| Library / Tipiṭaka / ཏིཔིཊཀ • Tipiṭaka / ཝིནཡཝིནིཙྪཡ-ཊཱིཀཱ • Vinayavinicchaya-ṭīkā |
བྷིཀྑུནིཝིབྷངྒོ
Bhikkhunivibhaṅgo
༡༩༦༤. ཨེཝཾ བྷིཀྑུཝིབྷངྒཔཱལི༹ཡཱ, ཨཊྛཀཐཱཡ ཙ ཨཱགཏཾ ཝིནིཙྪཡསཱརཾ ནཱཏིསངྑེཔཝིཏྠཱརནཡེན དསྶེཏྭཱ ཨིདཱནི ཏདནནྟརཱཡ བྷིཀྑུནིཝིབྷངྒཔཱལི༹ཡཱ, ཏདཊྛཀཐཱཡ ཙ ཨཱགཏཝིནིཙྪཡསཱརཾ དསྶེཏུམཱརབྷནྟོ ཨཱཧ ‘‘བྷིཀྑུནཱིན’’ནྟིཨཱདི། ཏསྨིཾ ཨཔཱིཏི ཨེཏྠ ཨཔི-སདྡོ ཝུཏྟཱཔེཀྑཱཡཾ། ‘‘སམཱསེནཱ’’ཏི ཨིདཾ གནྠཝསེན སངྑིཔནཾ སནྡྷཱཡ ཝུཏྟཾ། ‘‘ཀིཉྩིམཏྟ’’ནྟི ཨིདཾ ཨཏྠཝསེནཱཏི ཝེདིཏབྦཾ།
1964. Evaṃ bhikkhuvibhaṅgapāḷiyā, aṭṭhakathāya ca āgataṃ vinicchayasāraṃ nātisaṅkhepavitthāranayena dassetvā idāni tadanantarāya bhikkhunivibhaṅgapāḷiyā, tadaṭṭhakathāya ca āgatavinicchayasāraṃ dassetumārabhanto āha ‘‘bhikkhunīna’’ntiādi. Tasmiṃ apīti ettha api-saddo vuttāpekkhāyaṃ. ‘‘Samāsenā’’ti idaṃ ganthavasena saṅkhipanaṃ sandhāya vuttaṃ. ‘‘Kiñcimatta’’nti idaṃ atthavasenāti veditabbaṃ.
པཱརཱཛིཀཀཐཱཝཎྞནཱ
Pārājikakathāvaṇṇanā
༡༩༦༥. ཚནྡསོཏི མེཐུནསེཝནརཱགཔཊིསཾཡུཏྟེན ཚནྡེན། ཨེཏེན ‘‘ཚནྡེ པན ཨསཏི བལཀྐཱརེན པདྷཾསིཏཱཡ ཨནཱཔཏྟཱི’’ཏི (ཀངྑཱ॰ ཨཊྛ॰ མེཐུནདྷམྨསིཀྑཱཔདཝཎྞནཱ) ཨཊྛཀཐཱ སཱུཙིཏཱ ཧོཏི། སཱ སམཎཱི པཱརཱཛིཀཱ ནཱམ ཧོཏཱིཏི པཝུཙྩཏཱིཏི ཡོཛནཱ།
1965.Chandasoti methunasevanarāgapaṭisaṃyuttena chandena. Etena ‘‘chande pana asati balakkārena padhaṃsitāya anāpattī’’ti (kaṅkhā. aṭṭha. methunadhammasikkhāpadavaṇṇanā) aṭṭhakathā sūcitā hoti. Sā samaṇī pārājikā nāma hotīti pavuccatīti yojanā.
༡༩༦༦-༧. ‘‘སཛཱིཝསྶ ཨཔི ཨཛཱིཝསྶཱ’’ཏི པདཙྪེདོ། ‘‘སནྠཏཾ ཝཱ ཨསནྠཏ’’ནྟི ཨིདཾ ‘‘ཨངྒཛཱཏ’’ནྟི ཨིམསྶ ཝིསེསནཾ། ཨཏྟནོ ཏིཝིདྷེ མགྒེཏི ཨཏྟནོ ཝཙྩཔསྶཱཝམུཁམགྒཱནཾ ཨཉྙཏརསྨིཾ མགྒེ། ཨེཏྠ ‘‘སནྠཏེ ཝཱ ཨསནྠཏེ ཝཱ’’ཏི སེསོ, ‘‘ཨལློཀཱསེ’’ཏི ཨིམིནཱ སམྦནྡྷོ། ‘‘ཡེབྷུཡྻཨཀྑཱཡིཏཱདིཀ’’ནྟི པདཙྪེདོ། ཨཱདི-སདྡེན ཨཀྑཱཡིཏཾ སངྒཎྷཱཏི།
1966-7. ‘‘Sajīvassa api ajīvassā’’ti padacchedo. ‘‘Santhataṃ vā asanthata’’nti idaṃ ‘‘aṅgajāta’’nti imassa visesanaṃ. Attano tividhe maggeti attano vaccapassāvamukhamaggānaṃ aññatarasmiṃ magge. Ettha ‘‘santhate vā asanthate vā’’ti seso, ‘‘allokāse’’ti iminā sambandho. ‘‘Yebhuyyaakkhāyitādika’’nti padacchedo. Ādi-saddena akkhāyitaṃ saṅgaṇhāti.
མནུསྶཔུརིསཱདཱིནཾ ནཝནྣཾ སཛཱིཝསྶཔི ཨཛཱིཝསྶཔི ཡསྶ ཀསྶཙི སནྠཏཾ ཝཱ ཨསནྠཏཾ ཝཱ ཡེབྷུཡྻཀྑཱཡིཏཱདིཀཾ ཨངྒཛཱཏཾ ཨཏྟནོ སནྠཏེ ཝཱ ཨསནྠཏེ ཝཱ ཏིཝིདྷེ མགྒེ ཨལློཀཱསེ ཏིལཕལམཏྟམྤི པཝེསེནྟཱི པརཱཛིཏཱཏི ཡོཛནཱ།
Manussapurisādīnaṃ navannaṃ sajīvassapi ajīvassapi yassa kassaci santhataṃ vā asanthataṃ vā yebhuyyakkhāyitādikaṃ aṅgajātaṃ attano santhate vā asanthate vā tividhe magge allokāse tilaphalamattampi pavesentī parājitāti yojanā.
