| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
1. பாராஜிகனித்³தே³ஸவண்ணனா
1. Pārājikaniddesavaṇṇanā
1-2. இதா³னி தே த³ஸ்ஸேதுங் ‘‘மக்³க³த்தயே’’திஆதி³ ஆரத்³த⁴ங். தத்த² மனுஸ்ஸாமனுஸ்ஸதிரச்சா²னக³தானங் வஸேன திஸ்ஸோ இத்தி²யோ, தயோ உப⁴தொப்³யஞ்ஜனகா, தயோ பண்ட³கா, தயோ புரிஸாதி பாராஜிகவத்து²பூ⁴தானங் நிமித்தானங் நிஸ்ஸயா த்³வாத³ஸமத்தா ஹொந்தி, தேஸங் வச்சமக்³க³ப்பஸ்ஸாவமக்³க³முக²மக்³க³வஸேன தயோ மக்³கா³. தத்த² மனுஸ்ஸித்தி²யா தயோ, அமனுஸ்ஸித்தி²யா தயோ, திரச்சா²னக³தித்தி²யா தயோதி நவ, ததா² மனுஸ்ஸஉப⁴தொப்³யஞ்ஜனகாதீ³னங். மனுஸ்ஸபண்ட³காதீ³னங் பன வச்சமக்³க³முக²மக்³க³வஸேன த்³வே த்³வே கத்வா ச², ததா² மனுஸ்ஸபுரிஸாதீ³னந்தி ஸப்³பே³ஸங் வஸேன திங்ஸ மக்³கா³ ஹொந்தி. தே ஸப்³பே³ பரிக்³க³ஹெத்வா இத⁴ ‘‘மக்³க³த்தயே’’தி வுத்தங், தஸ்மிங் மக்³க³த்தயேதி அத்தோ². அனிக்கி²த்தஸிக்கோ²தி பி⁴க்கு²பா⁴வதோ சவிதுகாமதாசித்தேன யதா²லக்க²ணங் அபச்சக்கா²தஸிக்கோ²தி அத்தோ². ஸந்த²தஸந்த²தேதி வத்தா²தீ³ஸு யேன கேனசி ஸந்த²தே வா அஸந்த²தே வா. அல்லோகாஸேதி மக்³க³த்தயஸ்ஸ பகதிவாதேன அஸம்பு²ட்ட²ப்பதே³ஸே. நிமித்தந்தி அங்க³ஜாதங். ஸங்ஸந்த²தங் வா அஸந்த²தங் வாதி அத்தனோ அங்க³ஜாதங் வத்தா²தீ³னங் அஞ்ஞதரேன படிச்ச²ன்னங் வா அப்படிச்ச²ன்னங் வா. உபாதி³ண்ணந்தி அனட்ட²காயப்பஸாத³ங். வுத்தப்பகாரே மக்³க³த்தயே பவேஸந்தோ சுதோ பாராஜிகோதி ஸம்ப³ந்தோ⁴. நட்ட²காயப்பஸாத³ங் பன பீளகங் வா சம்மகி²லங் வா லோமங் வா பவேஸந்தஸ்ஸ து³க்கடங், மனுஸ்ஸானங் பன ஜீவமானகஸரீரே அக்கி²னாஸாகண்ணச்சி²த்³த³வத்தி²கோஸேஸு ஸத்த²காதீ³ஹி கதவணே வா மேது²னராகே³ன திலபீ³ஜமத்தம்பி அங்க³ஜாதங் பவேஸந்தஸ்ஸ து²ல்லச்சயங், அவஸேஸஸரீரேஸு உபகச்ச²காதீ³ஸு ச து³க்கடங். திரச்சா²னக³தானங் ஹத்தி²அஸ்ஸகோ³ணக³த்³ரப⁴ஒட்ட²மஹிங்ஸாதீ³னங் நாஸாய து²ல்லச்சயங், ததா² தேஸங் வத்தி²கோஸேஸு. ஸப்³பே³ஸம்பி திரச்சா²னக³தானங் அக்கி²கண்ணவணேஸு து³க்கடங், ததா² தேஸங் அவஸேஸஸரீரேஸுபி.
1-2. Idāni te dassetuṃ ‘‘maggattaye’’tiādi āraddhaṃ. Tattha manussāmanussatiracchānagatānaṃ vasena tisso itthiyo, tayo ubhatobyañjanakā, tayo paṇḍakā, tayo purisāti pārājikavatthubhūtānaṃ nimittānaṃ nissayā dvādasamattā honti, tesaṃ vaccamaggappassāvamaggamukhamaggavasena tayo maggā. Tattha manussitthiyā tayo, amanussitthiyā tayo, tiracchānagatitthiyā tayoti nava, tathā manussaubhatobyañjanakādīnaṃ. Manussapaṇḍakādīnaṃ pana vaccamaggamukhamaggavasena dve dve katvā cha, tathā manussapurisādīnanti sabbesaṃ vasena tiṃsa maggā honti. Te sabbe pariggahetvā idha ‘‘maggattaye’’ti vuttaṃ, tasmiṃ maggattayeti attho. Anikkhittasikkhoti bhikkhubhāvato cavitukāmatācittena yathālakkhaṇaṃ apaccakkhātasikkhoti attho. Santhatasanthateti vatthādīsu yena kenaci santhate vā asanthate vā. Allokāseti maggattayassa pakativātena asamphuṭṭhappadese. Nimittanti aṅgajātaṃ. Saṃsanthataṃ vā asanthataṃ vāti attano aṅgajātaṃ vatthādīnaṃ aññatarena paṭicchannaṃ vā appaṭicchannaṃ vā. Upādiṇṇanti anaṭṭhakāyappasādaṃ. Vuttappakāre maggattaye pavesanto cuto pārājikoti sambandho. Naṭṭhakāyappasādaṃ pana pīḷakaṃ vā cammakhilaṃ vā lomaṃ vā pavesantassa dukkaṭaṃ, manussānaṃ pana jīvamānakasarīre akkhināsākaṇṇacchiddavatthikosesu satthakādīhi katavaṇe vā methunarāgena tilabījamattampi aṅgajātaṃ pavesantassa thullaccayaṃ, avasesasarīresu upakacchakādīsu ca dukkaṭaṃ. Tiracchānagatānaṃ hatthiassagoṇagadrabhaoṭṭhamahiṃsādīnaṃ nāsāya thullaccayaṃ, tathā tesaṃ vatthikosesu. Sabbesampi tiracchānagatānaṃ akkhikaṇṇavaṇesu dukkaṭaṃ, tathā tesaṃ avasesasarīresupi.
இதா³னி பவேஸனங் நாம ந கேவலங் அத்துபக்கமேனேவ ஹோதி, பி⁴க்கு²பச்சத்தி²காதீ³னங் பன வஸேன பரூபக்கமேனாபி ஹோதி, தத்தா²பி ஸேவனசித்தே ஸதி பாராஜிகோ ஹோதீதி த³ஸ்ஸனத்த²ங் ‘‘அத² வா’’திஆதி³ வுத்தங். தஸ்ஸத்தோ² – யோ பி⁴க்கு² பவேஸனபவிட்ட²டி²தஉத்³தா⁴ரணக்க²ணேஸு ஸாதி³யதி, தஸ்மிங் க²ணே ஸேவனசித்தங் உபட்ட²பேதி, ஸோபி பாராஜிகோ ஹோதி. யோ பன பி⁴க்கு² ஸப்³ப³ஸோ அஸாதி³யந்தோ ஆஸீவிஸமுக²ங் அங்கா³ரகாஸுஞ்ச பவிட்ட²ங் விய மஞ்ஞதி, ஸோ நிப்பராதோ⁴ ஹோதி. எத்த² டி²தங் நாம ஸுக்கவிஸ்ஸட்டி²ஸமயப்பவத்தி.
Idāni pavesanaṃ nāma na kevalaṃ attupakkameneva hoti, bhikkhupaccatthikādīnaṃ pana vasena parūpakkamenāpi hoti, tatthāpi sevanacitte sati pārājiko hotīti dassanatthaṃ ‘‘atha vā’’tiādi vuttaṃ. Tassattho – yo bhikkhu pavesanapaviṭṭhaṭhitauddhāraṇakkhaṇesu sādiyati, tasmiṃ khaṇe sevanacittaṃ upaṭṭhapeti, sopi pārājiko hoti. Yo pana bhikkhu sabbaso asādiyanto āsīvisamukhaṃ aṅgārakāsuñca paviṭṭhaṃ viya maññati, so nipparādho hoti. Ettha ṭhitaṃ nāma sukkavissaṭṭhisamayappavatti.
பட²மங்.
Paṭhamaṃ.
