| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
២. ទុតិយបណ្ណាសកំ
2. Dutiyapaṇṇāsakaṃ
(៦) ១. ព្រាហ្មណវគ្គោ
(6) 1. Brāhmaṇavaggo
១. បឋមទ្វេព្រាហ្មណសុត្តវណ្ណនា
1. Paṭhamadvebrāhmaṇasuttavaṇṇanā
៥២. ព្រាហ្មណវគ្គស្ស បឋមេ ជរាជិណ្ណាតិ ជរាវសេន ជិណ្ណា, ន ព្យាធិអាទីនំ វសេន ជិណ្ណសទិសត្តា ជិណ្ណា។ វយោវុទ្ធាតិ វយសោ វុទ្ធិប្បត្តិយា វុទ្ធា, ន សីលាទិវុទ្ធិយា។ ជាតិមហល្លកាតិ ជាតិយា មហន្តតាយ ចិររត្តញ្ញុតាយ ជាតិមហល្លកា។ តយោ អទ្ធេ អតិក្កន្តាតិ បឋមោ, មជ្ឈិមោ, បច្ឆិមោតិ តយោ អទ្ធេ អតីតា។ តតិយំ វយំ អនុប្បត្តាតិ តតោ ឯវ បច្ឆិមំ វយំ អនុប្បត្តា។ អកតភយបរិត្តាណាតិ ឯត្ថ ភយបរិត្តាណន្តិ ទុគ្គតិភយតោ បរិត្តាយកំ បុញ្ញំ, តំ អកតំ ឯតេហីតិ អកតភយបរិត្តាណា។ បតិដ្ឋាកម្មន្តិ សុគតិសង្ខាតប្បតិដ្ឋាវហំ កម្មំ។ ឧបសំហរីយតីតិ សម្បាបីយតិ។ ‘‘ឧបនីយតី’’តិ វុត្តំ, កិំ កេន ឧបនីយតីតិ អាហ ‘‘អយញ្ហិ ជាតិយា ជរំ ឧបនីយតី’’តិអាទិ។ អយន្តិ លោកោ។ ជាតោ ន ជាតភាវេនេវ តិដ្ឋតិ, អថ ខោ តតោ បរំ ជរំ បាបីយតិ, ជរាយ ព្យាធិំ បាបីយតិ។ ឯវំ បរតោ បរំ ទុក្ខមេវ ឧបនីយតិ។
52. Brāhmaṇavaggassa paṭhame jarājiṇṇāti jarāvasena jiṇṇā, na byādhiādīnaṃ vasena jiṇṇasadisattā jiṇṇā. Vayovuddhāti vayaso vuddhippattiyā vuddhā, na sīlādivuddhiyā. Jātimahallakāti jātiyā mahantatāya cirarattaññutāya jātimahallakā. Tayo addhe atikkantāti paṭhamo, majjhimo, pacchimoti tayo addhe atītā. Tatiyaṃ vayaṃ anuppattāti tato eva pacchimaṃ vayaṃ anuppattā. Akatabhayaparittāṇāti ettha bhayaparittāṇanti duggatibhayato parittāyakaṃ puññaṃ, taṃ akataṃ etehīti akatabhayaparittāṇā. Patiṭṭhākammanti sugatisaṅkhātappatiṭṭhāvahaṃ kammaṃ. Upasaṃharīyatīti sampāpīyati. ‘‘Upanīyatī’’ti vuttaṃ, kiṃ kena upanīyatīti āha ‘‘ayañhi jātiyā jaraṃ upanīyatī’’tiādi. Ayanti loko. Jāto na jātabhāveneva tiṭṭhati, atha kho tato paraṃ jaraṃ pāpīyati, jarāya byādhiṃ pāpīyati. Evaṃ parato paraṃ dukkhameva upanīyati.
តាយនដ្ឋេនាតិ រក្ខនដ្ឋេន។ និលីយនដ្ឋេនាតិ និលីនដ្ឋានភាវេន។ បតិដ្ឋានដ្ឋេនាតិ បតិដ្ឋានភាវេន។ អវស្សយនដ្ឋេនាតិ អវស្សយិតព្ពភាវេន។ ឧត្តមគតិវសេនាតិ បរមគតិភាវេន។
Tāyanaṭṭhenāti rakkhanaṭṭhena. Nilīyanaṭṭhenāti nilīnaṭṭhānabhāvena. Patiṭṭhānaṭṭhenāti patiṭṭhānabhāvena. Avassayanaṭṭhenāti avassayitabbabhāvena. Uttamagativasenāti paramagatibhāvena.
បឋមទ្វេព្រាហ្មណសុត្តវណ្ណនា និដ្ឋិតា។
Paṭhamadvebrāhmaṇasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១. បឋមទ្វេព្រាហ្មណសុត្តំ • 1. Paṭhamadvebrāhmaṇasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១. បឋមទ្វេព្រាហ្មណសុត្តវណ្ណនា • 1. Paṭhamadvebrāhmaṇasuttavaṇṇanā
