਤਨ੍ਨਿਬ੍ਬਤ੍ਤਿਹੇਤੁਕਮ੍ਮਪਰਿਕ੍ਖਯੇ ਕਾਮਭવੂਪਪਤ੍ਤਿਪਚ੍ਚਯਤਾਯ ਮਹਗ੍ਗਤਭવਤੋ ਆਨੇਤ੍વਾ ਇਧੇવ ਕਾਮਭવੇ ਏવ ਨਿਬ੍ਬਤ੍ਤਾਪੇਨ੍ਤਿ। ਤਸ੍ਮਾ ਸਬ੍ਬਾਨਿਪਿ ਪਞ੍ਚਪਿ ਸਂਯੋਜਨਾਨਿ ਓਰਮ੍ਭਾਗਿਯਾਨੇવ। ਪਟਿਸਨ੍ਧਿવਸੇਨ ਅਨਾਗਮਨਸਭਾવੋਤਿ ਪਟਿਸਨ੍ਧਿਗ੍ਗਹਣવਸੇਨ ਤਸ੍ਮਾ ਲੋਕਾ ਇਧ ਨ ਆਗਮਨਸਭਾવੋ। ਬੁਦ੍ਧਦਸ੍ਸਨ-ਥੇਰਦਸ੍ਸਨ-ਧਮ੍ਮਸ੍ਸવਨਾਨਂ ਪਨ ਅਤ੍ਥਾਯ ਅਸ੍ਸ ਆਗਮਨਂ ਅਨਿવਾਰਿਤਂ।
1004-5.Dve gāmā dvinnaṃ ñātīnaṃ gāmāti katvā. Ñātiketi evaṃladdhanāme ekasmiṃ gāmake. Giñjakāvasatheti giñjakā vuccanti iṭṭhakā, giñjakāhi eva kato āvasatho, tasmiṃ. So kira āvāso yathā sudhāhi parikammena payojanaṃ natthi, evaṃ iṭṭhakāhi eva cinitvā kato. Tena vuttaṃ ‘‘iṭṭhakāmaye āvasathe’’ti. Tulāthambhadvārabandhakavāṭaphalakāni pana dārumayā eva. Oraṃ vuccati kāmadhātu, paccayabhāvena taṃ oraṃ bhajantīti orambhāgiyāni, orambhāgassa vā hitāni orambhāgiyāni. Tenāha ‘‘heṭṭhābhāgiyāna’’ntiādi. Tīhi maggehīti heṭṭhimehi tīhi maggehi. Tehi pahātabbatāya hi tesaṃ saññojanānaṃ orambhāgiyatā, oraṃ bhañjiyāni vā orambhāgiyāni vuttāni niruttinayena. Idāni byatirekamukhena nesaṃ orambhāgiyabhāvaṃ vibhāvetuṃ ‘‘tatthā’’tiādi vuttaṃ. Vikkhambhitāni samatthatāvighātena puthujjanānaṃ, samucchinnāni sabbaso abhāvena ariyānaṃ rūpārūpabhavūpapattiyā vibandhanāya na hontīti vuttaṃ ‘‘avikkhambhitāni maggena vā asamucchinnānī’’ti. Nibbattivasenāti paṭisandhiggahaṇavasena gantuṃ na denti. Mahaggatabhavagāmikammāyūhanassa vibandhanato sakkāyadiṭṭhiādīni tīṇi saññojanāni kāmacchandabyāpādā viya mahaggatabhavūpapattiyā visesapaccayattā tattha mahaggatabhave nibbattampi tannibbattihetukammaparikkhaye kāmabhavūpapattipaccayatāya mahaggatabhavato ānetvā idheva kāmabhave eva nibbattāpenti. Tasmā sabbānipi pañcapi saṃyojanāni orambhāgiyāneva. Paṭisandhivasena anāgamanasabhāvoti paṭisandhiggahaṇavasena tasmā lokā idha na āgamanasabhāvo. Buddhadassana-theradassana-dhammassavanānaṃ pana atthāya assa āgamanaṃ anivāritaṃ.