3-4. இதா³னி து³தியங் த³ஸ்ஸேதுங் ‘‘ஆதி³யெய்யா’’திஆதி³மாஹ. ‘‘ஆதி³யெய்யா’’திஆதீ³னங் பதா³னங் ‘‘அதி³ன்னங் தெ²ய்யசித்தேன ப⁴வே பாராஜிகோ’’தி இமினா ஸம்ப³ந்தோ⁴. ஆதி³யெய்யாதி ஆராமாதி³ங் அபி⁴யுஞ்ஜித்வா யோ பி⁴க்கு² க³ண்ஹெய்ய, ஸோ ப⁴வே பாராஜிகோதி அத்தோ². ஏவங் ஸேஸேஸுபி. ஹரெய்யாதி வேதனேன வா மித்தபா⁴வேன வா அஞ்ஞஸ்ஸ ப⁴ண்ட³ங் ஹரந்தோ புன தெ²ய்யசித்தே உப்பன்னே ‘‘ஸீஸே பா⁴ரங் தெ²ய்யசித்தோ ஆமஸதீ’’திஆதி³னா க³ண்ஹெய்யாதி அத்தோ². அவஹரெய்யாதி ‘‘உபனிக்கி²த்தங் ப⁴ண்ட³ங் ‘தே³ஹி மே ப⁴ண்ட³’ந்தி வுச்சமானோ ‘நாஹங் க³ண்ஹாமீ’’திஆதி³னா அவஹரெய்ய. இரியாபத²ங் கோபெய்யாதி ‘‘ஸஹப⁴ண்ட³ஹாரகங் நெஸ்ஸாமீ’’தி தேனேவ புரிஸேன தங் நேதுங் தஸ்ஸ க³மனபத²ங் வாரெத்வா அஞ்ஞேன மக்³கே³ன தங் ஸந்தஜ்ஜெத்வா நேதி, ஏவங் நெந்தஸ்ஸ தஸ்ஸ புரிஸஸ்ஸ பட²மபாதே³ து²ல்லச்சயங், து³தியபாது³த்³தா⁴ரே பாராஜிகங். ‘‘த²லட்ட²ங் ப⁴ண்ட³ங் தெ²ய்யசித்தோ ஆமஸதீ’’திஆதி³னா டா²னா சாவெய்ய. பரிகப்பிதட்டா²னங் வா ஸுங்ககா⁴தங் வா அதிக்காமெந்தோ ஸங்கேதங் வீதினாமெய்ய. யங் கிஞ்சி பரபரிக்³க³ஹிதங் ஸஸ்ஸாமிகங் ப⁴ண்ட³ங் தேஹி ஸாமிகேஹி காயேன வா வாசாய வா ந தி³ன்னந்தி அதி³ன்னங்.
3-4. Idāni dutiyaṃ dassetuṃ ‘‘ādiyeyyā’’tiādimāha. ‘‘Ādiyeyyā’’tiādīnaṃ padānaṃ ‘‘adinnaṃ theyyacittena bhave pārājiko’’ti iminā sambandho. Ādiyeyyāti ārāmādiṃ abhiyuñjitvā yo bhikkhu gaṇheyya, so bhave pārājikoti attho. Evaṃ sesesupi. Hareyyāti vetanena vā mittabhāvena vā aññassa bhaṇḍaṃ haranto puna theyyacitte uppanne ‘‘sīse bhāraṃ theyyacitto āmasatī’’tiādinā gaṇheyyāti attho. Avahareyyāti ‘‘upanikkhittaṃ bhaṇḍaṃ ‘dehi me bhaṇḍa’nti vuccamāno ‘nāhaṃ gaṇhāmī’’tiādinā avahareyya. Iriyāpathaṃ kopeyyāti ‘‘sahabhaṇḍahārakaṃ nessāmī’’ti teneva purisena taṃ netuṃ tassa gamanapathaṃ vāretvā aññena maggena taṃ santajjetvā neti, evaṃ nentassa tassa purisassa paṭhamapāde thullaccayaṃ, dutiyapāduddhāre pārājikaṃ. ‘‘Thalaṭṭhaṃ bhaṇḍaṃ theyyacitto āmasatī’’tiādinā ṭhānā cāveyya. Parikappitaṭṭhānaṃ vā suṅkaghātaṃ vā atikkāmento saṅketaṃ vītināmeyya. Yaṃ kiñci parapariggahitaṃ sassāmikaṃ bhaṇḍaṃ tehi sāmikehi kāyena vā vācāya vā na dinnanti adinnaṃ.
இதா³னி ந இமினாவ ஆகாரேன அவஹாரகோ பாராஜிகோ ஹோதி, அஞ்ஞதா²பி ஹோதீதி த³ஸ்ஸேதுங் ‘‘அத² வா’’திஆதி³ வுத்தங். தெ²ய்யாவஹாரகோ ச ப³லாவஹாரகோ ச குஸாவஹாரகோ ச படிச்ச²ன்னாவஹாரகோ ச பரிகப்பாவஹாரகோ ச ப⁴வே பாராஜிகோதி ஸம்ப³ந்தோ⁴. தத்த² தெ²ய்யாவஹாரோ நாம ஸந்தி⁴ச்சே²தா³தீ³ஹி வா கங்ஸகூடமானகூடதுலாகூடாதீ³ஹி வா வஞ்செத்வா க³ஹணங். பஸய்ஹாவஹாரோ ப³லாவஹாரோ. குஸஸங்கமனங் கத்வா பரகொட்டா²ஸக்³க³ஹணங் குஸாவஹாரோ. பரப⁴ண்ட³ங் பங்ஸுஆதி³னா படிச்சா²தெ³த்வா ஸாமிகேஸு அபஸ்ஸித்வா க³தேஸு பச்சாக³ந்த்வா க³ஹணங் படிச்ச²ன்னாவஹாரோ. பரிகப்பாவஹாரோ பன து³விதோ⁴ ப⁴ண்டோ³காஸவஸேன. தத்த² ‘‘ஸாடகோ சே, க³ண்ஹிஸ்ஸாமி, ஸுத்தஞ்சே, ந க³ண்ஹிஸ்ஸாமீ’’தி ப⁴ண்ட³ங் பரிகப்பெத்வா அந்த⁴காரே பஸிப்³ப³கங் க³ண்ஹாதி. தத்த² சே ஸாடகோ ஹோதி, உத்³தா⁴ரேயேவ பாராஜிகங். ஸசே ஸுத்தங் ஹோதி, ரக்க²தி, புன ‘‘ஸுத்த’’ந்தி ஞத்வாபி ‘‘யங் லத்³த⁴ங், தங் க³ஹேதப்³ப³’’ந்தி உக்³க³ண்ஹந்தோ உத்³தா⁴ரேயேவ பாராஜிகங், அயங் ப⁴ண்ட³பரிகப்போ. ஓகாஸபரிகப்போ க³ப்³ப⁴த்³வாரப்பமுக²விஹாராதீ³னங் வஸேன பரிச்சே²த³ங் கரோதி ‘‘ஸசே மங் எத்த²ந்தரே பஸ்ஸந்தி, த³ஸ்ஸாமி, நோ சே பஸ்ஸந்தி, க³ண்ஹித்வா க³ச்சா²மீ’’தி, தஸ்ஸ தங் பரிகப்பிதபரிச்சே²த³ங் அதிக்கமந்தஸ்ஸ பத³வாரேன பாராஜிகங் வேதி³தப்³ப³ங், அயங் ஓகாஸபரிகப்போ.
Idāni na imināva ākārena avahārako pārājiko hoti, aññathāpi hotīti dassetuṃ ‘‘atha vā’’tiādi vuttaṃ. Theyyāvahārako ca balāvahārako ca kusāvahārako ca paṭicchannāvahārako ca parikappāvahārako ca bhave pārājikoti sambandho. Tattha theyyāvahāro nāma sandhicchedādīhi vā kaṃsakūṭamānakūṭatulākūṭādīhi vā vañcetvā gahaṇaṃ. Pasayhāvahāro balāvahāro. Kusasaṅkamanaṃ katvā parakoṭṭhāsaggahaṇaṃ kusāvahāro. Parabhaṇḍaṃ paṃsuādinā paṭicchādetvā sāmikesu apassitvā gatesu paccāgantvā gahaṇaṃ paṭicchannāvahāro. Parikappāvahāro pana duvidho bhaṇḍokāsavasena. Tattha ‘‘sāṭako ce, gaṇhissāmi, suttañce, na gaṇhissāmī’’ti bhaṇḍaṃ parikappetvā andhakāre pasibbakaṃ gaṇhāti. Tattha ce sāṭako hoti, uddhāreyeva pārājikaṃ. Sace suttaṃ hoti, rakkhati, puna ‘‘sutta’’nti ñatvāpi ‘‘yaṃ laddhaṃ, taṃ gahetabba’’nti uggaṇhanto uddhāreyeva pārājikaṃ, ayaṃ bhaṇḍaparikappo. Okāsaparikappo gabbhadvārappamukhavihārādīnaṃ vasena paricchedaṃ karoti ‘‘sace maṃ etthantare passanti, dassāmi, no ce passanti, gaṇhitvā gacchāmī’’ti, tassa taṃ parikappitaparicchedaṃ atikkamantassa padavārena pārājikaṃ veditabbaṃ, ayaṃ okāsaparikappo.