༡༩༦༨. སཱདྷཱརཎཝིནིཙྪཡནྟི བྷིཀྑུབྷིཀྑུནཱིནཾ སཱདྷཱརཎསིཀྑཱཔདཝིནིཙྪཡཾ།
1968.Sādhāraṇavinicchayanti bhikkhubhikkhunīnaṃ sādhāraṇasikkhāpadavinicchayaṃ.
༡༩༦༩-༧༠. ཨདྷཀྑཀནྟི ཨེཏྠ ཨཀྑཀཱནཾ ཨདྷོཏི ཝིགྒཧོ། ཨུབྦྷཛཱཎུམཎྜལནྟི ཛཱཎུམཎྜལཱནཾ ཨུབྦྷནྟི ཝིགྒཧོ། ཨུབྦྷ-སདྡོ ཨུདྡྷཾ-སདྡཔརིཡཱཡོ། ཨིདྷ ‘‘ཨཏྟནོ’’ཏི སེསོ། ཨཝསྶུཏསྶཱཏི ཀཱཡསཾསགྒརཱགེན ཏིནྟསྶ། ཨཝསྶུཏཱཏི ཨེཏྠཱཔི ཨེསེཝ ནཡོ། ཡཱཏི ཝུཏྟཏྟཱ ‘‘སཱ’’ཏི ལབྦྷཏི། སརཱིརནྟི ཨེཏྠ ‘‘ཡཾ ཀིཉྩཱི’’ཏི སེསོ། པརོཔཀྐམམཱུལཀཾ པཱརཱཛིཀཾ དསྶེཏུམཱཧ ‘‘ཏེན ཝཱ ཕུཊྛཱ’’ཏི། ཨེཏྠ ‘‘ཡཐཱཔརིཙྪིནྣེ ཀཱཡེ’’ཏི ཙ ‘‘སཱདིཡེཡྻཱ’’ཏི ཙ ཝཏྟབྦཾ།
1969-70.Adhakkhakanti ettha akkhakānaṃ adhoti viggaho. Ubbhajāṇumaṇḍalanti jāṇumaṇḍalānaṃ ubbhanti viggaho. Ubbha-saddo uddhaṃ-saddapariyāyo. Idha ‘‘attano’’ti seso. Avassutassāti kāyasaṃsaggarāgena tintassa. Avassutāti etthāpi eseva nayo. Yāti vuttattā ‘‘sā’’ti labbhati. Sarīranti ettha ‘‘yaṃ kiñcī’’ti seso. Paropakkamamūlakaṃ pārājikaṃ dassetumāha ‘‘tena vā phuṭṭhā’’ti. Ettha ‘‘yathāparicchinne kāye’’ti ca ‘‘sādiyeyyā’’ti ca vattabbaṃ.
ཡཱ པན བྷིཀྑུནཱི ཨཝསྶུཏཱ ཨཝསྶུཏསྶ མནུསྶཔུགྒལསྶ ཡཾ ཀིཉྩི སརཱིརཾ ཨཏྟནོ ཨདྷཀྑཀཾ ཨུབྦྷཛཱཎུམཎྜལཾ ཡཾ སརཱིརཀཾ, ཏེན སརཱིརཀེན ཚུཔེཡྻ, ཏེན མནུསྶཔུརིསེན ཡཐཱཔརིཙྪིནྣེ ཀཱཡེ ཕུཊྛཱ སཱདིཡེཡྻ ཝཱ, སཱ པཱརཱཛིཀཱ སིཡཱཏི ཡོཛནཱ།
Yā pana bhikkhunī avassutā avassutassa manussapuggalassa yaṃ kiñci sarīraṃ attano adhakkhakaṃ ubbhajāṇumaṇḍalaṃ yaṃ sarīrakaṃ, tena sarīrakena chupeyya, tena manussapurisena yathāparicchinne kāye phuṭṭhā sādiyeyya vā, sā pārājikā siyāti yojanā.
༡༩༧༡-༢. ‘‘གཧིཏཾ ཨུབྦྷཛཱཎུནཱ’’ཏི ཨིམིནཱ ཀཔྤརཏོ ཨུདྡྷཾ པཱརཱཛིཀཀྑེཏྟམེཝཱཏི དཱིཔེཏི། ཨཏྟནོ ཡཐཱཝུཏྟཔྤཀཱརེན ཀཱཡེནཱཏི ཡོཛནཱ, ཨཏྟནོ ‘‘ཨདྷཀྑཀ’’ནྟིཨཱདིཝུཏྟཔྤཀཱརེན ཀཱཡེནཱཏི ཨཏྠོ། ཏཐཱ ཨཝསྶུཏཱཡ ཨཝསྶུཏསྶ པུརིསསྶ ཀཱཡཔཊིབདྡྷཾ ཕུསནྟིཡཱ ཐུལླཙྩཡཾ ཧོཏི། ཨཏྟནོ ཡཐཱཔརིཙྪིནྣཀཱཡཔཊིབདྡྷེན ཏཐཱ ཨཝསྶུཏཱཡ ཨཝསྶུཏསྶ པུརིསསྶ ཀཱཡཾ ཕུསནྟིཡཱ ཐུལླཙྩཡཾ ཧོཏི།
1971-2.‘‘Gahitaṃ ubbhajāṇunā’’ti iminā kapparato uddhaṃ pārājikakkhettamevāti dīpeti. Attano yathāvuttappakārena kāyenāti yojanā, attano ‘‘adhakkhaka’’ntiādivuttappakārena kāyenāti attho. Tathā avassutāya avassutassa purisassa kāyapaṭibaddhaṃ phusantiyā thullaccayaṃ hoti. Attano yathāparicchinnakāyapaṭibaddhena tathā avassutāya avassutassa purisassa kāyaṃ phusantiyā thullaccayaṃ hoti.
༡༩༧༣. ཨཏྟནོ ཨཝསེསེན ཀཱཡེན ཨཝསྶུཏཱཡ ཨཝསྶུཏསྶ པུརིསཔུགྒལསྶ ཀཱཡཾ ཕུསནྟིཡཱ ཐུལླཙྩཡཾ ཧོཏི། ཨེཝཾ ཨཏྟནོ པཡོགེ ཙ པུརིསསྶ པཡོགེ ཙ ཏསྶཱ བྷིཀྑུནིཡཱཡེཝ ཐུལླཙྩཡཾ ཧོཏཱིཏི ཡོཛནཱ།
1973. Attano avasesena kāyena avassutāya avassutassa purisapuggalassa kāyaṃ phusantiyā thullaccayaṃ hoti. Evaṃ attano payoge ca purisassa payoge ca tassā bhikkhuniyāyeva thullaccayaṃ hotīti yojanā.