ਕਦਾਚਿ ਉਪ੍ਪਤ੍ਤਿਯਾ વਿਰਲ਼ਾਕਾਰਤਾ, ਪਰਿਯੁਟ੍ਠਾਨਮਨ੍ਦਤਾਯ ਅਬਹਲਤਾਤਿ ਦ੍વੇਧਾਪਿ ਤਨੁਭਾવੋ। ਅਭਿਣ੍ਹਨ੍ਤਿ ਬਹੁਸੋ। ਬਹਲਬਹਲਾਤਿ ਤਿਬ੍ਬਤਿਬ੍ਬਾ। ਯਤ੍ਥ ਉਪ੍ਪਜ੍ਜਨ੍ਤਿ, ਤਂ ਸਨ੍ਤਾਨਂ ਮਦ੍ਦਨ੍ਤਾ ਫਰਨ੍ਤਾ ਸਾਧੇਨ੍ਤਾ ਅਨ੍ਧਕਾਰਂ ਕਰੋਨ੍ਤਾ ਉਪ੍ਪਜ੍ਜਨ੍ਤਿ, ਦ੍વੀਹਿ ਪਨ ਮਗ੍ਗੇਹਿ ਪਹੀਨਤ੍ਤਾ ਤਨੁਕਤਨੁਕਾ ਮਨ੍ਦਮਨ੍ਦਾ ਉਪ੍ਪਜ੍ਜਨ੍ਤਿ। ਪੁਤ੍ਤਧੀਤਰੋ ਹੋਨ੍ਤੀਤਿ ਇਦਂ ਅਕਾਰਣਂ। ਤਥਾ ਹਿ ਅਙ੍ਗਪਚ੍ਚਙ੍ਗਪਰਾਮਸਨਮਤ੍ਤੇਨਪਿ ਤੇ ਹੋਨ੍ਤਿ। ਇਦਨ੍ਤਿ ‘‘ਰਾਗਦੋਸਮੋਹਾਨਂ ਤਨੁਤ੍ਤਾ’’ਤਿ ਇਦਂ વਚਨਂ। ਭવਤਨੁਕવਸੇਨਾਤਿ ਅਪ੍ਪਕਭવવਸੇਨ। ਤਨ੍ਤਿ ਮਹਾਸੀવਤ੍ਥੇਰਸ੍ਸ વਚਨਂ ਪਟਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ। ਯੇ ਭવਾ ਅਰਿਯਾਨਂ ਲਬ੍ਭਨ੍ਤਿ, ਤੇ ਪਰਿਪੁਣ੍ਣਲਕ੍ਖਣਭવਾ ਏવ। ਯੇ ਨ ਲਬ੍ਭਨ੍ਤਿ, ਤਤ੍ਥ ਕੀਦਿਸਂ ਤਂ ਭવਤਨੁਕਂ। ਤਸ੍ਮਾ ਉਭਯਥਾਪਿ ਭવਤਨੁਕਸ੍ਸ ਅਸਮ੍ਭવੋ ਏવਾਤਿ ਦਸ੍ਸੇਤੁਂ ‘‘ਸੋਤਾਪਨ੍ਨਸ੍ਸਾ’’ਤਿਆਦਿ વੁਤ੍ਤਂ। ਅਟ੍ਠਮੇ ਭવੇ ਭવਤਨੁਕਂ ਨਤ੍ਥਿ ਅਟ੍ਠਮਸ੍ਸੇવ ਭવਸ੍ਸ ਸਬ੍ਬਸ੍ਸੇવ ਅਭਾવਤੋ। ਸੇਸੇਸੁਪਿ ਏਸੇવ ਨਯੋ।
Kadāci uppattiyā viraḷākāratā, pariyuṭṭhānamandatāya abahalatāti dvedhāpi tanubhāvo. Abhiṇhanti bahuso. Bahalabahalāti tibbatibbā. Yattha uppajjanti, taṃ santānaṃ maddantā pharantā sādhentā andhakāraṃ karontā uppajjanti, dvīhi pana maggehi pahīnattā tanukatanukā mandamandā uppajjanti. Puttadhītaro hontīti idaṃ akāraṇaṃ. Tathā hi aṅgapaccaṅgaparāmasanamattenapi te honti. Idanti ‘‘rāgadosamohānaṃ tanuttā’’ti idaṃ vacanaṃ. Bhavatanukavasenāti appakabhavavasena. Tanti mahāsīvattherassa vacanaṃ paṭikkhittanti sambandho. Ye bhavā ariyānaṃ labbhanti, te paripuṇṇalakkhaṇabhavā eva. Ye na labbhanti, tattha kīdisaṃ taṃ bhavatanukaṃ. Tasmā ubhayathāpi bhavatanukassa asambhavo evāti dassetuṃ ‘‘sotāpannassā’’tiādi vuttaṃ. Aṭṭhame bhave bhavatanukaṃ natthi aṭṭhamasseva bhavassa sabbasseva abhāvato. Sesesupi eseva nayo.
