| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃-၁၀. ပဌမအာနန္ဒသုတ္တာဒိဝဏ္ဏနာ
3-10. Paṭhamaānandasuttādivaṇṇanā
၉၈၉-၉၉၆. တတိယေ ပဝိစိနတီတိ အနိစ္စာဒိဝသေန ပဝိစိနတိ။ ဣတရံ ပဒဒ္ဝယံ ဧတသ္သေဝ ဝေဝစနံ။ နိရာမိသာတိ နိက္ကိလေသာ ကာယိကစေတသိကဒရထပဋိပသ္သဒ္ဓိယာ ကာယောပိ စိတ္တမ္ပိ ပသ္သမ္ဘတိ။ သမာဓိယတီတိ သမ္မာ ဌပိယတိ, အပ္ပနာစိတ္တံ ဝိယ ဟောတိ။ အဇ္ဈုပေက္ခိတာ ဟောတီတိ သဟဇာတအဇ္ဈုပေက္ခနာယ အဇ္ဈုပေက္ခိတာ ဟောတိ။
989-996. Tatiye pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā kāyikacetasikadarathapaṭipassaddhiyā kāyopi cittampi passambhati. Samādhiyatīti sammā ṭhapiyati, appanācittaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
ဧဝံ စုဒ္ဒသဝိဓေန ကာယပရိဂ္ဂာဟကသ္သ ဘိက္ခုနော တသ္မိံ ကာယေ သတိ သတိသမ္ဗောဇ္ဈင္ဂော, တာယ သတိယာ သမ္ပယုတ္တဉာဏံ ဓမ္မဝိစယသမ္ဗောဇ္ဈင္ဂော, တံသမ္ပယုတ္တမေဝ ကာယိကစေတသိကဝီရိယံ ဝီရိယသမ္ဗောဇ္ဈင္ဂော, ပီတိပသ္သဒ္ဓိစိတ္တေကဂ္ဂတာ ပီတိပသ္သဒ္ဓိသမာဓိသမ္ဗောဇ္ဈင္ဂာ, ဣမေသံ ဆန္နံ ဗောဇ္ဈင္ဂာနံ အနောသက္ကနအနတိဝတ္တနသင္ခာတော မဇ္ဈတ္တာကာရော ဥပေက္ခာသမ္ဗောဇ္ဈင္ဂော။ ယထေဝ ဟိ သမပ္ပဝတ္တေသု အသ္သေသု သာရထိနော ‘‘အယံ ဩလီယတီ’’တိ တုဒနံ ဝာ, ‘‘အယံ အတိဓာဝတီ’’တိ အာကဍ္ဎနံ ဝာ နတ္ထိ, ကေဝလံ ဧဝံ ပသ္သမာနသ္သ ဌိတာကာရောဝ ဟောတိ, ဧဝမေဝ ဣမေသံ ဆန္နံ ဗောဇ္ဈင္ဂာနံ အနောသက္ကနအနတိဝတ္တနသင္ခာတော မဇ္ဈတ္တာကာရော ဥပေက္ခာသမ္ဗောဇ္ဈင္ဂော နာမ ဟောတိ။ ဧတ္တာဝတာ ကိံ ကထိတံ? ဧကစိတ္တက္ခဏိကာ နာနာသရသလက္ခဏာ ဝိပသ္သနာဗောဇ္ဈင္ဂာ နာမ ကထိတာ။
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, tāya satiyā sampayuttañāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pītipassaddhicittekaggatā pītipassaddhisamādhisambojjhaṅgā, imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānāsarasalakkhaṇā vipassanābojjhaṅgā nāma kathitā.
ဝိဝေကနိသ္သိတန္တိအာဒီနိ ဝုတ္တတ္ထာနေဝ။ ဧတ္ထ ပန သောဠသက္ခတ္တုကာ အာနာပာနသ္သတိ မိသ္သကာ ကထိတာ, အာနာပာနမူလကာ သတိပဋ္ဌာနာ ပုဗ္ဗဘာဂာ , တေသံ မူလဘူတာ အာနာပာနသ္သတိ ပုဗ္ဗဘာဂာ။ ဗောဇ္ဈင္ဂမူလကာ သတိပဋ္ဌာနာ ပုဗ္ဗဘာဂာ, တေပိ ဗောဇ္ဈင္ဂာ ပုဗ္ဗဘာဂာဝ။ ဝိဇ္ဇာဝိမုတ္တိပူရကာ ပန ဗောဇ္ဈင္ဂာ နိဗ္ဗတ္တိတလောကုတ္တရာ, ဝိဇ္ဇာဝိမုတ္တိယော အရိယဖလသမ္ပယုတ္တာ။ ဝိဇ္ဇာ ဝာ စတုတ္ထမဂ္ဂသမ္ပယုတ္တာ, ဝိမုတ္တိ ဖလသမ္ပယုတ္တာတိ။ စတုတ္ထပဉ္စမဆဋ္ဌာနိပိ ဣမိနာဝ သမာနပရိစ္ဆေဒာနိ။ သေသံ သဗ္ဗတ္ထ ဥတ္တာနမေဝာတိ။
Vivekanissitantiādīni vuttatthāneva. Ettha pana soḷasakkhattukā ānāpānassati missakā kathitā, ānāpānamūlakā satipaṭṭhānā pubbabhāgā , tesaṃ mūlabhūtā ānāpānassati pubbabhāgā. Bojjhaṅgamūlakā satipaṭṭhānā pubbabhāgā, tepi bojjhaṅgā pubbabhāgāva. Vijjāvimuttipūrakā pana bojjhaṅgā nibbattitalokuttarā, vijjāvimuttiyo ariyaphalasampayuttā. Vijjā vā catutthamaggasampayuttā, vimutti phalasampayuttāti. Catutthapañcamachaṭṭhānipi imināva samānaparicchedāni. Sesaṃ sabbattha uttānamevāti.
အာနာပာနသံယုတ္တဝဏ္ဏနာ နိဋ္ဌိတာ။
Ānāpānasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၃. ပဌမအာနန္ဒသုတ္တံ • 3. Paṭhamaānandasuttaṃ
၄. ဒုတိယအာနန္ဒသုတ္တံ • 4. Dutiyaānandasuttaṃ
၅. ပဌမဘိက္ခုသုတ္တံ • 5. Paṭhamabhikkhusuttaṃ
၆. ဒုတိယဘိက္ခုသုတ္တံ • 6. Dutiyabhikkhusuttaṃ
၇. သံယောဇနပ္ပဟာနသုတ္တံ • 7. Saṃyojanappahānasuttaṃ
၈. အနုသယသမုဂ္ဃာတသုတ္တံ • 8. Anusayasamugghātasuttaṃ
၉. အဒ္ဓာနပရိညာသုတ္တံ • 9. Addhānapariññāsuttaṃ
၁၀. အာသဝက္ခယသုတ္တံ • 10. Āsavakkhayasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၁၀. ပဌမအာနန္ဒသုတ္တာဒိဝဏ္ဏနာ • 3-10. Paṭhamaānandasuttādivaṇṇanā
