| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៣៥. បរិនិព្ពានញាណនិទ្ទេសោ
35. Parinibbānañāṇaniddeso
៨៦. កថំ សម្បជានស្ស បវត្តបរិយាទានេ បញ្ញា បរិនិព្ពានេ ញាណំ? ឥធ សម្បជានោ នេក្ខម្មេន កាមច្ឆន្ទស្ស បវត្តំ បរិយាទិយតិ, អព្យាបាទេន ព្យាបាទស្ស បវត្តំ បរិយាទិយតិ, អាលោកសញ្ញាយ ថិនមិទ្ធស្ស បវត្តំ បរិយាទិយតិ, អវិក្ខេបេន ឧទ្ធច្ចស្ស បវត្តំ បរិយាទិយតិ, ធម្មវវត្ថានេន វិចិកិច្ឆាយ…បេ.… ញាណេន អវិជ្ជាយ… បាមោជ្ជេន អរតិយា … បឋមេន ឈានេន នីវរណានំ បវត្តំ បរិយាទិយតិ…បេ.… អរហត្តមគ្គេន សព្ពកិលេសានំ បវត្តំ បរិយាទិយតិ។
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
អថ វា បន សម្បជានស្ស អនុបាទិសេសាយ និព្ពានធាតុយា បរិនិព្ពាយន្តស្ស ឥទញ្ចេវ ចក្ខុបវត្តំ បរិយាទិយតិ, អញ្ញញ្ច ចក្ខុបវត្តំ ន ឧប្បជ្ជតិ។ ឥទញ្ចេវ សោតបវត្តំ…បេ.… ឃានបវត្តំ… ជិវ្ហាបវត្តំ… កាយបវត្តំ… មនោបវត្តំ បរិយាទិយតិ, អញ្ញញ្ច មនោបវត្តំ ន ឧប្បជ្ជតិ។ ឥទំ សម្បជានស្ស បវត្តបរិយាទានេ បញ្ញា បរិនិព្ពានេ ញាណំ។ តំ ញាតដ្ឋេន ញាណំ, បជាននដ្ឋេន បញ្ញា។ តេន វុច្ចតិ – ‘‘សម្បជានស្ស បវត្តបរិយាទានេ បញ្ញា បរិនិព្ពានេ ញាណំ’’។
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
បរិនិព្ពានញាណនិទ្ទេសោ បញ្ចតិំសតិមោ។
Parinibbānañāṇaniddeso pañcatiṃsatimo.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៣៥. បរិនិព្ពានញាណនិទ្ទេសវណ្ណនា • 35. Parinibbānañāṇaniddesavaṇṇanā
