| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. பரிஸாஸுத்தங்
9. Parisāsuttaṃ
69. ‘‘அட்டி²மா, பி⁴க்க²வே, பரிஸா. கதமா அட்ட²? க²த்தியபரிஸா , ப்³ராஹ்மணபரிஸா, க³ஹபதிபரிஸா, ஸமணபரிஸா, சாதுமஹாராஜிகபரிஸா, தாவதிங்ஸபரிஸா, மாரபரிஸா, ப்³ரஹ்மபரிஸா. அபி⁴ஜானாமி கோ² பனாஹங், பி⁴க்க²வே, அனேகஸதங் க²த்தியபரிஸங் உபஸங்கமிதா. தத்ரபி மயா ஸன்னிஸின்னபுப்³ப³ஞ்சேவ ஸல்லபிதபுப்³ப³ஞ்ச ஸாகச்சா² ச ஸமாபன்னபுப்³பா³. தத்த² யாதி³ஸகோ தேஸங் வண்ணோ ஹோதி தாதி³ஸகோ மய்ஹங் வண்ணோ ஹோதி, யாதி³ஸகோ தேஸங் ஸரோ ஹோதி தாதி³ஸகோ மய்ஹங் ஸரோ ஹோதி. த⁴ம்மியா ச கதா²ய ஸந்த³ஸ்ஸேமி ஸமாத³பேமி ஸமுத்தேஜேமி ஸம்பஹங்ஸேமி . பா⁴ஸமானஞ்ச மங் ந ஜானந்தி – ‘கோ நு கோ² அயங் பா⁴ஸதி தே³வோ வா மனுஸ்ஸோ வா’தி. த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா அந்தரதா⁴யாமி. அந்தரஹிதஞ்ச மங் ந ஜானந்தி – ‘கோ நு கோ² அயங் அந்தரஹிதோ தே³வோ வா மனுஸ்ஸோ வா’’’தி.
69. ‘‘Aṭṭhimā, bhikkhave, parisā. Katamā aṭṭha? Khattiyaparisā , brāhmaṇaparisā, gahapatiparisā, samaṇaparisā, cātumahārājikaparisā, tāvatiṃsaparisā, māraparisā, brahmaparisā. Abhijānāmi kho panāhaṃ, bhikkhave, anekasataṃ khattiyaparisaṃ upasaṅkamitā. Tatrapi mayā sannisinnapubbañceva sallapitapubbañca sākacchā ca samāpannapubbā. Tattha yādisako tesaṃ vaṇṇo hoti tādisako mayhaṃ vaṇṇo hoti, yādisako tesaṃ saro hoti tādisako mayhaṃ saro hoti. Dhammiyā ca kathāya sandassemi samādapemi samuttejemi sampahaṃsemi . Bhāsamānañca maṃ na jānanti – ‘ko nu kho ayaṃ bhāsati devo vā manusso vā’ti. Dhammiyā kathāya sandassetvā samādapetvā samuttejetvā sampahaṃsetvā antaradhāyāmi. Antarahitañca maṃ na jānanti – ‘ko nu kho ayaṃ antarahito devo vā manusso vā’’’ti.
‘‘அபி⁴ஜானாமி கோ² பனாஹங், பி⁴க்க²வே, அனேகஸதங் ப்³ராஹ்மணபரிஸங்…பே॰… க³ஹபதிபரிஸங்… ஸமணபரிஸங்… சாதுமஹாராஜிகபரிஸங்… தாவதிங்ஸபரிஸங்… மாரபரிஸங்… ப்³ரஹ்மபரிஸங் உபஸங்கமிதா. தத்ரபி மயா ஸன்னிஸின்னபுப்³ப³ஞ்சேவ ஸல்லபிதபுப்³ப³ஞ்ச ஸாகச்சா² ச ஸமாபன்னபுப்³பா³. தத்த² யாதி³ஸகோ தேஸங் வண்ணோ ஹோதி தாதி³ஸகோ மய்ஹங் வண்ணோ ஹோதி, யாதி³ஸகோ தேஸங் ஸரோ ஹோதி தாதி³ஸகோ மய்ஹங் ஸரோ ஹோதி. த⁴ம்மியா ச கதா²ய ஸந்த³ஸ்ஸேமி ஸமாத³பேமி ஸமுத்தேஜேமி ஸம்பஹங்ஸேமி. பா⁴ஸமானஞ்ச மங் ந ஜானந்தி – ‘கோ நு கோ² அயங் பா⁴ஸதி தே³வோ வா மனுஸ்ஸோ வா’தி. த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா அந்தரதா⁴யாமி. அந்தரஹிதஞ்ச மங் ந ஜானந்தி – ‘கோ நு கோ² அயங் அந்தரஹிதோ தே³வோ வா மனுஸ்ஸோ வா’தி. இமா கோ², பி⁴க்க²வே, அட்ட² பரிஸா’’தி. நவமங்.
‘‘Abhijānāmi kho panāhaṃ, bhikkhave, anekasataṃ brāhmaṇaparisaṃ…pe… gahapatiparisaṃ… samaṇaparisaṃ… cātumahārājikaparisaṃ… tāvatiṃsaparisaṃ… māraparisaṃ… brahmaparisaṃ upasaṅkamitā. Tatrapi mayā sannisinnapubbañceva sallapitapubbañca sākacchā ca samāpannapubbā. Tattha yādisako tesaṃ vaṇṇo hoti tādisako mayhaṃ vaṇṇo hoti, yādisako tesaṃ saro hoti tādisako mayhaṃ saro hoti. Dhammiyā ca kathāya sandassemi samādapemi samuttejemi sampahaṃsemi. Bhāsamānañca maṃ na jānanti – ‘ko nu kho ayaṃ bhāsati devo vā manusso vā’ti. Dhammiyā kathāya sandassetvā samādapetvā samuttejetvā sampahaṃsetvā antaradhāyāmi. Antarahitañca maṃ na jānanti – ‘ko nu kho ayaṃ antarahito devo vā manusso vā’ti. Imā kho, bhikkhave, aṭṭha parisā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. பரிஸாஸுத்தவண்ணனா • 9. Parisāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. பரிஸாஸுத்தவண்ணனா • 9. Parisāsuttavaṇṇanā