༡༩༧༤. ཡཀྑཔེཏཏིརཙྪཱནཔཎྜཀཱནཾ ཀཱཡཾ ‘‘ཨདྷཀྑཀཾ ཨུབྦྷཛཱཎུམཎྜལ’’ནྟི ཡཐཱཔརིཙྪིནྣཾ ཏཐེཝ ཨཏྟནོ ཀཱཡེན ཨུབྷཏོཨཝསྶཝེ སཏི ཕུསནྟིཡཱ ཨསྶཱ བྷིཀྑུནིཡཱ ཐུལླཙྩཡཾ, ཏཐེཝ ཡཀྑཱདཱིནཾ པཡོགེཔི ཏསྶཱཡེཝ ཐུལླཙྩཡཾ ཧོཏཱིཏི ཡོཛནཱ།
1974. Yakkhapetatiracchānapaṇḍakānaṃ kāyaṃ ‘‘adhakkhakaṃ ubbhajāṇumaṇḍala’’nti yathāparicchinnaṃ tatheva attano kāyena ubhatoavassave sati phusantiyā assā bhikkhuniyā thullaccayaṃ, tatheva yakkhādīnaṃ payogepi tassāyeva thullaccayaṃ hotīti yojanā.
༡༩༧༥. ཨེཀཏོཝསྶཝེ ཙཱཔཱིཏི བྷིཀྑུནིཡཱ ཝསེན ཨེཀཏོཨཝསྶཝེ ཙཱཔི། ཐུལླཙྩཡམུདཱིརིཏནྟི པཱརཱཛིཀཀྑེཏྟབྷཱུཏེན ཨཏྟནོ ཀཱཡེན མནུསྶཔུརིསསྶ ཀཱཡཾ ཕུསནྟིཡཱ ཐུལླཙྩཡཾ ཨཊྛཀཐཱཡཾ (པཱཙི॰ ཨཊྛ॰ ༦༦༢) ཝུཏྟནྟི ཨཏྠོ། ཨཝསེསེ ཙ སབྦཏྠཱཏི ཡཐཱཝུཏྟཔཱརཱཛིཀཀྑེཏྟཏོ ཨཝསེསེ ཐུལླཙྩཡཀྑེཏྟེ སབྦཏྠ ཨེཀཏོཨཝསྶཝེ སཏི དུཀྐཊཾ ཧོཏཱིཏི ཨཏྠོ། ཀཱཡཔཊིབདྡྷེན ཀཱཡཔཊིབདྡྷཱམསནཱདཱིསུ སབྦཏྠ ཨུབྷཏོཨཝསྶཝེ ཝཱ ཨེཀཏོཨཝསྶཝེ ཝཱ དུཀྐཊམེཝ ཧོཏི།
1975.Ekatovassave cāpīti bhikkhuniyā vasena ekatoavassave cāpi. Thullaccayamudīritanti pārājikakkhettabhūtena attano kāyena manussapurisassa kāyaṃ phusantiyā thullaccayaṃ aṭṭhakathāyaṃ (pāci. aṭṭha. 662) vuttanti attho. Avasese ca sabbatthāti yathāvuttapārājikakkhettato avasese thullaccayakkhette sabbattha ekatoavassave sati dukkaṭaṃ hotīti attho. Kāyapaṭibaddhena kāyapaṭibaddhāmasanādīsu sabbattha ubhatoavassave vā ekatoavassave vā dukkaṭameva hoti.
༡༩༧༦. ‘‘ཨུབྦྷཀྑཀམདྷོཛཱཎུམཎྜལ’’ནྟི ཡཾ ཨཔཱརཱཛིཀཀྑེཏྟཾ ཨིདྷ དསྶིཏཾ, ཨེཏྠ ཨེཀཏོཨཝསྶཝེ དུཀྐཊཾ ཧོཏི། ཀཔྤརསྶ ཙ ཧེཊྛཱཔི ཨེཏྠེཝ ཨདྷོཛཱཎུམཎྜལེ སངྒཧཾ གཏནྟི ཡོཛནཱ།
1976.‘‘Ubbhakkhakamadhojāṇumaṇḍala’’nti yaṃ apārājikakkhettaṃ idha dassitaṃ, ettha ekatoavassave dukkaṭaṃ hoti. Kapparassa ca heṭṭhāpi ettheva adhojāṇumaṇḍale saṅgahaṃ gatanti yojanā.
༡༩༧༧-༩. བྷིཀྑུ བྷིཀྑུནིཡཱ སདྡྷིཾ སཙེ ཀཱཡསཾསགྒཾ ཀེལཱཡཏི སེཝཏཱིཏི ཡོཛནཱ། བྷིཀྑུནིཡཱ ནཱསོ སིཡཱཏི སཱིལཝིནཱསོ པཱརཱཛིཀཱཔཏྟི སིཡཱཏི ཨཏྠོ། གེཧཔེམནྟི ཨེཏྠ ‘‘གེཧསིཏཔེམ’’ནྟི ཝཏྟབྦེ གཱཐཱབནྡྷཝསེན སིཏ-སདྡལོཔོ, ཨཏྠོ པནསྶ བྷིཀྑུཝིབྷངྒེ ཝུཏྟནཡོཝ།
1977-9. Bhikkhu bhikkhuniyā saddhiṃ sace kāyasaṃsaggaṃ kelāyati sevatīti yojanā. Bhikkhuniyā nāso siyāti sīlavināso pārājikāpatti siyāti attho. Gehapemanti ettha ‘‘gehasitapema’’nti vattabbe gāthābandhavasena sita-saddalopo, attho panassa bhikkhuvibhaṅge vuttanayova.
༡༩༨༠. ཨཝིསེསེནཱཏི ‘‘བྷིཀྑུནིཡཱ’’ཏི ཝཱ ‘‘བྷིཀྑུསྶཱ’’ཏི ཝཱ ཝིསེསཾ ཨཀཏྭཱ།
1980.Avisesenāti ‘‘bhikkhuniyā’’ti vā ‘‘bhikkhussā’’ti vā visesaṃ akatvā.
