| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౯. పరిఞ్ఞేయ్యసుత్తం
9. Pariññeyyasuttaṃ
౧౦౯౯. ‘‘చత్తారిమాని , భిక్ఖవే, అరియసచ్చాని. కతమాని చత్తారి? దుక్ఖం అరియసచ్చం, దుక్ఖసముదయం అరియసచ్చం, దుక్ఖనిరోధం అరియసచ్చం, దుక్ఖనిరోధగామినీ పటిపదా అరియసచ్చం – ఇమాని ఖో, భిక్ఖవే, చత్తారి అరియసచ్చాని. ఇమేసం ఖో, భిక్ఖవే, చతున్నం అరియసచ్చానం అత్థి అరియసచ్చం పరిఞ్ఞేయ్యం, అత్థి అరియసచ్చం పహాతబ్బం, అత్థి అరియసచ్చం సచ్ఛికాతబ్బం, అత్థి అరియసచ్చం భావేతబ్బం.
1099. ‘‘Cattārimāni , bhikkhave, ariyasaccāni. Katamāni cattāri? Dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ, dukkhanirodhagāminī paṭipadā ariyasaccaṃ – imāni kho, bhikkhave, cattāri ariyasaccāni. Imesaṃ kho, bhikkhave, catunnaṃ ariyasaccānaṃ atthi ariyasaccaṃ pariññeyyaṃ, atthi ariyasaccaṃ pahātabbaṃ, atthi ariyasaccaṃ sacchikātabbaṃ, atthi ariyasaccaṃ bhāvetabbaṃ.
‘‘కతమఞ్చ, భిక్ఖవే, అరియసచ్చం పరిఞ్ఞేయ్యం? దుక్ఖం, భిక్ఖవే, అరియసచ్చం పరిఞ్ఞేయ్యం, దుక్ఖసముదయం అరియసచ్చం పహాతబ్బం, దుక్ఖనిరోధం అరియసచ్చం సచ్ఛికాతబ్బం, దుక్ఖనిరోధగామినీ పటిపదా అరియసచ్చం భావేతబ్బం.
‘‘Katamañca, bhikkhave, ariyasaccaṃ pariññeyyaṃ? Dukkhaṃ, bhikkhave, ariyasaccaṃ pariññeyyaṃ, dukkhasamudayaṃ ariyasaccaṃ pahātabbaṃ, dukkhanirodhaṃ ariyasaccaṃ sacchikātabbaṃ, dukkhanirodhagāminī paṭipadā ariyasaccaṃ bhāvetabbaṃ.
‘‘తస్మాతిహ, భిక్ఖవే, ‘ఇదం దుక్ఖ’న్తి యోగో కరణీయో…పే॰… ‘అయం దుక్ఖనిరోధగామినీ పటిపదా’తి యోగో కరణీయో’’తి. నవమం.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Navamaṃ.