ਕਾਮਾવਚਰਲੋਕਂ ਸਨ੍ਧਾਯ વੁਤ੍ਤਂ ਇਤਰਸ੍ਸ ਲੋਕਸ੍ਸ વਸੇਨ ਤਥਾ વਤ੍ਤੁਂ ਅਸਕ੍ਕੁਣੇਯ੍ਯਤ੍ਤਾ। ਯੋ ਹਿ ਸਕਦਾਗਾਮੀ ਦੇવਮਨੁਸ੍ਸਲੋਕੇਸੁ વੋਮਿਸ੍ਸਕવਸੇਨ ਨਿਬ੍ਬਤ੍ਤਤਿ, ਸੋਪਿ ਕਾਮਭવવਸੇਨੇવ ਪਰਿਚ੍ਛਿਨ੍ਦਿਤਬ੍ਬੋ। ਭਗવਤਾ ਚ ਕਾਮਲੋਕੇ ਠਤ੍વਾ – ‘‘ਸਕਿਦੇવ ਇਮਂ ਲੋਕਂ ਆਗਨ੍ਤ੍વਾ’’ਤਿ વੁਤ੍ਤਂ। ਇਮਂ ਲੋਕਂ ਆਗਨ੍ਤ੍વਾਤਿ ਚ ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ વਜ੍ਜੇਤ੍વਾ ਏਕੋવ ਗਹਿਤੋ। ਏਕਚ੍ਚੋ ਹਿ ਇਧ ਸਕਦਾਗਾਮਿਫਲਂ ਪਤ੍વਾ ਇਧੇવ ਪਰਿਨਿਬ੍ਬਾਯਤਿ, ਏਕਚ੍ਚੋ ਇਧ ਪਤ੍વਾ ਦੇવਲੋਕੇ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇવਲੋਕੇ ਪਤ੍વਾ ਤਤ੍ਥੇવ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇવਲੋਕੇ ਪਤ੍વਾ ਇਧੂਪਪਜ੍ਜਿਤ੍વਾ ਪਰਿਨਿਬ੍ਬਾਯਤਿ, ਇਮੇ ਚਤ੍ਤਾਰੋ ਇਧ ਨ ਲਬ੍ਭਨ੍ਤਿ। ਯੋ ਪਨ ਇਧ ਪਤ੍વਾ ਦੇવਲੋਕੇ ਯਾવਤਾਯੁਕਂ વਸਿਤ੍વਾ ਪੁਨ ਇਧੂਪਪਜ੍ਜਿਤ੍વਾ ਪਰਿਨਿਬ੍ਬਾਯਤਿ, ਅਯਮਿਧ ਅਧਿਪ੍ਪੇਤੋ। ਅਟ੍ਠਕਥਾਯਂ ਪਨ ‘‘ਇਮਂ ਲੋਕਨ੍ਤਿ ਕਾਮਭવੋ ਅਧਿਪ੍ਪੇਤੋ’’ਤਿ ਇਮਮਤ੍ਥਂ વਿਭਾવੇਤੁਂ ‘‘ਸਚੇ ਹੀ’’ਤਿਆਦਿਨਾ ਅਞ੍ਞਂਯੇવ ਚਤੁਕ੍ਕਂ ਦਸ੍ਸਿਤਂ।
Kāmāvacaralokaṃsandhāya vuttaṃ itarassa lokassa vasena tathā vattuṃ asakkuṇeyyattā. Yo hi sakadāgāmī devamanussalokesu vomissakavasena nibbattati, sopi kāmabhavavaseneva paricchinditabbo. Bhagavatā ca kāmaloke ṭhatvā – ‘‘sakideva imaṃ lokaṃ āgantvā’’ti vuttaṃ. Imaṃ lokaṃ āgantvāti ca iminā pañcasu sakadāgāmīsu cattāro vajjetvā ekova gahito. Ekacco hi idha sakadāgāmiphalaṃ patvā idheva parinibbāyati, ekacco idha patvā devaloke parinibbāyati, ekacco devaloke patvā tattheva parinibbāyati, ekacco devaloke patvā idhūpapajjitvā parinibbāyati, ime cattāro idha na labbhanti. Yo pana idha patvā devaloke yāvatāyukaṃ vasitvā puna idhūpapajjitvā parinibbāyati, ayamidha adhippeto. Aṭṭhakathāyaṃ pana ‘‘imaṃ lokanti kāmabhavo adhippeto’’ti imamatthaṃ vibhāvetuṃ ‘‘sace hī’’tiādinā aññaṃyeva catukkaṃ dassitaṃ.