༡༩༨༡. ཡསྶཱཏི བྷིཀྑུསྶ ཝཱ བྷིཀྑུནིཡཱ ཝཱ། ཡཏྠཱཏི བྷིཀྑུནིཡཾ ཝཱ བྷིཀྑུསྨིཾ ཝཱ། མནོསུདྡྷནྟི ཀཱཡསཾསགྒཱདིརཱགརཧིཏཾ། ཏསྶ བྷིཀྑུསྶ ཝཱ བྷིཀྑུནིཡཱ ཝཱ ཏཏྠ བྷིཀྑུནིཡཾ ཝཱ བྷིཀྑུསྨིཾ ཝཱ ཝིསཡེ ནདོསཏཱ ཨནཱཔཏྟཱིཏི ཨཏྠོ།
1981.Yassāti bhikkhussa vā bhikkhuniyā vā. Yatthāti bhikkhuniyaṃ vā bhikkhusmiṃ vā. Manosuddhanti kāyasaṃsaggādirāgarahitaṃ. Tassa bhikkhussa vā bhikkhuniyā vā tattha bhikkhuniyaṃ vā bhikkhusmiṃ vā visaye nadosatā anāpattīti attho.
༡༩༨༢. བྷིནྡིཏྭཱཏི སཱིལབྷེདཾ ཀཏྭཱ། བྷིཀྑུནིཡཱ ཨཔཀཏཏྟཱ ཨཱཧ ‘‘ནེཝ ཧོཏི བྷིཀྑུནིདཱུསཀོ’’ཏི།
1982.Bhinditvāti sīlabhedaṃ katvā. Bhikkhuniyā apakatattā āha ‘‘neva hoti bhikkhunidūsako’’ti.
༡༩༨༣. ཨཐཱཏི ཝཱཀྱཱརམྦྷེ། ན ཧོཏཱཔཏྟི བྷིཀྑུནོཏི ཨེཏྠ བྷིཀྑུནཱིཧི ཀཱཡསཾསགྒསངྒྷཱདིསེསམཱཧ།
1983.Athāti vākyārambhe. Na hotāpatti bhikkhunoti ettha bhikkhunīhi kāyasaṃsaggasaṅghādisesamāha.
༡༩༨༤. ‘‘ཁེཏྟེ’’ཏི ཝཀྑམཱནཾ ‘‘ཕུཊྛཱ’’ཏི ཨིམིནཱ ཡོཛེཏྭཱ ‘‘པཱརཱཛིཀ’’ནྟིཨཱདཱིཧི, ‘‘ཐུལླཙྩཡཾ ཁེཏྟེ’’ཏིཨཱདཱིཧི ཙ སམྦནྡྷིཏབྦཾ། ‘‘པཱརཱཛིཀ’’ནྟི ཝཀྑམཱནཏྟཱ ཕུཊྛཱཏི ཨེཏྠ ‘‘པཱརཱཛིཀཀྑེཏྟེ’’ཏི སེསོ།
1984. ‘‘Khette’’ti vakkhamānaṃ ‘‘phuṭṭhā’’ti iminā yojetvā ‘‘pārājika’’ntiādīhi, ‘‘thullaccayaṃ khette’’tiādīhi ca sambandhitabbaṃ. ‘‘Pārājika’’nti vakkhamānattā phuṭṭhāti ettha ‘‘pārājikakkhette’’ti seso.
༡༩༨༥. ཏཐཱཏི ནིཙྩལཱཔི སཱདིཡཏི། ཁེཏྟེཏི ཐུལླཙྩཡཱདཱིནཾ ཁེཏྟེ། ཀཱཡེན ནིཙྩལཱཡཔི ཙིཏྟེན སཱདིཡནྟིཡཱ ཨཱཔཏྟི ཀསྨཱ ཝུཏྟཱཏི ཨཱཧ ‘‘ཝུཏྟཏྟཱ…པེ॰… སཏྠུནཱ’’ཏི , བྷིཀྑུཔཱཏིམོཀྑེ ཝིཡ ‘‘ཀཱཡསཾསགྒཾ སམཱཔཛྫེཡྻཱ’’ཏི ཨཝཏྭཱ ཨིདྷ ‘‘ཀཱཡསཾསགྒཾ སཱདིཡེཡྻཱ’’ཏི ཝུཏྟཏྟཱཏི ཨདྷིཔྤཱཡོ།
1985.Tathāti niccalāpi sādiyati. Khetteti thullaccayādīnaṃ khette. Kāyena niccalāyapi cittena sādiyantiyā āpatti kasmā vuttāti āha ‘‘vuttattā…pe… satthunā’’ti , bhikkhupātimokkhe viya ‘‘kāyasaṃsaggaṃ samāpajjeyyā’’ti avatvā idha ‘‘kāyasaṃsaggaṃ sādiyeyyā’’ti vuttattāti adhippāyo.
༡༩༨༦. ཏསྶཱ ཨཱཔཏྟིཡཱ། ཀྲིཡསམུཊྛཱནནྟི ཀིརིཡཱཡ སམུཊྛཱནཾ། ཨེཝཾ སཏཱིཏི སཱདིཡནམཏྟེནེཝ ཨཱཔཛྫིཏབྦབྷཱཝེ སཏི། ཨིདནྟི ‘‘ཀིརིཡསམུཊྛཱན’’མིཏིཝིདྷཱནཾ། ཏབྦཧུལེནེཝ ནཡེནཱཏི ཀིརིཡསམུཊྛཱནབཱཧུལླེན ནཡེན ཁདིརཝནཱདིཝོཧཱརོ ཝིཡཱཏི དཊྛབྦཾ།
1986.Tassā āpattiyā. Kriyasamuṭṭhānanti kiriyāya samuṭṭhānaṃ. Evaṃ satīti sādiyanamatteneva āpajjitabbabhāve sati. Idanti ‘‘kiriyasamuṭṭhāna’’mitividhānaṃ. Tabbahuleneva nayenāti kiriyasamuṭṭhānabāhullena nayena khadiravanādivohāro viyāti daṭṭhabbaṃ.
༡༩༨༧. ཏསྶཱ བྷིཀྑུནིཡཱ ཨསཉྩིཙྩ ཝིརཛ྄ཛྷིཏྭཱ ཨཱམསནྟིཡཱ ཨནཱཔཏྟི, ‘‘ཨཡཾ པུརིསོ’’ཏི ཝཱ ‘‘ཨིཏྠཱི’’ཏི ཝཱ ཨཛཱནིཏྭཱ ཨཱམསནྟིཡཱ ཨནཱཔཏྟི, པུརིསསྶ ཨཱམསནེ སཏི ཕསྶཾ ཨསཱདིཡནྟིཡཱ ཝཱ ཨནཱཔཏྟཱིཏི ཡོཛནཱ།
1987.Tassā bhikkhuniyā asañcicca virajjhitvā āmasantiyā anāpatti, ‘‘ayaṃ puriso’’ti vā ‘‘itthī’’ti vā ajānitvā āmasantiyā anāpatti, purisassa āmasane sati phassaṃ asādiyantiyā vā anāpattīti yojanā.
