| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
९. परिपाचितसिक्खापदवण्णना
9. Paripācitasikkhāpadavaṇṇanā
परिपाचितन्ति परिपाकमापादितं, यथा लभति, तथा कत्वा ठपितन्ति वुत्तं होति। तेनाह ‘‘नेव तस्सा’’तिआदि तस्साति यो परिभुञ्जेय्य, तस्स भिक्खुनो। भिक्खुस्स गुणं पकासेत्वाति ‘‘अय्यो भाणको, अय्यो बहुस्सुतो’’तिआदिना (पाचि॰ १९५) गुणं पकासेत्वा । पिण्डपातन्ति पञ्चन्नं भोजनानं अञ्ञतरं। कम्मसाधनोयं समारम्भसद्दोति आह ‘‘समारद्ध’’न्ति। पटियादितस्साति सम्पादितस्स। यस्मा ञातकप्पवारितेहि भिक्खुस्स अत्थाय असमारद्धोपि पिण्डपातो अत्थतो समारद्धोव होति यथासुखं हरापेतब्बतो, तस्मा ‘‘ञातकप्पवारितानं वा सन्तक’’न्ति वुत्तं।
Paripācitanti paripākamāpāditaṃ, yathā labhati, tathā katvā ṭhapitanti vuttaṃ hoti. Tenāha ‘‘neva tassā’’tiādi tassāti yo paribhuñjeyya, tassa bhikkhuno. Bhikkhussa guṇaṃ pakāsetvāti ‘‘ayyo bhāṇako, ayyo bahussuto’’tiādinā (pāci. 195) guṇaṃ pakāsetvā . Piṇḍapātanti pañcannaṃ bhojanānaṃ aññataraṃ. Kammasādhanoyaṃ samārambhasaddoti āha ‘‘samāraddha’’nti. Paṭiyāditassāti sampāditassa. Yasmā ñātakappavāritehi bhikkhussa atthāya asamāraddhopi piṇḍapāto atthato samāraddhova hoti yathāsukhaṃ harāpetabbato, tasmā ‘‘ñātakappavāritānaṃ vā santaka’’nti vuttaṃ.
उभयत्थाति परिपाचितापरिपाचितेसु। अवसेसेति भिक्खुनिपरिपाचितेपि यागुखज्जकफलाफलादिके सब्बत्थ। निमित्तोभासपरिकथाविञ्ञत्तिवसेन पन अवसेसेपि दुक्कटतो न मुच्चति।
Ubhayatthāti paripācitāparipācitesu. Avaseseti bhikkhuniparipācitepi yāgukhajjakaphalāphalādike sabbattha. Nimittobhāsaparikathāviññattivasena pana avasesepi dukkaṭato na muccati.
परिपाचितसिक्खापदवण्णना निट्ठिता।
Paripācitasikkhāpadavaṇṇanā niṭṭhitā.
