| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. ပာတာလသုတ္တဝဏ္ဏနာ
4. Pātālasuttavaṇṇanā
၂၅၂. စတုတ္ထေ ပာတာလောတိ ပာတသ္သ အလံ ပရိယတ္တော, နတ္ထိ ဧတ္ထ ပတိဋ္ဌာတိ ပာတာလော။ အသန္တံ အဝိဇ္ဇမာနန္တိ အသမ္ဘူတတ္တံ အပညာယမာနတ္တံ။ ဧဝံ ဝာစံ ဘာသတီတိ အတ္ထိ မဟာသမုဒ္ဒေ ပာတာလောတိ ဧဝံ ဝာစံ။ သော ဟိ ယံ တံ ဗလဝာမုခံ မဟာသမုဒ္ဒသ္သ ဥဒကံ ဝေဂေန ပက္ခန္ဒိတ္ဝာ စက္ကဝာဠံ ဝာ သိနေရုံ ဝာ အာဟစ္စ ယောဇနဒ္ဝိယောဇနဒသယောဇနပ္ပမာဏမ္ပိ ဥဂ္ဂန္တ္ဝာ ပုန မဟာသမုဒ္ဒေ ပတတိ, ယသ္သ ပတိတဋ္ဌာနေ မဟာနရကပပာတော ဝိယ ဟောတိ, ယံ လောကေ ဗလဝာမုခန္တိ ဝုစ္စတိ။ တံ သန္ဓာယ ဧဝံ ဝဒတိ။
252. Catutthe pātāloti pātassa alaṃ pariyatto, natthi ettha patiṭṭhāti pātālo. Asantaṃ avijjamānanti asambhūtattaṃ apaññāyamānattaṃ. Evaṃ vācaṃ bhāsatīti atthi mahāsamudde pātāloti evaṃ vācaṃ. So hi yaṃ taṃ balavāmukhaṃ mahāsamuddassa udakaṃ vegena pakkhanditvā cakkavāḷaṃ vā sineruṃ vā āhacca yojanadviyojanadasayojanappamāṇampi uggantvā puna mahāsamudde patati, yassa patitaṭṭhāne mahānarakapapāto viya hoti, yaṃ loke balavāmukhanti vuccati. Taṃ sandhāya evaṃ vadati.
ယသ္မာ ပန တတ္ထ တထာရူပာနံ မစ္ဆကစ္ဆပဒေဝဒာနဝာနံ ပတိဋ္ဌာပိ ဟောတိ သုခနိဝာသောပိ, တသ္မာ အသန္တံ အသံဝိဇ္ဇမာနံ တံ တံ ဝာစံ ဘာသတိ နာမ။ ယသ္မာ ပန သဗ္ဗပုထုဇ္ဇနာ သာရီရိကာယ ဒုက္ခဝေဒနာယ ပတိဋ္ဌာတုံ န သက္ကောန္တိ, တသ္မာ ပာတသ္သ အလန္တိ အတ္ထေန အယမေဝ ပာတာလောတိ ဒသ္သေန္တော သာရီရိကာနံ ခော ဧတံ ဘိက္ခဝေတိအာဒိမာဟ။
Yasmā pana tattha tathārūpānaṃ macchakacchapadevadānavānaṃ patiṭṭhāpi hoti sukhanivāsopi, tasmā asantaṃ asaṃvijjamānaṃ taṃ taṃ vācaṃ bhāsati nāma. Yasmā pana sabbaputhujjanā sārīrikāya dukkhavedanāya patiṭṭhātuṃ na sakkonti, tasmā pātassa alanti atthena ayameva pātāloti dassento sārīrikānaṃ kho etaṃ bhikkhavetiādimāha.
ပာတာလေ န ပစ္စုဋ္ဌာသီတိ ပာတာလသ္မိံ န ပတိဋ္ဌာသိ။ ဂာဓန္တိ ပတိဋ္ဌံ။ အက္ကန္ဒတီတိ အနိဗဒ္ဓံ ဝိပ္ပလာပံ ဝိလပန္တော ကန္ဒတိ။ ဒုဗ္ဗလောတိ ဒုဗ္ဗလဉာဏော။ အပ္ပထာမကောတိ ဉာဏထာမသ္သ ပရိတ္တတာယ ပရိတ္တထာမကော။ ဣမသ္မိံ သုတ္တေ အရိယသာဝကောတိ သောတာပန္နော။ သောတာပန္နော ဟိ ဧတ္ထ ဓုရံ, ဗလဝဝိပသ္သကော န တိက္ခဗုဒ္ဓိ ဥပ္ပန္နံ ဝေဒနံ အနနုဝတ္တိတ္ဝာ ပတိဋ္ဌာတုံ သမတ္ထော ယောဂာဝစရောပိ ဝဋ္ဋတိ။
Pātālena paccuṭṭhāsīti pātālasmiṃ na patiṭṭhāsi. Gādhanti patiṭṭhaṃ. Akkandatīti anibaddhaṃ vippalāpaṃ vilapanto kandati. Dubbaloti dubbalañāṇo. Appathāmakoti ñāṇathāmassa parittatāya parittathāmako. Imasmiṃ sutte ariyasāvakoti sotāpanno. Sotāpanno hi ettha dhuraṃ, balavavipassako na tikkhabuddhi uppannaṃ vedanaṃ ananuvattitvā patiṭṭhātuṃ samattho yogāvacaropi vaṭṭati.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ပာတာလသုတ္တံ • 4. Pātālasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ပာတာလသုတ္တဝဏ္ဏနာ • 4. Pātālasuttavaṇṇanā