༡༩༨༨. ཁིཏྟཙིཏྟཱཡཱཏི ཡཀྑུམྨཏྟཱཡ། ཨུམྨཏྟིཀཱཡ ཝཱཏི པིཏྟཀོཔེན ཨུམྨཱདཔྤཏྟཱཡ། ཨིདཉྩ ‘‘ཨསུཙཱི’’ཏི ཝཱ ‘‘ཙནྡན’’ནྟི ཝཱ ཝིསེསཏཾ ཨཛཱནནམེཝ པམཱཎཾ།
1988.Khittacittāyāti yakkhummattāya. Ummattikāya vāti pittakopena ummādappattāya. Idañca ‘‘asucī’’ti vā ‘‘candana’’nti vā visesataṃ ajānanameva pamāṇaṃ.
ཨུབྦྷཛཱཎུམཎྜལཀཐཱཝཎྞནཱ།
Ubbhajāṇumaṇḍalakathāvaṇṇanā.
༡༩༨༩-༩༠. ‘‘པཱརཱཛིཀཏྟཾ ཛཱནནྟཱི’’ཏི ཨིམིནཱ ཨཝསེསཱཔཏྟིཾ ཛཱནིཏྭཱ ཚཱདེནྟིཡཱ པཱརཱཛིཀཱབྷཱཝཾ དཱིཔེཏི། སལིངྒེ ཏུ ཋིཏཱཡཱཏི པབྦཛྫཱལིངྒེཡེཝ ཋིཏཱཡ། ཨིཏི དྷུརེ ནིཀྑིཏྟམཏྟསྨིནྟི ཡོཛནཱ། ཨིཏི-སདྡོ ནིདསྶནེ། ཨིཏརཱཡ པུབྦེཡེཝ ཨཱཔནྣཏྟཱ ཏམཔེཀྑིཏྭཱ ‘‘སཱ ཙཱ’’ཏི ཨཱཧ།
1989-90.‘‘Pārājikattaṃ jānantī’’ti iminā avasesāpattiṃ jānitvā chādentiyā pārājikābhāvaṃ dīpeti. Saliṅge tu ṭhitāyāti pabbajjāliṅgeyeva ṭhitāya. Iti dhure nikkhittamattasminti yojanā. Iti-saddo nidassane. Itarāya pubbeyeva āpannattā tamapekkhitvā ‘‘sā cā’’ti āha.
༡༩༩༡. ཝུཏྟཱཝིསིཊྛཾ སབྦཾ ཝིནིཙྪཡཾ སངྒཧེཏུམཱཧ ‘‘སེས’’ནྟིཨཱདི། ཏཏྠཱཏི དུཊྛུལླཔཊིཙྪཱདནེ།
1991. Vuttāvisiṭṭhaṃ sabbaṃ vinicchayaṃ saṅgahetumāha ‘‘sesa’’ntiādi. Tatthāti duṭṭhullapaṭicchādane.
ཝཛྫཔཊིཙྪཱདིཀཐཱཝཎྞནཱ།
Vajjapaṭicchādikathāvaṇṇanā.
༡༩༩༢-༥. སངྒྷེནཱཏི སམགྒེན སངྒྷེན། ཨུཀྑིཏྟཀོཏི ཨཱཔཏྟིཡཱ ཨདསྶནཱདཱིསུ ཨུཀྑིཏྟཀོ། ‘‘ཨུཀྑེཔནེ ཋིཏོ’’ཏི ཨིམིནཱ ཨུཀྑེཔནཱིཡཀམྨཀཏསྶ ཨནོསཱརིཏབྷཱཝཾ དཱིཔེཏི། ཡཱ དིཊྛི ཨེཏསྶཱཏི ཡཾདིཊྛིཀོ, སོ ཨུཀྑིཏྟཀོ བྷིཀྑུ ཡཱཡ དིཊྛིཡཱ སམནྣཱགཏོ ཧོཏཱིཏི ཨདྷིཔྤཱཡོ ། ‘‘ཏསྶཱ དིཊྛིཡཱ གཧཎེནཱ’’ཏི ཨིམིནཱ ཨནུཝཏྟཔྤཀཱརོ དསྶིཏོ། ཏཾ ཨུཀྑིཏྟཀཾ བྷིཀྑུནྟི ཡོཛནཱ། སཱ བྷིཀྑུནཱི ཨཉྙཱཧི བྷིཀྑུནཱིཧི ཝིསུམྤིཙ སངྒྷམཛ྄ཛྷེཔི ‘‘ཨེསོ ཁོ ཨཡྻེ བྷིཀྑུ སམགྒེན སངྒྷེན ཨུཀྑིཏྟོ’’ཏིཨཱདིནཱ (པཱཙི॰ ༦༦༩) ནཡེན ཏིཀྑཏྟུཾ ཝུཙྩམཱནཱཏི ཡོཛནཱ། ཏཾ ཝཏྠུཾ ཨཙཛནྟཱི གཧེཏྭཱ ཡདི ཏཐེཝ ཏིཊྛཏཱིཏི ཡོཛནཱ། ཨེཏྠ ‘‘ཡཱཝཏཏིཡཾ སམནུབྷཱསིཏབྦཱ’’ཏི སེསོ། ཏསྶ ཀམྨསྶ ཨོསཱནེཏི ཏཏིཡཱཡ ཀམྨཝཱཙཱཡ ཡྻཀཱརཔྤཏྟཝསེན ཨསྶ སམནུབྷཱསནཀམྨསྶ པརིཡོསཱནེ། ཨསཱཀིཡདྷཱིཏརཱཏི ཨསཱཀིཡདྷཱིཏཱ, པཙྩཏྟེ ཀརཎཝཙནཾ། ‘‘པུན ཨཔྤཊིསནྡྷེཡཱ’’ཏི ཨིམིནཱ པུན ཏེནེཝ ཙ ཨཏྟབྷཱཝེན བྷིཀྑུནིབྷཱཝེ པཊིསནྡྷཱཏུཾ ཨནརཧཏཱ ཝུཏྟཱ།
1992-5.Saṅghenāti samaggena saṅghena. Ukkhittakoti āpattiyā adassanādīsu ukkhittako. ‘‘Ukkhepane ṭhito’’ti iminā ukkhepanīyakammakatassa anosāritabhāvaṃ dīpeti. Yā diṭṭhi etassāti yaṃdiṭṭhiko, so ukkhittako bhikkhu yāya diṭṭhiyā samannāgato hotīti adhippāyo . ‘‘Tassā diṭṭhiyā gahaṇenā’’ti iminā anuvattappakāro dassito. Taṃ ukkhittakaṃ bhikkhunti yojanā. Sā bhikkhunī aññāhi bhikkhunīhi visumpica saṅghamajjhepi ‘‘eso kho ayye bhikkhu samaggena saṅghena ukkhitto’’tiādinā (pāci. 669) nayena tikkhattuṃ vuccamānāti yojanā. Taṃ vatthuṃ acajantī gahetvā yadi tatheva tiṭṭhatīti yojanā. Ettha ‘‘yāvatatiyaṃ samanubhāsitabbā’’ti seso. Tassa kammassa osāneti tatiyāya kammavācāya yyakārappattavasena assa samanubhāsanakammassa pariyosāne. Asākiyadhītarāti asākiyadhītā, paccatte karaṇavacanaṃ. ‘‘Puna appaṭisandheyā’’ti iminā puna teneva ca attabhāvena bhikkhunibhāve paṭisandhātuṃ anarahatā vuttā.