இதா³னி இமஸ்மிங் அதி³ன்னாதா³னே வினிச்ச²யனயங் த³ஸ்ஸேதுங் ‘‘ப⁴ண்ட³காலக்³க⁴தே³ஸேஹீ’’திஆதி³ வுத்தங். எத்தா²தி அதி³ன்னாதா³னே. நிச்ச²யோதி வினிச்ச²யோ காதப்³போ³தி அத்தோ². தத்த² கேனசி பி⁴க்கு²னா ‘‘மயா இத³ங் நாம ப⁴ண்ட³ங் தெ²ய்யசித்தேன க³ஹித’’ந்தி வுத்தே வினயத⁴ரேன ஸஹஸாவ தங் ஆபத்திங் அனாரோபெத்வா தஸ்ஸ ப⁴ண்ட³ஸ்ஸ ஸாமிகஅஸ்ஸாமிகபா⁴வங் உபபரிக்கி²த்வா யதி³ ஸஸ்ஸாமிகங், தஸ்ஸ ப⁴ண்ட³ஸ்ஸ அக்³க⁴வஸேன ஆபத்தியா காரேதப்³போ³. ஸசே நிராலயகாலே க³ஹிதங் , பாராஜிகேன ந காரேதப்³போ³, அயங் ப⁴ண்ட³வஸேன வினிச்ச²யோ.
Idāni imasmiṃ adinnādāne vinicchayanayaṃ dassetuṃ ‘‘bhaṇḍakālagghadesehī’’tiādi vuttaṃ. Etthāti adinnādāne. Nicchayoti vinicchayo kātabboti attho. Tattha kenaci bhikkhunā ‘‘mayā idaṃ nāma bhaṇḍaṃ theyyacittena gahita’’nti vutte vinayadharena sahasāva taṃ āpattiṃ anāropetvā tassa bhaṇḍassa sāmikaassāmikabhāvaṃ upaparikkhitvā yadi sassāmikaṃ, tassa bhaṇḍassa agghavasena āpattiyā kāretabbo. Sace nirālayakāle gahitaṃ , pārājikena na kāretabbo, ayaṃ bhaṇḍavasena vinicchayo.
காலோதி அவஹாரகாலோ. ததே³வ ஹி ப⁴ண்ட³ங் கதா³சி மஹக்³க⁴ங் ஹோதி, கதா³சி அப்பக்³க⁴ங், தஸ்மா யஸ்மிங் காலே அவஹடங், தஸ்மிங் காலே யோ தஸ்ஸ அக்³கோ⁴, தேன அக்³கே⁴ன ஆபத்தியா காரேதப்³போ³, அயங் காலவஸேன வினிச்ச²யோ.
Kāloti avahārakālo. Tadeva hi bhaṇḍaṃ kadāci mahagghaṃ hoti, kadāci appagghaṃ, tasmā yasmiṃ kāle avahaṭaṃ, tasmiṃ kāle yo tassa aggho, tena agghena āpattiyā kāretabbo, ayaṃ kālavasena vinicchayo.
அக்³கோ⁴தி ப⁴ண்ட³க்³கோ⁴. நவப⁴ண்ட³ஸ்ஸ ஹி யோ அக்³கோ⁴, ஸோ பச்சா² பரிஹாயதி, தஸ்மா ஸப்³ப³தா³ ப⁴ண்ட³ங் பகதிஅக்³க⁴வஸேனேவ ந காரேதப்³ப³ங், அயங் அக்³க⁴வஸேன வினிச்ச²யோ. தே³ஸோதி அவஹாரதே³ஸோ. ப⁴ண்டு³ட்டா²னதே³ஸே ஹி ப⁴ண்ட³ங் அப்பக்³க⁴ங் ஹோதி, அஞ்ஞத்த² மஹக்³க⁴ங், தஸ்மா யஸ்மிங் தே³ஸே ப⁴ண்ட³ங் அவஹடங், தஸ்மிங்யேவ தே³ஸே அக்³கே⁴ன காரேதப்³போ³, அயங் தே³ஸவஸேன வினிச்ச²யோ.
Agghoti bhaṇḍaggho. Navabhaṇḍassa hi yo aggho, so pacchā parihāyati, tasmā sabbadā bhaṇḍaṃ pakatiagghavaseneva na kāretabbaṃ, ayaṃ agghavasena vinicchayo. Desoti avahāradeso. Bhaṇḍuṭṭhānadese hi bhaṇḍaṃ appagghaṃ hoti, aññattha mahagghaṃ, tasmā yasmiṃ dese bhaṇḍaṃ avahaṭaṃ, tasmiṃyeva dese agghena kāretabbo, ayaṃ desavasena vinicchayo.
பரிபோ⁴கே³னபி ஸாடகாதி³கஸ்ஸ ப⁴ண்ட³ஸ்ஸ அக்³கோ⁴ பரிஹாயதி, தஸ்மா தஸ்ஸ பரிபோ⁴க³வஸேன பரிஹீனாபரிஹீனபா⁴வோ உபபரிக்கி²தப்³போ³, அயங் பரிபோ⁴க³வஸேன வினிச்ச²யோ.
Paribhogenapi sāṭakādikassa bhaṇḍassa aggho parihāyati, tasmā tassa paribhogavasena parihīnāparihīnabhāvo upaparikkhitabbo, ayaṃ paribhogavasena vinicchayo.
து³தியங்.
Dutiyaṃ.
5. இதா³னி ததியங் த³ஸ்ஸேதுங் ‘‘மனுஸ்ஸவிக்³க³ஹ’’ந்திஆதி³ ஆரத்³த⁴ங். தத்த² மனுஸ்ஸவிக்³க³ஹந்தி படிஸந்தி⁴விஞ்ஞாணேன ஸத்³தி⁴ங் உப்பன்னங் கலலரூபங் ஆதி³ங் கத்வா பகதியா வீஸதிவஸ்ஸஸதாயுகஸ்ஸ ஸத்தஸ்ஸ யாவ மரணகாலா எத்த²ந்தரே அனுபுப்³பே³ன வுத்³தி⁴ப்பத்தோ அத்தபா⁴வோ, ஏஸோ மனுஸ்ஸவிக்³க³ஹோ நாம, ஏவரூபங் மனுஸ்ஸவிக்³க³ஹந்தி அத்தோ². சிச்சாதி வத⁴கசேதனாவஸேன ஸஞ்சேதெத்வா பகப்பெத்வா அபி⁴விதரித்வா வீதிக்கமோதி அத்தோ². ஜீவிதா வா வியோஜயேதி வுத்தப்பகாரங் மனுஸ்ஸவிக்³க³ஹங் கலலகாலேபி தாபனமத்³த³னேஹி வா பே⁴ஸஜ்ஜஸம்பதா³னேன வா ததோ வா உத்³த⁴ம்பி தத³னுரூபேன உபக்கமேன ஸந்ததிவிகோபனவஸேன யோ ஜீவிதா வியோஜெய்ய, ஸோ சுதோ ப⁴வேதி ஸம்ப³ந்தோ⁴. கிஞ்ச பி⁴ய்யோ – ‘‘ஸத்த²ஹாரகங் வா’’திஆதி³ வுத்தங். எத்த² ஹரதீதி ஹாரகங், கிங் ஹரதி? ஜீவிதங், ஹரிதப்³ப³ந்தி வா ஹாரகங், உபனிக்கி²பிதப்³ப³ந்தி அத்தோ², ஸத்த²ஞ்ச தங் ஹாரகஞ்சாதி ஸத்த²ஹாரகங். அஸ்ஸாதி மனுஸ்ஸவிக்³க³ஹஸ்ஸ. யதா² மனுஸ்ஸவிக்³க³ஹோ இச்சி²திச்சி²தக்க²ணே தங் அஸிஆதி³ஸத்த²ங் படிலப⁴தி, ததா² ஸயங் மரணசேதனோ மரணாதி⁴ப்பாயோ ஹுத்வா உபனிக்கி²பெய்ய. ஸோபி சுதோ ப⁴வேதி அத்தோ². ஏதேன தா²வரப்பயோக³ங் த³ஸ்ஸேதி.
