| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১. পারাজিকনিদ্দেসো
1. Pārājikaniddeso
১.
1.
সং নিমিত্তং পৰেসন্তো, ভিক্খু মগ্গত্তযে চুতো।
Saṃ nimittaṃ pavesanto, bhikkhu maggattaye cuto;
পৰেসনট্ঠিতুদ্ধার-পৰিট্ঠে চেপি সাদিযং॥
Pavesanaṭṭhituddhāra-paviṭṭhe cepi sādiyaṃ.
২.
2.
অদিন্নং মানুসং ভণ্ডং, থেয্যাযেকেন আদিযং।
Adinnaṃ mānusaṃ bhaṇḍaṃ, theyyāyekena ādiyaṃ;
পঞ্চৰীসাৰহারেসু, গরুকং চে চুতো ভৰে॥
Pañcavīsāvahāresu, garukaṃ ce cuto bhave.
৩.
3.
আদিযন্তো হরন্তোৰ-হরন্তোপিরিযাপথং।
Ādiyanto harantova-harantopiriyāpathaṃ;
ৰিকোপেন্তো তথা ঠানা, চাৰেন্তোপি পরাজিকো॥
Vikopento tathā ṭhānā, cāventopi parājiko.
৪.
4.
তত্থ নানেকভণ্ডানং, পঞ্চকানং ৰসা পন।
Tattha nānekabhaṇḍānaṃ, pañcakānaṃ vasā pana;
অৰহারা দসঞ্চেতি, ৰিঞ্ঞাতব্বা ৰিভাৰিনা॥
Avahārā dasañceti, viññātabbā vibhāvinā.
৫.
5.
সাহত্থাণত্তিকো চেৰ, নিস্সগ্গো চাত্থসাধকো।
Sāhatthāṇattiko ceva, nissaggo cātthasādhako;
ধুরনিক্খেপনঞ্চেৰ, ইদং সাহত্থপঞ্চকং॥
Dhuranikkhepanañceva, idaṃ sāhatthapañcakaṃ.
৬.
6.
পুব্বসহপ্পযোগো চ, সংৰিধাহরণম্পি চ।
Pubbasahappayogo ca, saṃvidhāharaṇampi ca;
সঙ্কেতকম্মং নিমিত্তং, পুব্বপ্পযোগপঞ্চকং॥
Saṅketakammaṃ nimittaṃ, pubbappayogapañcakaṃ.
৭.
7.
থেয্যাপসয্হপরিকপ্প-প্পটিচ্ছন্নকুসাদিকা।
Theyyāpasayhaparikappa-ppaṭicchannakusādikā;
অৰহারা ইমে পঞ্চ, ৰিঞ্ঞাতব্বা ৰিভাৰিনা॥
Avahārā ime pañca, viññātabbā vibhāvinā.
৮.
8.
মনুস্সপাণং পাণোতি, জানং ৰধকচেতসা।
Manussapāṇaṃ pāṇoti, jānaṃ vadhakacetasā;
জীৰিতা যো ৰিযোজেতি, সাসনা সো পরাজিতো॥
Jīvitā yo viyojeti, sāsanā so parājito.
৯.
9.
ঝানাদিভেদং হদযে অসন্তং,
Jhānādibhedaṃ hadaye asantaṃ,
অঞ্ঞপদেসঞ্চ ৰিনাধিমানং।
Aññapadesañca vinādhimānaṃ;
মনুস্সজাতিস্স ৰদেয্য ভিক্খু,
Manussajātissa vadeyya bhikkhu,
ঞাতক্খণে তেন পরাজিকো ভৰেতি॥
Ñātakkhaṇe tena parājiko bhaveti.