༡༩༩༦. ཏིཀདུཀྐཊཾ ནིདྡིཊྛནྟི ཨདྷམྨཀམྨེ ཨདྷམྨཀམྨསཉྙཱ, ཝེམཏིཀཱ, དྷམྨཀམྨསཉྙཱཏི ཨེཏཱསཾ ཝསེན ཏིཀདུཀྐཊཾ ཝུཏྟཾ། སམནུབྷཱསནེ ཝུཏྟཱ སམུཊྛཱནཱདཡོ སབྦེ ཨིདྷ ཝཏྟབྦཱཏི ཡོཛནཱ།
1996.Tikadukkaṭaṃ niddiṭṭhanti adhammakamme adhammakammasaññā, vematikā, dhammakammasaññāti etāsaṃ vasena tikadukkaṭaṃ vuttaṃ. Samanubhāsane vuttā samuṭṭhānādayo sabbe idha vattabbāti yojanā.
ཨུཀྑིཏྟཱནུཝཏྟིཀཀཐཱཝཎྞནཱ།
Ukkhittānuvattikakathāvaṇṇanā.
༡༩༩༧. ‘‘ཧཏྠགྒཧཎཾ ཝཱ སཱདིཡེཡྻཱཏི ཧཏྠོ ནཱམ ཀཔྤརཾ ཨུཔཱདཱཡ ཡཱཝ ཨགྒནཁཱ། ཨེཏསྶ ཨསདྡྷམྨསྶ པཊིསེཝནཏྠཱཡ ཨུབྦྷཀྑཀཾ ཨདྷོཛཱཎུམཎྜལཾ གཧཎཾ སཱདིཡཏི, ཨཱཔཏྟི ཐུལླཙྩཡསྶཱ’’ཏི (པཱཙི॰ ༦༧༦) ཝུཏྟཏྟཱ ཨཱཧ ‘‘ཨཔཱརཱཛིཀཁེཏྟསྶཱ’’ཏིཨཱདི། ‘‘ཏ’’ནྟི ཝཀྑམཱནཏྟཱ ‘‘ཡ’’ནྟི ལབྦྷཏི། ཨཔཱརཱཛིཀཀྑེཏྟསྶ ཡསྶ ཀསྶཙི ཨངྒསྶ ཡཾ གཧཎཾ, ཏཾ ཧཏྠགྒཧཎནྟི པཝུཙྩཏཱིཏི ཡོཛནཱ། ཧཏྠེ གཧཎཾ ཧཏྠགྒཧཎཾ།
1997. ‘‘Hatthaggahaṇaṃ vā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti (pāci. 676) vuttattā āha ‘‘apārājikakhettassā’’tiādi. ‘‘Ta’’nti vakkhamānattā ‘‘ya’’nti labbhati. Apārājikakkhettassa yassa kassaci aṅgassa yaṃ gahaṇaṃ, taṃ hatthaggahaṇanti pavuccatīti yojanā. Hatthe gahaṇaṃ hatthaggahaṇaṃ.
༡༩༩༨. ཡསྶ ཀསྶཙཱིཏི ཝུཏྟཔྤཀཱརེན ཡསྶ ཀསྶཙི ཙཱིཝརསྶ ཡཾ གཧཎནྟི ཡོཛནཱ།
1998.Yassa kassacīti vuttappakārena yassa kassaci cīvarassa yaṃ gahaṇanti yojanā.
༡༩༩༩. ཨསདྡྷམྨ-སདྡེན མེཐུནསྶཱཔི ཝུཙྩམཱནཏྟཱ ཏཏོ ཝིསེསེཏུམཱཧ ‘‘ཀཱཡསཾསགྒ …པེ॰… ཀཱརཎཱ’’ཏི། བྷིཀྑུནཱི ཀཱཡསཾསགྒསངྑཱཏསྶ ཨསདྡྷམྨསྶ ཀཱརཎཱ པུརིསསྶ ཧཏྠཔཱསསྨིཾ ཏིཊྛེཡྻ ཝཱཏི ཡོཛནཱ།
1999. Asaddhamma-saddena methunassāpi vuccamānattā tato visesetumāha ‘‘kāyasaṃsagga…pe… kāraṇā’’ti. Bhikkhunī kāyasaṃsaggasaṅkhātassa asaddhammassa kāraṇā purisassa hatthapāsasmiṃ tiṭṭheyya vāti yojanā.