5. Idāni tatiyaṃ dassetuṃ ‘‘manussaviggaha’’ntiādi āraddhaṃ. Tattha manussaviggahanti paṭisandhiviññāṇena saddhiṃ uppannaṃ kalalarūpaṃ ādiṃ katvā pakatiyā vīsativassasatāyukassa sattassa yāva maraṇakālā etthantare anupubbena vuddhippatto attabhāvo, eso manussaviggaho nāma, evarūpaṃ manussaviggahanti attho. Ciccāti vadhakacetanāvasena sañcetetvā pakappetvā abhivitaritvā vītikkamoti attho. Jīvitā vā viyojayeti vuttappakāraṃ manussaviggahaṃ kalalakālepi tāpanamaddanehi vā bhesajjasampadānena vā tato vā uddhampi tadanurūpena upakkamena santativikopanavasena yo jīvitā viyojeyya, so cuto bhaveti sambandho. Kiñca bhiyyo – ‘‘satthahārakaṃ vā’’tiādi vuttaṃ. Ettha haratīti hārakaṃ, kiṃ harati? Jīvitaṃ, haritabbanti vā hārakaṃ, upanikkhipitabbanti attho, satthañca taṃ hārakañcāti satthahārakaṃ. Assāti manussaviggahassa. Yathā manussaviggaho icchiticchitakkhaṇe taṃ asiādisatthaṃ paṭilabhati, tathā sayaṃ maraṇacetano maraṇādhippāyo hutvā upanikkhipeyya. Sopi cuto bhaveti attho. Etena thāvarappayogaṃ dasseti.
6-7. இதா³னி ‘‘மரணவண்ணங் வா ஸங்வண்ணெய்யா’’திஆதி³விதி⁴ங் த³ஸ்ஸேதுங் ‘‘கா³ஹெய்ய மரணூபாயங், வதெ³ய்ய மரணே கு³ண’’ந்தி வுத்தங். தத்த² ‘‘ஸத்த²ங் வா ஆஹர, விஸங் வா கா²த³, ரஜ்ஜுயா வா உப்³ப³ந்தி⁴த்வா காலங் கரோஹீ’’திஆதி³னா நயேன மரணத்தா²ய உபாயங் கா³ஹெய்ய. மரணஸங்வண்ணனா பனெத்த² ப³ஹுவிதா⁴ ‘‘காயேன ஸங்வண்ணேதி, வாசாய காயவாசாய தூ³தேன லேகா²ய வா ஸங்வண்ணேதீ’’தி வுத்தத்தா. தத்த² காயேன ஸங்வண்ணேதி நாம காயேன விஞ்ஞாபேதி. ‘‘யோ பபாதே பபதனாதீ³னி கத்வா மரதி, ஸோ த⁴னங் வா லப⁴தி, யஸங் வா லப⁴தி, ஸக்³க³ங் வா க³ச்ச²தீ’’திஆதி³னா நயேன ஸங்வண்ணேதி, ஆபத்தி து³க்கடஸ்ஸ. தஸ்ஸ வசனங் ஸுத்வா கோசி ‘‘மரிஸ்ஸாமீ’’தி து³க்க²ங் வேத³னங் உப்பாதே³தி, து²ல்லச்சயங். மரதி சே, பாராஜிகங். ஏவங் ஸேஸேஸுபி. தூ³தேன ஸங்வண்ணனாயங் பன தூ³தஸ்ஸ ஸாஸனங் ஆரோசாபேதி ‘‘ஏவங் ஆரோசேஹீ’’தி, ‘‘யோ ஏவங் மரதி, ஸோ த⁴னங் வா லப⁴தீ’’தி ஸப்³ப³ங் புரிமஸதி³ஸமேவ. லேகா²ய ஸங்வண்ணேதி நாம கி³ரிபப்³ப³தபுராணாதி³லேக²ங் லிக²தி, ‘‘யோ ஏவங் மரதீ’’திஆதி³ வுத்தனயமேவ. எத்தா²பி யோ மரணூபாயங் வா கா³ஹெய்ய, மரணே வா கு³ணங் வதெ³ய்ய, ஸோ சுதோ ப⁴வேதி ஸம்ப³ந்தோ⁴.
6-7. Idāni ‘‘maraṇavaṇṇaṃ vā saṃvaṇṇeyyā’’tiādividhiṃ dassetuṃ ‘‘gāheyya maraṇūpāyaṃ, vadeyya maraṇe guṇa’’nti vuttaṃ. Tattha ‘‘satthaṃ vā āhara, visaṃ vā khāda, rajjuyā vā ubbandhitvā kālaṃ karohī’’tiādinā nayena maraṇatthāya upāyaṃ gāheyya. Maraṇasaṃvaṇṇanā panettha bahuvidhā ‘‘kāyena saṃvaṇṇeti, vācāya kāyavācāya dūtena lekhāya vā saṃvaṇṇetī’’ti vuttattā. Tattha kāyena saṃvaṇṇeti nāma kāyena viññāpeti. ‘‘Yo papāte papatanādīni katvā marati, so dhanaṃ vā labhati, yasaṃ vā labhati, saggaṃ vā gacchatī’’tiādinā nayena saṃvaṇṇeti, āpatti dukkaṭassa. Tassa vacanaṃ sutvā koci ‘‘marissāmī’’ti dukkhaṃ vedanaṃ uppādeti, thullaccayaṃ. Marati ce, pārājikaṃ. Evaṃ sesesupi. Dūtena saṃvaṇṇanāyaṃ pana dūtassa sāsanaṃ ārocāpeti ‘‘evaṃ ārocehī’’ti, ‘‘yo evaṃ marati, so dhanaṃ vā labhatī’’ti sabbaṃ purimasadisameva. Lekhāya saṃvaṇṇeti nāma giripabbatapurāṇādilekhaṃ likhati, ‘‘yo evaṃ maratī’’tiādi vuttanayameva. Etthāpi yo maraṇūpāyaṃ vā gāheyya, maraṇe vā guṇaṃ vadeyya, so cuto bhaveti sambandho.
இதா³னி பன இமஸ்ஸ மனுஸ்ஸவிக்³க³ஹஸ்ஸ ச²ப்³பி³தே⁴ பயோகே³ த³ஸ்ஸேதுங் ‘‘பயோகா³’’திஆதி³ ஆரத்³த⁴ங். ஸாஹத்தி²கனிஸ்ஸக்³கி³கஆணத்திகதா²வரஇத்³தி⁴மயவிஜ்ஜாமயானங் வஸேன தஸ்ஸ மனுஸ்ஸவிக்³க³ஹஸ்ஸ ச²ப்பயோகா³தி அதி⁴ப்பாயோ. தத்த² ஸாஹத்தி²கோதி ஸயங் மாரெந்தஸ்ஸ காயேன வா காயப்படிப³த்³தே⁴ன வா பஹரணங். நிஸ்ஸக்³கி³கோதி தூ³ரே டி²தங் மாரேதுகாமஸ்ஸ காயாதீ³ஹி உஸுஸத்தியந்தபாஸாணாதீ³னங் நிஸ்ஸஜ்ஜனங். ஆணத்திகோதி ‘‘அஸுகங் நாம மாரேஹீ’’தி அஞ்ஞங் ஆணாபெந்தஸ்ஸ ஆணாபனங். தா²வரோதி ஓபாதக்க²ணனங், அபஸ்ஸேனஸங்விதா⁴னங், அஸிஆதீ³னங் உபனிக்கி²பனங், தளாகாதீ³ஸு விஸஸம்பயோஜனங், ரூபூபஹாரோதி ஏவமாதி³. கம்மவிபாகஜாய இத்³தி⁴யா பயோஜனங் இத்³தி⁴பயோக³ங். மாரணத்தா²ய விஜ்ஜானங் பரிஜப்பனங் விஜ்ஜாமயோதி.
Idāni pana imassa manussaviggahassa chabbidhe payoge dassetuṃ ‘‘payogā’’tiādi āraddhaṃ. Sāhatthikanissaggikaāṇattikathāvaraiddhimayavijjāmayānaṃ vasena tassa manussaviggahassa chappayogāti adhippāyo. Tattha sāhatthikoti sayaṃ mārentassa kāyena vā kāyappaṭibaddhena vā paharaṇaṃ. Nissaggikoti dūre ṭhitaṃ māretukāmassa kāyādīhi ususattiyantapāsāṇādīnaṃ nissajjanaṃ. Āṇattikoti ‘‘asukaṃ nāma mārehī’’ti aññaṃ āṇāpentassa āṇāpanaṃ. Thāvaroti opātakkhaṇanaṃ, apassenasaṃvidhānaṃ, asiādīnaṃ upanikkhipanaṃ, taḷākādīsu visasampayojanaṃ, rūpūpahāroti evamādi. Kammavipākajāya iddhiyā payojanaṃ iddhipayogaṃ. Māraṇatthāya vijjānaṃ parijappanaṃ vijjāmayoti.
