| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
១. បារាជិកនិទ្ទេសោ
1. Pārājikaniddeso
១.
1.
សំ និមិត្តំ បវេសន្តោ, ភិក្ខុ មគ្គត្តយេ ចុតោ;
Saṃ nimittaṃ pavesanto, bhikkhu maggattaye cuto;
បវេសនដ្ឋិតុទ្ធារ-បវិដ្ឋេ ចេបិ សាទិយំ។
Pavesanaṭṭhituddhāra-paviṭṭhe cepi sādiyaṃ.
២.
2.
អទិន្នំ មានុសំ ភណ្ឌំ, ថេយ្យាយេកេន អាទិយំ;
Adinnaṃ mānusaṃ bhaṇḍaṃ, theyyāyekena ādiyaṃ;
បញ្ចវីសាវហារេសុ, គរុកំ ចេ ចុតោ ភវេ។
Pañcavīsāvahāresu, garukaṃ ce cuto bhave.
៣.
3.
អាទិយន្តោ ហរន្តោវ-ហរន្តោបិរិយាបថំ;
Ādiyanto harantova-harantopiriyāpathaṃ;
វិកោបេន្តោ តថា ឋានា, ចាវេន្តោបិ បរាជិកោ។
Vikopento tathā ṭhānā, cāventopi parājiko.
៤.
4.
តត្ថ នានេកភណ្ឌានំ, បញ្ចកានំ វសា បន;
Tattha nānekabhaṇḍānaṃ, pañcakānaṃ vasā pana;
អវហារា ទសញ្ចេតិ, វិញ្ញាតព្ពា វិភាវិនា។
Avahārā dasañceti, viññātabbā vibhāvinā.
៥.
5.
សាហត្ថាណត្តិកោ ចេវ, និស្សគ្គោ ចាត្ថសាធកោ;
Sāhatthāṇattiko ceva, nissaggo cātthasādhako;
ធុរនិក្ខេបនញ្ចេវ, ឥទំ សាហត្ថបញ្ចកំ។
Dhuranikkhepanañceva, idaṃ sāhatthapañcakaṃ.
៦.
6.
បុព្ពសហប្បយោគោ ច, សំវិធាហរណម្បិ ច;
Pubbasahappayogo ca, saṃvidhāharaṇampi ca;
សង្កេតកម្មំ និមិត្តំ, បុព្ពប្បយោគបញ្ចកំ។
Saṅketakammaṃ nimittaṃ, pubbappayogapañcakaṃ.
៧.
7.
ថេយ្យាបសយ្ហបរិកប្ប-ប្បដិច្ឆន្នកុសាទិកា;
Theyyāpasayhaparikappa-ppaṭicchannakusādikā;
អវហារា ឥមេ បញ្ច, វិញ្ញាតព្ពា វិភាវិនា។
Avahārā ime pañca, viññātabbā vibhāvinā.
៨.
8.
មនុស្សបាណំ បាណោតិ, ជានំ វធកចេតសា;
Manussapāṇaṃ pāṇoti, jānaṃ vadhakacetasā;
ជីវិតា យោ វិយោជេតិ, សាសនា សោ បរាជិតោ។
Jīvitā yo viyojeti, sāsanā so parājito.
៩.
9.
ឈានាទិភេទំ ហទយេ អសន្តំ,
Jhānādibhedaṃ hadaye asantaṃ,
អញ្ញបទេសញ្ច វិនាធិមានំ;
Aññapadesañca vinādhimānaṃ;
មនុស្សជាតិស្ស វទេយ្យ ភិក្ខុ,
Manussajātissa vadeyya bhikkhu,
ញាតក្ខណេ តេន បរាជិកោ ភវេតិ។
Ñātakkhaṇe tena parājiko bhaveti.