༢༠༠༠. ཏཏོཏི ཏསྶ ཨསདྡྷམྨསྶ ཀཱརཎཱ། ཏཏྠཱཏི ཧཏྠཔཱསེ། པུརིསེནཱཏི ཨེཏྠ ‘‘ཀཏ’’ནྟི སེསོ, ‘‘སངྐེཏ’’ནྟི ཨིམིནཱ སམྦནྡྷོ། ‘‘ཨཱགམནཾ ཨསྶཱ’’ཏི པདཙྪེདོ། ཨིཙྪེཡྻཱཏི ཝུཏྟེཔི ན གམནིཙྪཱམཏྟེན, ཨཐ ཁོ བྷིཀྑུནིཡཱ པུརིསསྶ ཧཏྠཔཱསཾ, པུརིསེན ཙ བྷིཀྑུནིཡཱ ཧཏྠཔཱསཾ ཨོཀྐནྟཀཱལེཡེཝ ཝཏྠུཔཱུརཎཾ དཊྛབྦཾ། ཡཐཱཧ ‘‘སངྐེཏཾ ཝཱ གཙྪེཡྻཱཏི ཨེཏསྶ ཨསདྡྷམྨསྶ པཊིསེཝནཏྠཱཡ པུརིསེན ‘ཨིཏྠནྣཱམཾ ཨཱགཙྪཱ’ཏི ཝུཏྟཱ གཙྪཏི, པདེ པདེ ཨཱཔཏྟི དུཀྐཊསྶ། པུརིསསྶ ཧཏྠཔཱསཾ ཨོཀྐནྟམཏྟེ ཨཱཔཏྟི ཐུལླཙྩཡསྶཱ’’ཏི (པཱཙི॰ ༦༧༦) ཙ ‘‘པུརིསསྶ ཨབྦྷཱགམནཾ སཱདིཡཏི, ཨཱཔཏྟི དུཀྐཊསྶ། ཧཏྠཔཱསཾ ཨོཀྐནྟམཏྟེ ཨཱཔཏྟི ཐུལླཙྩཡསྶཱ’’ཏི (པཱཙི॰ ༦༧༦) ཙ། ཨེཏྠ ཙ ཨིཏྠནྣཱམཾ ཨཱགཙྪཱཏི ཨིཏྠནྣཱམཾ ཋཱནཾ ཨཱགཙྪཱཏི ཨཏྠོ།
2000.Tatoti tassa asaddhammassa kāraṇā. Tatthāti hatthapāse. Purisenāti ettha ‘‘kata’’nti seso, ‘‘saṅketa’’nti iminā sambandho. ‘‘Āgamanaṃ assā’’ti padacchedo. Iccheyyāti vuttepi na gamanicchāmattena, atha kho bhikkhuniyā purisassa hatthapāsaṃ, purisena ca bhikkhuniyā hatthapāsaṃ okkantakāleyeva vatthupūraṇaṃ daṭṭhabbaṃ. Yathāha ‘‘saṅketaṃ vā gaccheyyāti etassa asaddhammassa paṭisevanatthāya purisena ‘itthannāmaṃ āgacchā’ti vuttā gacchati, pade pade āpatti dukkaṭassa. Purisassa hatthapāsaṃ okkantamatte āpatti thullaccayassā’’ti (pāci. 676) ca ‘‘purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassā’’ti (pāci. 676) ca. Ettha ca itthannāmaṃ āgacchāti itthannāmaṃ ṭhānaṃ āgacchāti attho.
༢༠༠༡. ཏདཏྠཱཡཱཏི ཏསྶེཝ ཀཱཡསཾསགྒསངྑཱཏཨསདྡྷམྨསྶ སེཝནཏྠཱཡ། པཊིཙྪནྣཊྛཱནཉྩཱཏི ཝཏྠཱདིནཱ ཡེན ཀེནཙི པཊིཙྪནྣཨོཀཱསཾ། པུརིསསྶ ཧཏྠཔཱསེ ཋིཏཱ ཏདཏྠཱཡ ཀཱཡཾ ཨུཔསཾཧརེཡྻ ཝཱཏི ཡོཛནཱ།
2001.Tadatthāyāti tasseva kāyasaṃsaggasaṅkhātaasaddhammassa sevanatthāya. Paṭicchannaṭṭhānañcāti vatthādinā yena kenaci paṭicchannaokāsaṃ. Purisassa hatthapāse ṭhitā tadatthāya kāyaṃ upasaṃhareyya vāti yojanā.
༢༠༠༢. ཧཏྠགྒཧཎཱདཱིནཾ ཝུཏྟཔྤཀཱརཱནཾ ཨཊྛནྣཾ ཝཏྠཱུནཾ པཱུརཎེན ‘‘ཨཊྛཝཏྠུཀཱ’’ཏི སངྑཱཏཱ ཨཡཾ བྷིཀྑུནཱི ཝིནཊྛཱ ཧོཏི སཱིལཝིནཱསེན, ཏཏོཡེཝ ཨསྶམཎཱི ཧོཏི ཨབྷིཀྑུནཱི ཧོཏཱིཏི ཡོཛནཱ།
2002. Hatthaggahaṇādīnaṃ vuttappakārānaṃ aṭṭhannaṃ vatthūnaṃ pūraṇena ‘‘aṭṭhavatthukā’’ti saṅkhātā ayaṃ bhikkhunī vinaṭṭhā hoti sīlavināsena, tatoyeva assamaṇī hoti abhikkhunī hotīti yojanā.
༢༠༠༣. ཨནུལོམེན ཝཱཏི ཧཏྠགྒཧཎཱདིཔཊིཔཱཊིཡཱ ཝཱ། པཊིལོམེན ཝཱཏི ཏབྦིཔརིཡཏོ པཊིལོམེན ཝཱ། ཨེཀནྟརིཀཱཡ ཝཱཏི ཨེཀམེཀཾ ཨནྟརིཏྭཱ པུན ཏསྶཱཔི ཀརཎཝསེན ཨེཀནྟརིཀཱཡ ཝཱ། ཨནུལོམེན ཝཱ པཊིལོམེན ཝཱ ཏཐེཀནྟརིཀཱཡ ཝཱ ཨཊྛམཾ ཝཏྠུཾ པརིཔཱུརེནྟཱི ཙུཏཱཏི ཡོཛནཱ།
2003.Anulomenavāti hatthaggahaṇādipaṭipāṭiyā vā. Paṭilomena vāti tabbipariyato paṭilomena vā. Ekantarikāya vāti ekamekaṃ antaritvā puna tassāpi karaṇavasena ekantarikāya vā. Anulomena vā paṭilomena vā tathekantarikāya vā aṭṭhamaṃ vatthuṃ paripūrentī cutāti yojanā.