ਚਤੂਸੁ…ਪੇ॰… ਸਭਾવੋਤਿ ਅਤ੍ਥੋ ਅਪਾਯਗਮਨੀਯਾਨਂ ਪਾਪਧਮ੍ਮਾਨਂ ਸਬ੍ਬਸੋ ਪਹੀਨਤ੍ਤਾ। ਧਮ੍ਮਨਿਯਾਮੇਨਾਤਿ ਮਗ੍ਗਧਮ੍ਮਨਿਯਾਮੇਨ ਨਿਯਤੋ ਉਪਰਿਮਗ੍ਗਾਧਿਗਮਸ੍ਸ ਅવਸ੍ਸਂਭਾવਿਭਾવਤੋ। ਤੇਨਾਹ ‘‘ਸਮ੍ਬੋਧਿਪਰਾਯਣੋ’’ਤਿ। ਤੇਸਂ ਤੇਸਂ ਞਾਣਗਤਿਨ੍ਤਿ ਤੇਸਂ ਤੇਸਂ ਸਤ੍ਤਾਨਂ ‘‘ਅਸੁਕੋ ਸੋਤਾਪਨ੍ਨੋ, ਅਸੁਕੋ ਸਕਦਾਗਾਮੀ’’ਤਿਆਦਿਨਾ ਤਂਤਂਞਾਣਾਧਿਗਮਨਂ ਞਾਣੂਪਪਤ੍ਤਿਂ। ਞਾਣਾਭਿਸਮ੍ਪਰਾਯਨ੍ਤਿ ਤਤੋ ਪਰਮ੍ਪਿ – ‘‘ਨਿਯਤੋ ਸਮ੍ਬੋਧਿਪਰਾਯਣੋ ਸਕਿਦੇવ ਇਮਂ ਲੋਕਂ ਆਗਨ੍ਤ੍વਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀ’’ਤਿਆਦਿਨਾ ਞਾਣਸਹਿਤਂ ਉਪਪਤ੍ਤਿਪਚ੍ਚਯਭવਂ। ਓਲੋਕੇਨ੍ਤਸ੍ਸ ਞਾਣਚਕ੍ਖੁਨਾ ਅਪੇਕ੍ਖਨ੍ਤਸ੍ਸ। ਕੇવਲਂ ਕਾਯਕਿਲਮਥੋવ, ਨ ਤੇਨ ਕਾਚਿ ਪਰੇਸਂ ਅਤ੍ਥਸਿਦ੍ਧੀਤਿ ਅਧਿਪ੍ਪਾਯੋ। ਚਿਤ੍ਤવਿਹੇਸਾ ਚਿਤ੍ਤਖੇਦੋ, ਸਾ ਕਿਲੇਸੂਪਸਂਹਿਤਤ੍ਤਾ ਬੁਦ੍ਧਾਨਂ ਨਤ੍ਥਿ।
Catūsu…pe… sabhāvoti attho apāyagamanīyānaṃ pāpadhammānaṃ sabbaso pahīnattā. Dhammaniyāmenāti maggadhammaniyāmena niyato uparimaggādhigamassa avassaṃbhāvibhāvato. Tenāha ‘‘sambodhiparāyaṇo’’ti. Tesaṃ tesaṃ ñāṇagatinti tesaṃ tesaṃ sattānaṃ ‘‘asuko sotāpanno, asuko sakadāgāmī’’tiādinā taṃtaṃñāṇādhigamanaṃ ñāṇūpapattiṃ. Ñāṇābhisamparāyanti tato parampi – ‘‘niyato sambodhiparāyaṇo sakideva imaṃ lokaṃ āgantvā dukkhassantaṃ karissatī’’tiādinā ñāṇasahitaṃ upapattipaccayabhavaṃ. Olokentassa ñāṇacakkhunā apekkhantassa. Kevalaṃ kāyakilamathova, na tena kāci paresaṃ atthasiddhīti adhippāyo. Cittavihesā cittakhedo, sā kilesūpasaṃhitattā buddhānaṃ natthi.
