| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๘. ปสูรสุตฺตํ
8. Pasūrasuttaṃ
๘๓๐.
830.
อิเธว สุทฺธิ อิติ วาทยนฺติ 1, นาเญฺญสุ ธเมฺมสุ วิสุทฺธิมาหุ;
Idheva suddhi iti vādayanti 2, nāññesu dhammesu visuddhimāhu;
ยํ นิสฺสิตา ตตฺถ สุภํ วทานา, ปเจฺจกสเจฺจสุ ปุถู นิวิฎฺฐาฯ
Yaṃ nissitā tattha subhaṃ vadānā, paccekasaccesu puthū niviṭṭhā.
๘๓๑.
831.
เต วาทกามา ปริสํ วิคยฺห, พาลํ ทหนฺตี มิถุ อญฺญมญฺญํ;
Te vādakāmā parisaṃ vigayha, bālaṃ dahantī mithu aññamaññaṃ;
วทนฺติ เต อญฺญสิตา กโถชฺชํ, ปสํสกามา กุสลา วทานาฯ
Vadanti te aññasitā kathojjaṃ, pasaṃsakāmā kusalā vadānā.
๘๓๒.
832.
ยุโตฺต กถายํ ปริสาย มเชฺฌ, ปสํสมิจฺฉํ วินิฆาติ โหติ;
Yutto kathāyaṃ parisāya majjhe, pasaṃsamicchaṃ vinighāti hoti;
อปาหตสฺมิํ ปน มงฺกุ โหติ, นินฺทาย โส กุปฺปติ รนฺธเมสีฯ
Apāhatasmiṃ pana maṅku hoti, nindāya so kuppati randhamesī.
๘๓๓.
833.
ยมสฺส วาทํ ปริหีนมาหุ, อปาหตํ ปญฺหวิมํสกาเส;
Yamassa vādaṃ parihīnamāhu, apāhataṃ pañhavimaṃsakāse;
ปริเทวติ โสจติ หีนวาโท, อุปจฺจคา มนฺติ อนุตฺถุนาติฯ
Paridevati socati hīnavādo, upaccagā manti anutthunāti.
๘๓๔.
834.
เอเต วิวาทา สมเณสุ ชาตา, เอเตสุ อุคฺฆาติ นิฆาติ โหติ;
Ete vivādā samaṇesu jātā, etesu ugghāti nighāti hoti;
เอตมฺปิ ทิสฺวา วิรเม กโถชฺชํ, น หญฺญทตฺถตฺถิปสํสลาภาฯ
Etampi disvā virame kathojjaṃ, na haññadatthatthipasaṃsalābhā.
๘๓๕.
835.
ปสํสิโต วา ปน ตตฺถ โหติ, อกฺขาย วาทํ ปริสาย มเชฺฌ;
Pasaṃsito vā pana tattha hoti, akkhāya vādaṃ parisāya majjhe;
โส หสฺสตี อุณฺณมตี 3 จ เตน, ปปฺปุยฺย ตมตฺถํ ยถา มโน อหุฯ
So hassatī uṇṇamatī 4 ca tena, pappuyya tamatthaṃ yathā mano ahu.
๘๓๖.
836.
ยา อุณฺณตี 5 สาสฺส วิฆาตภูมิ, มานาติมานํ วทเต ปเนโส;
Yā uṇṇatī 6 sāssa vighātabhūmi, mānātimānaṃ vadate paneso;
เอตมฺปิ ทิสฺวา น วิวาทเยถ, น หิ เตน สุทฺธิํ กุสลา วทนฺติฯ
Etampi disvā na vivādayetha, na hi tena suddhiṃ kusalā vadanti.
๘๓๗.
837.
สูโร ยถา ราชขาทาย ปุโฎฺฐ, อภิคชฺชเมติ ปฎิสูรมิจฺฉํ;
Sūro yathā rājakhādāya puṭṭho, abhigajjameti paṭisūramicchaṃ;
เยเนว โส เตน ปเลหิ สูร, ปุเพฺพว นตฺถิ ยทิทํ ยุธายฯ
Yeneva so tena palehi sūra, pubbeva natthi yadidaṃ yudhāya.
๘๓๘.
838.
เย ทิฎฺฐิมุคฺคยฺห วิวาทยนฺติ 7, อิทเมว สจฺจนฺติ จ วาทยนฺติ;
Ye diṭṭhimuggayha vivādayanti 8, idameva saccanti ca vādayanti;
เต ตฺวํ วทสฺสู น หิ เตธ อตฺถิ, วาทมฺหิ ชาเต ปฎิเสนิกตฺตาฯ
Te tvaṃ vadassū na hi tedha atthi, vādamhi jāte paṭisenikattā.
๘๓๙.
839.
วิเสนิกตฺวา ปน เย จรนฺติ, ทิฎฺฐีหิ ทิฎฺฐิํ อวิรุชฺฌมานา;
Visenikatvā pana ye caranti, diṭṭhīhi diṭṭhiṃ avirujjhamānā;
เตสุ ตฺวํ กิํ ลเภโถ ปสูร, เยสีธ นตฺถี ปรมุคฺคหีตํฯ
Tesu tvaṃ kiṃ labhetho pasūra, yesīdha natthī paramuggahītaṃ.
๘๔๐.
840.
อถ ตฺวํ ปวิตกฺกมาคมา, มนสา ทิฎฺฐิคตานิ จินฺตยโนฺต;
Atha tvaṃ pavitakkamāgamā, manasā diṭṭhigatāni cintayanto;
โธเนน ยุคํ สมาคมา, น หิ ตฺวํ สกฺขสิ สมฺปยาตเวติฯ
Dhonena yugaṃ samāgamā, na hi tvaṃ sakkhasi sampayātaveti.
ปสูรสุตฺตํ อฎฺฐมํ นิฎฺฐิตํฯ
Pasūrasuttaṃ aṭṭhamaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๘. ปสูรสุตฺตวณฺณนา • 8. Pasūrasuttavaṇṇanā