இதா³னி இமேஸு ச²ஸு பயோகே³ஸு ஆணத்தியங் ஸங்கேதவிஸங்கேததங் த³ஸ்ஸேதுங் ‘‘காலவத்தா²வுதி⁴ரியாபதா²’’திஆதி³மாஹ. தத்த² காலோதி புப்³ப³ண்ஹஸாயன்ஹாதி³காலோ ச யொப்³ப³னதா²வரியாதி³காலோபி ச. இமேஸு யங் கிஞ்சி காலங் நியமெத்வா ‘‘இமஸ்மிங் நாம காலே மாரேஹீ’’தி ஆணத்தோ ஸசே தஸ்மிங்யேவ காலே மாரேதி, ஆணத்திக்க²ணேயேவ பாராஜிகங். ஸசே நியமிதகாலதோ புரே வா பச்சா² வா மாரேதி, ஆணாபகோ முச்சதி. வத்தூ²தி மாரேதப்³போ³ புக்³க³லோ. ஸசே ஆணத்தோ தமேவ மாரேதி, ஆணாபகஸ்ஸ ஆணத்திக்க²ணேயேவ பாராஜிகங். அத² அஞ்ஞங் மாரேதி, ஆணாபகோ முச்சதி. ஏவங் ஸேஸேஸுபி வுத்தனயேனேவ வினிச்ச²யோ வேதி³தப்³போ³. ஆவுத⁴ந்தி அஸிஆதி³. இரியாபதோ²தி மாரேதப்³ப³ஸ்ஸ க³மனங் வா நிஸஜ்ஜா வாதி ஏவமாதி³கோ. கிரியாவிஸேஸோதி விஜ்ஜ²னங் வா சே²த³னங் வா பே⁴த³னங் வா ஸூலாரோபனங் வாதி ஏவமாதி³கோ. ஓகாஸோதி கா³மோ வா வனங் வா கே³ஹங் வாதி ஏவமாதி³கோ. இமேஸு யதா² யதா² வத⁴கோ ஆணத்தோ, ததா² ததா² கதே ஆணாபகஸ்ஸ ஆபத்தி, அஞ்ஞதா² கதே விஸங்கேதோ ஹோதி. ஆணத்தியங் பன அயங் விஸேஸோ ‘‘அதி⁴ட்டா²யாதி அதி⁴ட்ட²ஹித்வா ஆணாபேதி ‘ஏவங் விஜ்ஜ², ஏவங் பஹர, ஏவங் கா⁴தேஹீ’’தி வுத்தாய பாளியா லப்³ப⁴தீதி ஞாதப்³போ³.
Idāni imesu chasu payogesu āṇattiyaṃ saṅketavisaṅketataṃ dassetuṃ ‘‘kālavatthāvudhiriyāpathā’’tiādimāha. Tattha kāloti pubbaṇhasāyanhādikālo ca yobbanathāvariyādikālopi ca. Imesu yaṃ kiñci kālaṃ niyametvā ‘‘imasmiṃ nāma kāle mārehī’’ti āṇatto sace tasmiṃyeva kāle māreti, āṇattikkhaṇeyeva pārājikaṃ. Sace niyamitakālato pure vā pacchā vā māreti, āṇāpako muccati. Vatthūti māretabbo puggalo. Sace āṇatto tameva māreti, āṇāpakassa āṇattikkhaṇeyeva pārājikaṃ. Atha aññaṃ māreti, āṇāpako muccati. Evaṃ sesesupi vuttanayeneva vinicchayo veditabbo. Āvudhanti asiādi. Iriyāpathoti māretabbassa gamanaṃ vā nisajjā vāti evamādiko. Kiriyāvisesoti vijjhanaṃ vā chedanaṃ vā bhedanaṃ vā sūlāropanaṃ vāti evamādiko. Okāsoti gāmo vā vanaṃ vā gehaṃ vāti evamādiko. Imesu yathā yathā vadhako āṇatto, tathā tathā kate āṇāpakassa āpatti, aññathā kate visaṅketo hoti. Āṇattiyaṃ pana ayaṃ viseso ‘‘adhiṭṭhāyāti adhiṭṭhahitvā āṇāpeti ‘evaṃ vijjha, evaṃ pahara, evaṃ ghātehī’’ti vuttāya pāḷiyā labbhatīti ñātabbo.
ததியங்.
Tatiyaṃ.
8-9. இதா³னி சதுத்த²ங் த³ஸ்ஸேதுங் ‘‘ஜா²னாதி³பே⁴த³’’ந்திஆதி³மாஹ. தஸ்ஸத்தோ² – ‘‘ஜா²னங் விமொக்கோ² ஸமாதி⁴ ஸமாபத்தி ஞாணத³ஸ்ஸனங் மக்³க³பா⁴வனா ப²லஸச்சி²கிரியா கிலேஸப்பஹானங் வினீவரணதா சித்தஸ்ஸ ஸுஞ்ஞாகா³ரே அபி⁴ரதீ’’தி ஏவங் வுத்தங் உத்தரிமனுஸ்ஸத⁴ம்மங் அத்தனி நத்தி²தாய நோஸந்தங் ‘‘மயி அத்தீ²’’தி அத்தனி வா தங் ‘‘அஹங் எத்த² ஸந்தி³ஸ்ஸாமீ’’தி அத்தானங் வா தத்த² உபனெத்வா தீ³பெந்தோ சுதோ ப⁴வே. கொட்டா²ஸங் வாதி எத்த² ‘‘ஜா²னலாபீ⁴, விமொக்க²லாபீ⁴, ஸமாதி⁴லாபீ⁴, ஸமாபத்திலாபீ⁴ம்ஹீ’’தி ஏவமாதி³னா நயேன கொட்டா²ஸதோ வாதி அத்தோ². ஏகேகங் வாதி ‘‘பட²மஸ்ஸ ஜா²னஸ்ஸ லாபீ⁴, து³தியஸ்ஸ ஜா²னஸ்ஸ லாபீ⁴ம்ஹீ’’தி ஏவமாதி³னா நயேன ஏகேகங் வாதி அத்தோ². ‘‘அதீதப⁴வே ஸோதாபன்னொம்ஹீ’’தி வத³தோ அதீதப⁴வங் ஸந்தா⁴ய கதி²தத்தா பாராஜிகங் நத்தி², தஸ்மா ‘‘பச்சுப்பன்னப⁴வஸ்ஸித’’ந்தி வுத்தங், தஸ்ஸ பச்சுப்பன்னப⁴வனிஸ்ஸிதங் கத்வாதி அத்தோ². அஞ்ஞாபதே³ஸரஹிதந்தி ‘‘யோ தே விஹாரே வஸதி, ஸோ பி⁴க்கு² பட²மஸ்ஸ ஜா²னஸ்ஸ லாபீ⁴’’திஆதி³னா நயேன அஞ்ஞாபதே³ஸங் வினாதி அத்தோ². ஏவங் தீ³பெந்தோ ஹி து²ல்லச்சயமாபஜ்ஜதி. தீ³பெந்தோதி ‘‘பட²மங் ஜா²னங் ஸமாபஜ்ஜிங், ஸமாபஜ்ஜாமி, ஸமாபன்னோ, பட²மஸ்ஸ ஜா²னஸ்ஸ லாபீ⁴ம்ஹி, வஸீம்ஹி, ஸச்சி²கதங் அஸ்ஸா’’தி ஏவமாதி³னா நயேன தீ³பெந்தோதி அத்தோ². ‘‘அதி⁴க³தோ’’தி மானோ அதி⁴மானோ, ஸோ யஸ்ஸ நத்தி², ஸோ அனதி⁴மானிகோ. கேன ஏவங் தீ³பெந்தோதி சே? தங் த³ஸ்ஸேதுங் ‘‘காயேன வாசா’’திஆதி³ வுத்தங் , காயேன வா வாசாய வா தது³ப⁴யேன வாதி அத்தோ². விஞ்ஞத்திபதே²தி யத்த² டி²தோ மனுஸ்ஸஜாதிகோ க³ஹட்டோ² வா பப்³ப³ஜிதோ வா தஸ்ஸ வசனங் பகதிஸோதேன ஸுத்வா ஸமனந்தரமேவ ‘‘இமங் நாம ஏஸ வத³தீ’’தி ஜானாதி, தத்த² ட²த்வா தீ³பெந்தோ சுதோ ப⁴வே, ந தே³வப்³ரஹ்மாதீ³ஸு அஞ்ஞதரேன ஞாதேதி அத்தோ².