༢༠༠༤. ཨེཏདེཝ ཨཏྠཾ བྱཏིརེཀམུཁེན སམཏྠེཏུམཱཧ ‘‘ཨཐཱདིཏོ’’ཏིཨཱདི། སཏཀྑཏྟུམྤཱིཏི བཧུཀྑཏྟུམྤི། སཏ-སདྡོ ཧེཏྠ བཧུ-སདྡཔརིཡཱཡོ། པཱརཱཛིཀཱ ནེཝ སིཡཱཏི ཡོཛནཱ, ཨིམིནཱ ཏཾཏཾཝཏྠུམཱུལཀཾ དུཀྐཊཐུལླཙྩཡཾ ཨཱཔཛྫཏཱིཏི ཝུཏྟཾ ཧོཏི།
2004. Etadeva atthaṃ byatirekamukhena samatthetumāha ‘‘athādito’’tiādi. Satakkhattumpīti bahukkhattumpi. Sata-saddo hettha bahu-saddapariyāyo. Pārājikā neva siyāti yojanā, iminā taṃtaṃvatthumūlakaṃ dukkaṭathullaccayaṃ āpajjatīti vuttaṃ hoti.
༢༠༠༥. ཡཱ པན ཨཱཔཏྟིཡོ ཨཱཔནྣཱ, དེསེཏྭཱ ཏཱཧི མུཙྩཏཱིཏི ཡོཛནཱ། དྷུརནིཀྑེཔནཾ ཀཏྭཱཏི ‘‘ན པུནེཝཾ ཀརིསྶཱམཱི’’ཏི དྷུརཾ ནིཀྑིཔིཏྭཱ། དེསིཏཱ གཎནཱུཔིཀཱཏི དེསིཏཱ དེསིཏགཎནམེཝ ཨུཔེཏི, པཱརཱཛིཀསྶ ཨངྒཾ ན ཧོཏཱིཏི ཨཏྠོ། ཏསྨཱ ཡཱ ཨེཀཾ ཨཱཔནྣཱ, དྷུརནིཀྑེཔཾ ཀཏྭཱ དེསེཏྭཱ པུན ཀིལེསཝསེན ཨཱཔཛྫཏི, པུན དེསེཏི, ཨེཝཾ ཨཊྛ ཝཏྠཱུནི པཱུརེནྟཱིཔི པཱརཱཛིཀཱ ན ཧོཏི།
2005. Yā pana āpattiyo āpannā, desetvā tāhi muccatīti yojanā. Dhuranikkhepanaṃ katvāti ‘‘na punevaṃ karissāmī’’ti dhuraṃ nikkhipitvā. Desitā gaṇanūpikāti desitā desitagaṇanameva upeti, pārājikassa aṅgaṃ na hotīti attho. Tasmā yā ekaṃ āpannā, dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti.
༢༠༠༦. སཨུསྶཱཧཱཡ དེསིཏཱཏི པུན ཨཱཔཛྫནེ ཨནིཀྑིཏྟདྷུརཱཡ བྷིཀྑུནིཡཱ དེསིཏཱཔི ཨཱཔཏྟི དེསནཱགཎནཾ ན ཨུཔེཏི། ཀིཾ ཧོཏཱིཏི ཨཱཧ ‘‘དེསིཏཱཔི ཨདེསིཏཱ’’ཏི, ཏསྨཱ པཱརཱཛིཀཱཔཏྟིཡཱ ཨངྒམེཝ ཧོཏཱིཏི ཨདྷིཔྤཱཡོ།
2006.Saussāhāya desitāti puna āpajjane anikkhittadhurāya bhikkhuniyā desitāpi āpatti desanāgaṇanaṃ na upeti. Kiṃ hotīti āha ‘‘desitāpi adesitā’’ti, tasmā pārājikāpattiyā aṅgameva hotīti adhippāyo.
༢༠༠༨. ཨཡཾ ཨཏྠོཏི ‘‘ཨསདྡྷམྨོ ནཱམ ཀཱཡསཾསགྒོ’’ཏི ཨཡཾ ཨཏྠོ། ཨུདྡིསིཏོཏི པཀཱསིཏོ།
2008.Ayaṃ atthoti ‘‘asaddhammo nāma kāyasaṃsaggo’’ti ayaṃ attho. Uddisitoti pakāsito.
༢༠༠༩. ཨཡམཏྠོ ཀེན ཝཙནེན ཨུདྡིསིཏོཏི ཨཱཧ ‘‘ཝིཉྙཱུ…པེ॰… སཱདྷཀཾ ཝཙནཾ ཨིད’’ནྟི། ཨིདཾ ཝཙནནྟི ‘‘ཝིཉྙཱུ པཊིབལོ ཀཱཡསཾསགྒཾ སམཱཔཛྫིཏུ’’ནྟི (པཱཙི॰ ༦༧༦) ཨིདཾ ཝཙནཾ། སཱདྷཀཾ པམཱཎཾ།
2009. Ayamattho kena vacanena uddisitoti āha ‘‘viññū…pe… sādhakaṃ vacanaṃ ida’’nti. Idaṃ vacananti ‘‘viññū paṭibalo kāyasaṃsaggaṃ samāpajjitu’’nti (pāci. 676) idaṃ vacanaṃ. Sādhakaṃ pamāṇaṃ.
ཨཊྛཝཏྠུཀཀཐཱཝཎྞནཱ།
Aṭṭhavatthukakathāvaṇṇanā.
༢༠༡༠. ཨཝསྶུཏཱ, ཝཛྫཔཊིཙྪཱདིཀཱ, ཨུཀྑིཏྟཱནུཝཏྟིཀཱ, ཨཊྛཝཏྠུཀཱཏི ཨིམཱ ཙཏསྶོ པཱརཱཛིཀཱཔཏྟིཡོ མཧེསིནཱ ཨསཱདྷཱརཎཱ བྷིཀྑུནཱིནམེཝ པཉྙཏྟཱཏི ཡོཛནཱ།
2010. Avassutā, vajjapaṭicchādikā, ukkhittānuvattikā, aṭṭhavatthukāti imā catasso pārājikāpattiyo mahesinā asādhāraṇā bhikkhunīnameva paññattāti yojanā.
ཨིཏི ཝིནཡཏྠསཱརསནྡཱིཔནིཡཱ
Iti vinayatthasārasandīpaniyā
ཝིནཡཝིནིཙྪཡཝཎྞནཱཡ
Vinayavinicchayavaṇṇanāya
པཱརཱཛིཀཀཐཱཝཎྞནཱ ནིཊྛིཏཱ།
Pārājikakathāvaṇṇanā niṭṭhitā.
