| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
(૧૭) ૨. આઘાતવગ્ગો
(17) 2. Āghātavaggo
૧. પઠમઆઘાતપટિવિનયસુત્તવણ્ણના
1. Paṭhamaāghātapaṭivinayasuttavaṇṇanā
૧૬૧. દુતિયસ્સ પઠમે આઘાતં પટિવિનેન્તિ વૂપસમેન્તીતિ આઘાતપટિવિનયા. યત્થ ભિક્ખુનો ઉપ્પન્નો આઘાતો સબ્બસો પટિવિનેતબ્બોતિ યત્થ આરમ્મણે ભિક્ખુનો આઘાતો ઉપ્પન્નો હોતિ, તત્થ સો સબ્બો ઇમેહિ પઞ્ચહિ પટિવિનોદેતબ્બોતિ અત્થો. મેત્તા તસ્મિં પુગ્ગલે ભાવેતબ્બાતિ તિકચતુક્કજ્ઝાનવસેન મેત્તા ભાવેતબ્બા. કરુણાયપિ એસેવ નયો. ઉપેક્ખા પન ચતુક્કપઞ્ચકજ્ઝાનવસેન ભાવેતબ્બા. યસ્મા પન યં પુગ્ગલં પસ્સતો ચિત્તં ન નિબ્બાતિ, તસ્મિં મુદિતા ન સણ્ઠહતિ, તસ્મા સા ન વુત્તા. અસતિઅમનસિકારોતિ યથા સો પુગ્ગલો ન ઉપટ્ઠાતિ, કુટ્ટાદીહિ અન્તરિતો વિય હોતિ, એવં તસ્મિં અસતિઅમનસિકારો આપજ્જિતબ્બો. સેસં હેટ્ઠા વુત્તનયત્તા ઉત્તાનમેવ.
161. Dutiyassa paṭhame āghātaṃ paṭivinenti vūpasamentīti āghātapaṭivinayā. Yattha bhikkhuno uppanno āghāto sabbaso paṭivinetabboti yattha ārammaṇe bhikkhuno āghāto uppanno hoti, tattha so sabbo imehi pañcahi paṭivinodetabboti attho. Mettā tasmiṃ puggale bhāvetabbāti tikacatukkajjhānavasena mettā bhāvetabbā. Karuṇāyapi eseva nayo. Upekkhā pana catukkapañcakajjhānavasena bhāvetabbā. Yasmā pana yaṃ puggalaṃ passato cittaṃ na nibbāti, tasmiṃ muditā na saṇṭhahati, tasmā sā na vuttā. Asatiamanasikāroti yathā so puggalo na upaṭṭhāti, kuṭṭādīhi antarito viya hoti, evaṃ tasmiṃ asatiamanasikāro āpajjitabbo. Sesaṃ heṭṭhā vuttanayattā uttānameva.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧. પઠમઆઘાતપટિવિનયસુત્તં • 1. Paṭhamaāghātapaṭivinayasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૫. પઠમઆઘાતપટિવિનયસુત્તાદિવણ્ણના • 1-5. Paṭhamaāghātapaṭivinayasuttādivaṇṇanā