8-9. Idāni catutthaṃ dassetuṃ ‘‘jhānādibheda’’ntiādimāha. Tassattho – ‘‘jhānaṃ vimokkho samādhi samāpatti ñāṇadassanaṃ maggabhāvanā phalasacchikiriyā kilesappahānaṃ vinīvaraṇatā cittassa suññāgāre abhiratī’’ti evaṃ vuttaṃ uttarimanussadhammaṃ attani natthitāya nosantaṃ ‘‘mayi atthī’’ti attani vā taṃ ‘‘ahaṃ ettha sandissāmī’’ti attānaṃ vā tattha upanetvā dīpento cuto bhave. Koṭṭhāsaṃ vāti ettha ‘‘jhānalābhī, vimokkhalābhī, samādhilābhī, samāpattilābhīmhī’’ti evamādinā nayena koṭṭhāsato vāti attho. Ekekaṃ vāti ‘‘paṭhamassa jhānassa lābhī, dutiyassa jhānassa lābhīmhī’’ti evamādinā nayena ekekaṃ vāti attho. ‘‘Atītabhave sotāpannomhī’’ti vadato atītabhavaṃ sandhāya kathitattā pārājikaṃ natthi, tasmā ‘‘paccuppannabhavassita’’nti vuttaṃ, tassa paccuppannabhavanissitaṃ katvāti attho. Aññāpadesarahitanti ‘‘yo te vihāre vasati, so bhikkhu paṭhamassa jhānassa lābhī’’tiādinā nayena aññāpadesaṃ vināti attho. Evaṃ dīpento hi thullaccayamāpajjati. Dīpentoti ‘‘paṭhamaṃ jhānaṃ samāpajjiṃ, samāpajjāmi, samāpanno, paṭhamassa jhānassa lābhīmhi, vasīmhi, sacchikataṃ assā’’ti evamādinā nayena dīpentoti attho. ‘‘Adhigato’’ti māno adhimāno, so yassa natthi, so anadhimāniko. Kena evaṃ dīpentoti ce? Taṃ dassetuṃ ‘‘kāyena vācā’’tiādi vuttaṃ , kāyena vā vācāya vā tadubhayena vāti attho. Viññattipatheti yattha ṭhito manussajātiko gahaṭṭho vā pabbajito vā tassa vacanaṃ pakatisotena sutvā samanantarameva ‘‘imaṃ nāma esa vadatī’’ti jānāti, tattha ṭhatvā dīpento cuto bhave, na devabrahmādīsu aññatarena ñāteti attho.
சதுத்த²ங்.
Catutthaṃ.
10. இதா³னி சதுன்னம்பி ஸாதா⁴ரணவினிச்ச²யங் வத்துங் ‘‘பாராஜிகேதே சத்தாரோ’’திஆதி³மாஹ. தத்தா²யங் ஸங்கே²போ – சத்தாரோபி ஏதே பாராஜிகா ‘‘ஏககம்மங் ஏகுத்³தே³ஸோ ஸமஸிக்க²தா’’தி ஏவங் வுத்தஸங்வாஸஸ்ஸ அப⁴ப்³ப³தாய அஸங்வாஸா, யதா²புரே புப்³பே³ கி³ஹிகாலே ச அனுபஸம்பன்னகாலே ச அஸங்வாஸிகா, ஏவங் பச்சா² பாராஜிகங் ஆபன்னாபி அஸங்வாஸாதி. கிஞ்ச பி⁴ய்யோ – அப⁴ப்³பா³ பி⁴க்கு²பா⁴வாய புன தேன அத்தபா⁴வேன உபஸம்பதா³ய அவத்து²தாய உபஸம்பன்னா ப⁴விதும்பி அப⁴ப்³பா³தி அத்தோ². கிங் வியாதி சே? ஸீஸச்சி²ன்னோவ ஜீவிதுங், யதா²பி ஸீஸச்சி²ன்னோ தேன அத்தபா⁴வேன புன ஜீவிதுங் அப⁴ப்³போ³, ஏவமிமே சத்தாரோதி அதி⁴ப்பாயோ.
10. Idāni catunnampi sādhāraṇavinicchayaṃ vattuṃ ‘‘pārājikete cattāro’’tiādimāha. Tatthāyaṃ saṅkhepo – cattāropi ete pārājikā ‘‘ekakammaṃ ekuddeso samasikkhatā’’ti evaṃ vuttasaṃvāsassa abhabbatāya asaṃvāsā, yathāpure pubbe gihikāle ca anupasampannakāle ca asaṃvāsikā, evaṃ pacchā pārājikaṃ āpannāpi asaṃvāsāti. Kiñca bhiyyo – abhabbā bhikkhubhāvāya puna tena attabhāvena upasampadāya avatthutāya upasampannā bhavitumpi abhabbāti attho. Kiṃ viyāti ce? Sīsacchinnova jīvituṃ, yathāpi sīsacchinno tena attabhāvena puna jīvituṃ abhabbo, evamime cattāroti adhippāyo.
11. இதா³னி இமேஸு சதூஸு பாராஜிகேஸு யே பரியாயாணத்தீஹி ஸம்ப⁴வந்தி, தே த³ஸ்ஸேதுங் ‘‘பரியாயோ சா’’திஆதி³ வுத்தங். தத்த² பரியாயோதி மரணாதி⁴ப்பாயஸ்ஸ காயபயோகோ³ வா வசீபயோகோ³ வா. தஸ்மா ‘‘யோ ஈதி³ஸே முஹுத்தே ஸத்த²ங் வா ஆஹரித்வா விஸங் வா கா²தி³த்வா ஸொப்³பா⁴தீ³ஸு வா பபதித்வா மரதி, ஸோ த⁴னங் வா லப⁴தி, யஸங் வா லப⁴தீ’’திஆதி³னா நயேன மரணங் அபி⁴னந்த³ந்தோ ‘‘இத³ங் ஸுத்வா யோ கோசி மரதூ’’தி யோ பரியாயேன வத³தி, தங் ஸுத்வா ஸசே கோசி ததா² மரதி, பாராஜிகங். நியமிதேன பன யங் ஸந்தா⁴ய வுத்தங், தஸ்ஸேவ மரணே பாராஜிகங். ஆணத்தி பன வுத்தத்தா²யேவ. ததியே மனுஸ்ஸவிக்³க³ஹபாராஜிகே லப்³ப⁴தீதி ஸம்ப³ந்தோ⁴. து³தியே பன அதி³ன்னாதா³னே ஆணத்தி ஏவ லப்³ப⁴தி, ந பரியாயோதி அத்தோ². கஸ்மா நங் பரியாயேன நாபஜ்ஜதீதி? யதா² மனுஸ்ஸவிக்³க³ஹே ‘‘மரணவண்ணங் வா ஸங்வண்ணெய்யா’’தி வுத்தங், ததா² இத⁴ அதி³ன்னாதா³னே ‘‘வண்ணங் வா ஸங்வண்ணெய்யா’’தி அவுத்தத்தா. ஸேஸேஸூதி பட²மசதுத்தே²ஸு பரியாயாணத்தித்³வயங் ந லப்³ப⁴தீதி அத்தோ².
11. Idāni imesu catūsu pārājikesu ye pariyāyāṇattīhi sambhavanti, te dassetuṃ ‘‘pariyāyo cā’’tiādi vuttaṃ. Tattha pariyāyoti maraṇādhippāyassa kāyapayogo vā vacīpayogo vā. Tasmā ‘‘yo īdise muhutte satthaṃ vā āharitvā visaṃ vā khāditvā sobbhādīsu vā papatitvā marati, so dhanaṃ vā labhati, yasaṃ vā labhatī’’tiādinā nayena maraṇaṃ abhinandanto ‘‘idaṃ sutvā yo koci maratū’’ti yo pariyāyena vadati, taṃ sutvā sace koci tathā marati, pārājikaṃ. Niyamitena pana yaṃ sandhāya vuttaṃ, tasseva maraṇe pārājikaṃ. Āṇatti pana vuttatthāyeva. Tatiye manussaviggahapārājike labbhatīti sambandho. Dutiye pana adinnādāne āṇatti eva labbhati, na pariyāyoti attho. Kasmā naṃ pariyāyena nāpajjatīti? Yathā manussaviggahe ‘‘maraṇavaṇṇaṃ vā saṃvaṇṇeyyā’’ti vuttaṃ, tathā idha adinnādāne ‘‘vaṇṇaṃ vā saṃvaṇṇeyyā’’ti avuttattā. Sesesūti paṭhamacatutthesu pariyāyāṇattidvayaṃ na labbhatīti attho.
