| Library / Tipiṭaka / තිපිටක • Tipiṭaka / චූළනිද්දෙසපාළි • Cūḷaniddesapāḷi |
17. පාරායනත්ථුතිගාථා
17. Pārāyanatthutigāthā
ඉදමවොච භගවා මගධෙසු විහරන්තො පාසාණකෙ චෙතියෙ, පරිචාරකසොළසානං 1 බ්රාහ්මණානං අජ්ඣිට්ඨො පුට්ඨො පුට්ඨො පඤ්හං 2 බ්යාකාසි. එකමෙකස්ස චෙපි පඤ්හස්ස අත්ථමඤ්ඤාය ධම්මමඤ්ඤාය ධම්මානුධම්මං පටිපජ්ජෙය්ය, ගච්ඡෙය්යෙව ජරාමරණස්ස පාරං. ‘‘පාරඞ්ගමනීයා ඉමෙ ධම්මා’’ති – තස්මා ඉමස්ස ධම්මපරියායස්ස පාරායනන්තෙව 3 අධිවචනං.
Idamavoca bhagavā magadhesu viharanto pāsāṇake cetiye, paricārakasoḷasānaṃ 4 brāhmaṇānaṃ ajjhiṭṭho puṭṭho puṭṭho pañhaṃ 5 byākāsi. Ekamekassa cepi pañhassa atthamaññāya dhammamaññāya dhammānudhammaṃ paṭipajjeyya, gaccheyyeva jarāmaraṇassa pāraṃ. ‘‘Pāraṅgamanīyā ime dhammā’’ti – tasmā imassa dhammapariyāyassa pārāyananteva 6 adhivacanaṃ.
149.
149.
අජිතො තිස්සමෙත්තෙය්යො, පුණ්ණකො අථ මෙත්තගූ;
Ajito tissametteyyo, puṇṇako atha mettagū;
ධොතකො උපසීවො ච, නන්දො ච අථ හෙමකො.
Dhotako upasīvo ca, nando ca atha hemako.
150.
150.
තොදෙය්යකප්පා දුභයො, ජතුකණ්ණී ච පණ්ඩිතො;
Todeyyakappā dubhayo, jatukaṇṇī ca paṇḍito;
භද්රාවුධො උදයො ච, පොසාලො චාපි බ්රාහ්මණො;
Bhadrāvudho udayo ca, posālo cāpi brāhmaṇo;
මොඝරාජා ච මෙධාවී, පිඞ්ගියො ච මහාඉසි.
Mogharājā ca medhāvī, piṅgiyo ca mahāisi.
151.
151.
එතෙ බුද්ධං උපාගච්ඡුං, සම්පන්නචරණං ඉසිං;
Ete buddhaṃ upāgacchuṃ, sampannacaraṇaṃ isiṃ;
පුච්ඡන්තා නිපුණෙ පඤ්හෙ, බුද්ධසෙට්ඨං උපාගමුං.
Pucchantā nipuṇe pañhe, buddhaseṭṭhaṃ upāgamuṃ.
152.
152.
තෙසං බුද්ධො පබ්යාකාසි, පඤ්හෙ පුට්ඨො යථාතථං;
Tesaṃ buddho pabyākāsi, pañhe puṭṭho yathātathaṃ;
පඤ්හානං වෙය්යාකරණෙන, තොසෙසි බ්රාහ්මණෙ මුනි.
Pañhānaṃ veyyākaraṇena, tosesi brāhmaṇe muni.
153.
153.
තෙ තොසිතා චක්ඛුමතා, බුද්ධෙනාදිච්චබන්ධුනා;
Te tositā cakkhumatā, buddhenādiccabandhunā;
බ්රහ්මචරියමචරිංසු, වරපඤ්ඤස්ස සන්තිකෙ.
Brahmacariyamacariṃsu, varapaññassa santike.
154.
154.
එකමෙකස්ස පඤ්හස්ස, යථා බුද්ධෙන දෙසිතං;
Ekamekassa pañhassa, yathā buddhena desitaṃ;
තථා යො පටිපජ්ජෙය්ය, ගච්ඡෙ පාරං අපාරතො.
Tathā yo paṭipajjeyya, gacche pāraṃ apārato.
155.
155.
අපාරා පාරං ගච්ඡෙය්ය, භාවෙන්තො මග්ගමුත්තමං;
Apārā pāraṃ gaccheyya, bhāvento maggamuttamaṃ;
මග්ගො සො පාරං ගමනාය, තස්මා පාරායනං ඉති.
Maggo so pāraṃ gamanāya, tasmā pārāyanaṃ iti.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චූළනිද්දෙස-අට්ඨකථා • Cūḷaniddesa-aṭṭhakathā / 17. පාරායනත්ථුතිගාථානිද්දෙසවණ්ණනා • 17. Pārāyanatthutigāthāniddesavaṇṇanā