ਆਦਿਸ੍ਸਤਿ ਆਲੋਕੀਯਤਿ ਅਤ੍ਤਾ ਏਤੇਨਾਤਿ ਆਦਾਸਂ, ਧਮ੍ਮਭੂਤਂ ਆਦਾਸਂ ਧਮ੍ਮਾਦਾਸਂ, ਅਰਿਯਮਗ੍ਗਞਾਣਸ੍ਸੇਤਂ ਅਧਿવਚਨਂ। ਤੇਨ ਹਿ ਅਰਿਯਸਾવਕੋ ਚਤੂਸੁ ਅਰਿਯਸਚ੍ਚੇਸੁ વਿਦ੍ਧਸ੍ਤਸਮ੍ਮੋਹਤ੍ਤਾ ਅਤ੍ਤਾਨਂ ਯਾਥਾવਤੋ ਞਤ੍વਾ ਯਾਥਾવਤੋ ਬ੍ਯਾਕਰੇਯ੍ਯ, ਤਪ੍ਪਕਾਸਨਤੋ ਪਨ ਧਮ੍ਮਪਰਿਯਾਯਸ੍ਸ ਸੁਤ੍ਤਸ੍ਸ ਧਮ੍ਮਾਦਾਸਤਾ વੇਦਿਤਬ੍ਬਾਤਿ। ਯੇਨ ਧਮ੍ਮਾਦਾਸੇਨਾਤਿ ਇਧ ਪਨ ਮਗ੍ਗਧਮ੍ਮਮੇવ વਦਤਿ। ਸੇਸਂ ਉਤ੍ਤਾਨਤ੍ਥਤ੍ਤਾ ਸੁવਿਞ੍ਞੇਯ੍ਯਮੇવਾਤਿ।
Ādissati ālokīyati attā etenāti ādāsaṃ, dhammabhūtaṃ ādāsaṃ dhammādāsaṃ, ariyamaggañāṇassetaṃ adhivacanaṃ. Tena hi ariyasāvako catūsu ariyasaccesu viddhastasammohattā attānaṃ yāthāvato ñatvā yāthāvato byākareyya, tappakāsanato pana dhammapariyāyassa suttassa dhammādāsatā veditabbāti. Yena dhammādāsenāti idha pana maggadhammameva vadati. Sesaṃ uttānatthattā suviññeyyamevāti.
વੇਲ਼ੁਦ੍વਾਰવਗ੍ਗવਣ੍ਣਨਾ ਨਿਟ੍ਠਿਤਾ।
Veḷudvāravaggavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya
੮. ਪਠਮਗਿਞ੍ਜਕਾવਸਥਸੁਤ੍ਤਂ • 8. Paṭhamagiñjakāvasathasuttaṃ
੯. ਦੁਤਿਯਗਿਞ੍ਜਕਾવਸਥਸੁਤ੍ਤਂ • 9. Dutiyagiñjakāvasathasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੮-੯. ਪਠਮਗਿਞ੍ਜਕਾવਸਥਸੁਤ੍ਤਾਦਿવਣ੍ਣਨਾ • 8-9. Paṭhamagiñjakāvasathasuttādivaṇṇanā