12. இதா³னி சதூஸுபி யதா²ஸம்ப⁴வங் அங்க³பே⁴த³ங் த³ஸ்ஸேதுங் ‘‘ஸேவேதுகாமதாசித்த’’ந்திஆதி³ வுத்தங். தத்த² மேது²னத⁴ம்மஸ்ஸாதி மேது²னத⁴ம்மபாராஜிகஸ்ஸ. பு³தா⁴தி வினயத⁴ரா.
12. Idāni catūsupi yathāsambhavaṃ aṅgabhedaṃ dassetuṃ ‘‘sevetukāmatācitta’’ntiādi vuttaṃ. Tattha methunadhammassāti methunadhammapārājikassa. Budhāti vinayadharā.
13. மனுஸ்ஸஸந்தி மனுஸ்ஸஸந்தகதா. ஏதேன பேததிரச்சா²னக³தபரிக்³க³ஹேஸு அனாபத்தீதி தீ³பிதங் ஹோதி. ததா²ஸஞ்ஞீதி மனுஸ்ஸஸந்தகவஸேன பரபரிக்³க³ஹிதஸஞ்ஞீதி அத்தோ². வத்து²னோ க³ருதாதி பஞ்சமாஸகங் வா அதிரேகபஞ்சமாஸகங் வா தத³க்³க⁴னகங் ப⁴ண்ட³ங் வா ஹோதீதி அத்தோ². அவஹாரோ சாதி பஞ்சவீஸதியா அவஹாரேஸு யேன கேனசி அவஹாரோ ஹோதீதி அத்தோ². அதி³ன்னாதா³னஹேதுயோதி அதி³ன்னாதா³னபாராஜிகஸ்ஸ ஏதானி பஞ்ச அங்கா³னீதி அதி⁴ப்பாயோ.
13.Manussasanti manussasantakatā. Etena petatiracchānagatapariggahesu anāpattīti dīpitaṃ hoti. Tathāsaññīti manussasantakavasena parapariggahitasaññīti attho. Vatthuno garutāti pañcamāsakaṃ vā atirekapañcamāsakaṃ vā tadagghanakaṃ bhaṇḍaṃ vā hotīti attho. Avahāro cāti pañcavīsatiyā avahāresu yena kenaci avahāro hotīti attho. Adinnādānahetuyoti adinnādānapārājikassa etāni pañca aṅgānīti adhippāyo.
14. பாணோ மானுஸ்ஸகோதி மனுஸ்ஸஜாதிகபாணோ. தஸ்மிங் பாணே பாணஸஞ்ஞிதா. கா⁴தசேதனாதி வத⁴கசேதனா. பயோகோ³தி தங்ஸமுட்டி²தோ ஸாஹத்தி²காதீ³னங் ச²ன்னங் பயோகா³னங் அஞ்ஞதரபயோகோ³. தேன பயோகே³ன மரணங். பஞ்சேதே வத⁴ஹேதுயோதி மனுஸ்ஸவிக்³க³ஹபாராஜிகஸ்ஸ பஞ்ச அங்கா³னீதி அத்தோ².
14.Pāṇo mānussakoti manussajātikapāṇo. Tasmiṃ pāṇe pāṇasaññitā. Ghātacetanāti vadhakacetanā. Payogoti taṃsamuṭṭhito sāhatthikādīnaṃ channaṃ payogānaṃ aññatarapayogo. Tena payogena maraṇaṃ. Pañcete vadhahetuyoti manussaviggahapārājikassa pañca aṅgānīti attho.
15. அஸந்ததாதி உத்தரிமனுஸ்ஸத⁴ம்மஸ்ஸ அத்தனி அஸந்ததா சாதி அத்தோ². பாபமிச்ச²தாயாரோசனாதி இமினா யோ கேவலங் பாபமிச்ச²தங் வினா மந்த³த்தா மோமூஹத்தா ப⁴ணதி, தஸ்ஸ அனாபத்தீதி தீ³பிதங் ஹோதி. தஸ்ஸாதி யஸ்ஸ ஆரோசேதி, தஸ்ஸ மனுஸ்ஸஜாதிதா ச. ‘‘யோ தே விஹாரே வஸதி, ஸோ பி⁴க்கு² அரஹா’’திஆதி³னா (பரி॰ 160, 336) நாஞ்ஞாபதே³ஸோ ச. ததே³வாதி ததா³ ஏவ தங்க²ணேயேவ ஜானநங். அஸந்ததீ³பனேதி உத்தரிமனுஸ்ஸத⁴ம்மாரோசனபாராஜிகேதி அத்தோ².
15.Asantatāti uttarimanussadhammassa attani asantatā cāti attho. Pāpamicchatāyārocanāti iminā yo kevalaṃ pāpamicchataṃ vinā mandattā momūhattā bhaṇati, tassa anāpattīti dīpitaṃ hoti. Tassāti yassa āroceti, tassa manussajātitā ca. ‘‘Yo te vihāre vasati, so bhikkhu arahā’’tiādinā (pari. 160, 336) nāññāpadeso ca. Tadevāti tadā eva taṅkhaṇeyeva jānanaṃ. Asantadīpaneti uttarimanussadhammārocanapārājiketi attho.
16. இதா³னி ‘‘பாராஜிகா ச சத்தாரோ’’தி எத்த² ச-ஸத்³தே³ன ஸங்க³ஹிதேஹி ஸத்³தி⁴ங் ஸமோதா⁴னெத்வா த³ஸ்ஸேதுங் ‘‘அஸாதா⁴ரணா சத்தாரோ’’திஆதி³ வுத்தங். தத்த² உப்³ப⁴ஜாணுமண்ட³லிகா வஜ்ஜப்படிச்சா²தி³கா உக்கி²த்தானுவத்திகா அட்ட²வத்து²காதி இமே சத்தாரோ பி⁴க்கு²னீனங் பி⁴க்கூ²ஹி அஸாதா⁴ரணா நாம. ஏதாஸு உப்³ப⁴ஜாணுமண்ட³லிகா நாம யா காயஸங்ஸக்³க³ராகே³ன அவஸ்ஸுதா தேனேவ ராகே³ன அவஸ்ஸுதஸ்ஸ மனுஸ்ஸபுரிஸஸ்ஸ அக்க²கானங் அதோ⁴, ஜாணுமண்ட³லானங் கப்பரானஞ்ச உபரி யேன கேனசி ஸரீராவயவேன ஆமஸனாதி³ங் ஸாதி³யதி, தஸ்ஸா அதி⁴வசனங். யா பன பி⁴க்கு²னீ அஞ்ஞிஸ்ஸா பி⁴க்கு²னியா பாராஜிகஸங்கா²தங் வஜ்ஜங் ஜானங் படிச்சா²தே³தி, ஸா வஜ்ஜப்படிச்சா²தி³கா நாம. ஸமக்³கே³ன பன ஸங்கே⁴ன உக்கி²த்தங் பி⁴க்கு²ங் யா பி⁴க்கு²னீ யங்தி³ட்டி²கோ ஸோ ஹோதி, தஸ்ஸா தி³ட்டி²யா க³ஹணவஸேன அனுவத்ததி, ஸா உக்கி²த்தானுவத்திகா நாம. யா பன காயஸங்ஸக்³க³ராகே³ன திந்தா ததா²வித⁴ஸ்ஸேவ புரிஸஸ்ஸ ஹத்த²க்³க³ஹணங் வா ஸங்கா⁴டிகண்ணக்³க³ஹணங் வா ஸாதி³யதி, காயஸங்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே ஸந்திட்ட²தி வா, தத்த² ட²த்வா ஸல்லபதி வா, ஸங்கேதங் வா க³ச்ச²தி, புரிஸஸ்ஸ ஆக³மனங் வா ஸாதி³யதி, கேனசி வா படிச்ச²ன்னோகாஸங் பவிஸதி, ஹத்த²பாஸே ட²த்வா காயங் உபஸங்ஹரதி, அயங் அட்ட²வத்து²கா நாமாதி வேதி³தப்³பா³.
