| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
२२. बावीसतिमवग्गो
22. Bāvīsatimavaggo
(२०८) १. परिनिब्बानकथा
(208) 1. Parinibbānakathā
८९२. अत्थि किञ्चि संयोजनं अप्पहाय परिनिब्बानन्ति? आमन्ता। अत्थि किञ्चि सक्कायदिट्ठिं अप्पहाय…पे॰… अनोत्तप्पं अप्पहाय परिनिब्बानन्ति? न हेवं वत्तब्बे…पे॰…।
892. Atthi kiñci saṃyojanaṃ appahāya parinibbānanti? Āmantā. Atthi kiñci sakkāyadiṭṭhiṃ appahāya…pe… anottappaṃ appahāya parinibbānanti? Na hevaṃ vattabbe…pe….
अत्थि किञ्चि संयोजनं अप्पहाय परिनिब्बानन्ति? आमन्ता। अरहा सरागो…पे॰… सकिलेसोति? न हेवं वत्तब्बे…पे॰… ननु अरहा निरागो…पे॰… निक्किलेसोति? आमन्ता। हञ्चि अरहा निरागो…पे॰… निक्किलेसो, नो च वत रे वत्तब्बे – ‘‘अत्थि किञ्चि संयोजनं अप्पहाय परिनिब्बान’’न्ति।
Atthi kiñci saṃyojanaṃ appahāya parinibbānanti? Āmantā. Arahā sarāgo…pe… sakilesoti? Na hevaṃ vattabbe…pe… nanu arahā nirāgo…pe… nikkilesoti? Āmantā. Hañci arahā nirāgo…pe… nikkileso, no ca vata re vattabbe – ‘‘atthi kiñci saṃyojanaṃ appahāya parinibbāna’’nti.
८९३. न वत्तब्बं – ‘‘अत्थि किञ्चि संयोजनं अप्पहाय परिनिब्बान’’न्ति? आमन्ता । अरहा सब्बं बुद्धविसयं जानातीति? न हेवं वत्तब्बे। तेन हि अत्थि किञ्चि संयोजनं अप्पहाय परिनिब्बानन्ति।
893. Na vattabbaṃ – ‘‘atthi kiñci saṃyojanaṃ appahāya parinibbāna’’nti? Āmantā . Arahā sabbaṃ buddhavisayaṃ jānātīti? Na hevaṃ vattabbe. Tena hi atthi kiñci saṃyojanaṃ appahāya parinibbānanti.
परिनिब्बानकथा निट्ठिता।
Parinibbānakathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / १. परिनिब्बानकथावण्णना • 1. Parinibbānakathāvaṇṇanā