16. Idāni ‘‘pārājikā ca cattāro’’ti ettha ca-saddena saṅgahitehi saddhiṃ samodhānetvā dassetuṃ ‘‘asādhāraṇā cattāro’’tiādi vuttaṃ. Tattha ubbhajāṇumaṇḍalikā vajjappaṭicchādikā ukkhittānuvattikā aṭṭhavatthukāti ime cattāro bhikkhunīnaṃ bhikkhūhi asādhāraṇā nāma. Etāsu ubbhajāṇumaṇḍalikā nāma yā kāyasaṃsaggarāgena avassutā teneva rāgena avassutassa manussapurisassa akkhakānaṃ adho, jāṇumaṇḍalānaṃ kapparānañca upari yena kenaci sarīrāvayavena āmasanādiṃ sādiyati, tassā adhivacanaṃ. Yā pana bhikkhunī aññissā bhikkhuniyā pārājikasaṅkhātaṃ vajjaṃ jānaṃ paṭicchādeti, sā vajjappaṭicchādikā nāma. Samaggena pana saṅghena ukkhittaṃ bhikkhuṃ yā bhikkhunī yaṃdiṭṭhiko so hoti, tassā diṭṭhiyā gahaṇavasena anuvattati, sā ukkhittānuvattikā nāma. Yā pana kāyasaṃsaggarāgena tintā tathāvidhasseva purisassa hatthaggahaṇaṃ vā saṅghāṭikaṇṇaggahaṇaṃ vā sādiyati, kāyasaṃsaggasaṅkhātassa asaddhammassa paṭisevanatthāya purisassa hatthapāse santiṭṭhati vā, tattha ṭhatvā sallapati vā, saṅketaṃ vā gacchati, purisassa āgamanaṃ vā sādiyati, kenaci vā paṭicchannokāsaṃ pavisati, hatthapāse ṭhatvā kāyaṃ upasaṃharati, ayaṃ aṭṭhavatthukā nāmāti veditabbā.
அப⁴ப்³ப³கா ஏகாத³ஸாதி எத்த² பண்ட³கோ தெ²ய்யஸங்வாஸகோ தித்தி²யபக்கந்தகோ திரச்சா²னக³தோ மாதுகா⁴தகோ பிதுகா⁴தகோ அரஹந்தகா⁴தகோ பி⁴க்கு²னிதூ³ஸகோ ஸங்க⁴பே⁴த³கோ லோஹிதுப்பாத³கோ உப⁴தொப்³யஞ்ஜனகோதி இமே ஏகாத³ஸ அப⁴ப்³ப³புக்³க³லா நாம. விப்³ப⁴ந்தா பி⁴க்கு²னீதி யதா³ பி⁴க்கு²னீ விப்³ப⁴மிதுகாமா ஹுத்வா ஸேதவத்த²ங் வா காஸாயமேவ வா கி³ஹினிவாஸனாகாரேன நிவாஸேதி, ததா³ பாராஜிகமாபன்னா நாம ஹோதி, புன உபஸம்பத³ங் ந லப⁴தி, ஸா ச பாராஜிகாதி அத்தோ². முது³பிட்டி²கோ நாம கதபரிகம்மாய முது³காய பிட்டி²யா ஸமன்னாக³தோ. ஸோ எத்தாவதா ந பாராஜிகோ, அத² கோ² யதா³ அனபி⁴ரதியா பீளிதோ அத்தனோ அங்க³ஜாதங் அத்தனோ முக²மக்³க³வச்சமக்³கே³ஸு அஞ்ஞதரங் பவேஸேதி, ததா³ பாராஜிகோ ஹோதி.
Abhabbakāekādasāti ettha paṇḍako theyyasaṃvāsako titthiyapakkantako tiracchānagato mātughātako pitughātako arahantaghātako bhikkhunidūsako saṅghabhedako lohituppādako ubhatobyañjanakoti ime ekādasa abhabbapuggalā nāma. Vibbhantā bhikkhunīti yadā bhikkhunī vibbhamitukāmā hutvā setavatthaṃ vā kāsāyameva vā gihinivāsanākārena nivāseti, tadā pārājikamāpannā nāma hoti, puna upasampadaṃ na labhati, sā ca pārājikāti attho. Mudupiṭṭhiko nāma kataparikammāya mudukāya piṭṭhiyā samannāgato. So ettāvatā na pārājiko, atha kho yadā anabhiratiyā pīḷito attano aṅgajātaṃ attano mukhamaggavaccamaggesu aññataraṃ paveseti, tadā pārājiko hoti.
17-18. லம்பீ³தி அங்க³ஜாதஸ்ஸ தீ³க⁴த்தா ஏவங் வுத்தோ. ஸோபி யதா³ அனபி⁴ரதியா பீளிதோ அத்தனோ அங்க³ஜாதங் அத்தனோ முகே² வா வச்சமக்³கே³ வா பவேஸேதி, ததா³ பாராஜிகோ ஹோதி. முகே²ன க³ண்ஹந்தோதி எத்த² யோ அனபி⁴ரதியா பீளிதோ பரஸ்ஸ ஸுத்தஸ்ஸ வா பமத்தஸ்ஸ வா அங்க³ஜாதங் அத்தனோ முகே²ன க³ண்ஹாதி, ஸோ சாதி அத்தோ². தத்தே²வாதி பரஸ்ஸ அங்க³ஜாதேவாதி அத்தோ² . யோ அனபி⁴ரதியா பீளிதோ பரஸ்ஸ அங்க³ஜாதங் கம்மனியங் தி³ஸ்வா அத்தனோ வச்சமக்³கே³ன தஸ்ஸ உபரி நிஸீத³தி, தங் அத்தனோ வச்சமக்³க³ங் பவேஸேதி, ஸோ சாதி அத்தோ². ஏதே சத்தாரோ அனுலோமிகா மேது²னஸ்ஸாதி ஸம்ப³ந்தோ⁴. கத²மிதி சே? மக்³கே³ மக்³க³ப்பவேஸனஸதி³ஸதாய, ந உபி⁴ன்னங் ராக³வஸேன ஸதி³ஸபா⁴வூபக³தானங் த்³வயங்த்³வயஸமாபத்திஸதி³ஸதாய. இதா⁴க³தா சத்தாரோதி மேது²னத⁴ம்மாதி³வஸேன பாராஜிகா சத்தாரோ சாதி ஏவங் ஸமோதா⁴னதோ சதுவீஸதி பாராஜிகாதி அத்தோ².
17-18.Lambīti aṅgajātassa dīghattā evaṃ vutto. Sopi yadā anabhiratiyā pīḷito attano aṅgajātaṃ attano mukhe vā vaccamagge vā paveseti, tadā pārājiko hoti. Mukhena gaṇhantoti ettha yo anabhiratiyā pīḷito parassa suttassa vā pamattassa vā aṅgajātaṃ attano mukhena gaṇhāti, so cāti attho. Tatthevāti parassa aṅgajātevāti attho . Yo anabhiratiyā pīḷito parassa aṅgajātaṃ kammaniyaṃ disvā attano vaccamaggena tassa upari nisīdati, taṃ attano vaccamaggaṃ paveseti, so cāti attho. Ete cattāro anulomikā methunassāti sambandho. Kathamiti ce? Magge maggappavesanasadisatāya, na ubhinnaṃ rāgavasena sadisabhāvūpagatānaṃ dvayaṃdvayasamāpattisadisatāya. Idhāgatā cattāroti methunadhammādivasena pārājikā cattāro cāti evaṃ samodhānato catuvīsati pārājikāti attho.
எத்தா²ஹ – மாதுகா⁴தகபிதுகா⁴தகஅரஹந்தகா⁴தகா ததியபாராஜிகங் ஆபன்னா, பி⁴க்கு²னிதூ³ஸகோ லம்பீ³ஆத³யோ சத்தாரோ பட²மபாராஜிகங் ஆபன்னாயேவாதி கத்வா குதோ சதுவீஸதீதி? அதி⁴ப்பாயோ பனெத்த² அத்தி², மாதுகா⁴தகாத³யோ ஹி சத்தாரோ இத⁴ அனுபஸம்பன்னாயேவ அதி⁴ப்பேதா, லம்பீ³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா ஏகேன பரியாயேன மேது²னத⁴ம்மங் அப்படிஸேவினோபி ஹொந்தி, தஸ்மா விஸுங் வுத்தாதி. பாராஜிகவினிச்ச²யோ.
Etthāha – mātughātakapitughātakaarahantaghātakā tatiyapārājikaṃ āpannā, bhikkhunidūsako lambīādayo cattāro paṭhamapārājikaṃ āpannāyevāti katvā kuto catuvīsatīti? Adhippāyo panettha atthi, mātughātakādayo hi cattāro idha anupasampannāyeva adhippetā, lambīādayo cattāro kiñcāpi paṭhamapārājikena saṅgahitā, yasmā ekena pariyāyena methunadhammaṃ appaṭisevinopi honti, tasmā visuṃ vuttāti. Pārājikavinicchayo.
பாராஜிகனித்³தே³ஸவண்ணனா நிட்டி²தா.
Pārājikaniddesavaṇṇanā niṭṭhitā.
