| Library / Tipiṭaka / තිපිටක • Tipiṭaka / පාචිත්යාදියොජනාපාළි • Pācityādiyojanāpāḷi |
(2) පාරාජිකාදිපඤ්හාවණ්ණනා
(2) Pārājikādipañhāvaṇṇanā
480. සන්ථතපෙය්යාලඤ්චාති පඨමපාරාජිකවිභඞ්ගෙ (පාරා. 65) වුත්තං සන්ථතපෙය්යාලඤ්ච.
480.Santhatapeyyālañcāti paṭhamapārājikavibhaṅge (pārā. 65) vuttaṃ santhatapeyyālañca.
ලිඞ්ගපරිවත්තං සන්ධායාති සති ලිඞ්ගෙ පරිවත්තෙ පටිග්ගහණස්ස විජහනං සන්ධාය වුත්තං.
Liṅgaparivattaṃ sandhāyāti sati liṅge parivatte paṭiggahaṇassa vijahanaṃ sandhāya vuttaṃ.
යොති භික්ඛු, පරිණාමෙතීති සම්බන්ධො. අත්තනො අත්ථායාති යොජනා.
Yoti bhikkhu, pariṇāmetīti sambandho. Attano atthāyāti yojanā.
අස්සාති ගාථාය. කාකඋහදන්ති කාකෙහි කරීසුස්සග්ගං. කද්දමමක්ඛිතන්ති කද්දමෙන මක්ඛිතං. කායගතානෙව හුත්වාති සම්බන්ධො.
Assāti gāthāya. Kākauhadanti kākehi karīsussaggaṃ. Kaddamamakkhitanti kaddamena makkhitaṃ. Kāyagatāneva hutvāti sambandho.
හීති විත්ථාරො. අනරියං තං ඉත්ථිං වා තං පුරිසං වා හනෙය්යාති යොජනා. ලිඞ්ගපරිවත්තෙන හෙතුභූතෙන ඉත්ථිභූතං, පුරිසභූතඤ්චාති සම්බන්ධො. ඉත්ථිභූතන්ති ච ඉත්ථී හුත්වා භූතං, ඉත්ථිභාවං වා පත්තං.
Hīti vitthāro. Anariyaṃ taṃ itthiṃ vā taṃ purisaṃ vā haneyyāti yojanā. Liṅgaparivattena hetubhūtena itthibhūtaṃ, purisabhūtañcāti sambandho. Itthibhūtanti ca itthī hutvā bhūtaṃ, itthibhāvaṃ vā pattaṃ.
මිගසිඞ්ගතාපසසීහකුමාරාදීනං තිරච්ඡානගතමාතාපිතරො වියාති යොජනා. මිගසිඞ්ගතාපසොති මිගසිඞ්ගනාමකො (ජා. අට්ඨ. 5.17.96 ආදයො) තාපසො. සීහකුමාරොති සීහබාහුකුමාරො. ආදිසද්දෙන භූරිදත්තාදයො සඞ්ගණ්හාති.
Migasiṅgatāpasasīhakumārādīnaṃ tiracchānagatamātāpitaro viyāti yojanā. Migasiṅgatāpasoti migasiṅganāmako (jā. aṭṭha. 5.17.96 ādayo) tāpaso. Sīhakumāroti sīhabāhukumāro. Ādisaddena bhūridattādayo saṅgaṇhāti.
කුරුන්දියං ආගතන්ති සම්බන්ධො.
Kurundiyaṃ āgatanti sambandho.
‘‘සච්චං භණන්තොති ගාථායා’’ති පදං ‘‘සච්චං භාසතො ලහුකාපත්ති හොතී’’ති එත්ථ ඉතිසද්දෙන සම්බන්ධිතබ්බං. ‘‘සච්චං භණන්තො’’ති ගාථාය ඉති අත්ථොති යොජනා.
‘‘Saccaṃ bhaṇantoti gāthāyā’’ti padaṃ ‘‘saccaṃ bhāsato lahukāpatti hotī’’ti ettha itisaddena sambandhitabbaṃ. ‘‘Saccaṃ bhaṇanto’’ti gāthāya iti atthoti yojanā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 2. පාරාජිකාදිපඤ්හා • 2. Pārājikādipañhā
අට්ඨකථා • Aṭṭhakathā / විනයපිටක (අට්ඨකථා) • Vinayapiṭaka (aṭṭhakathā) / පරිවාර-අට්ඨකථා • Parivāra-aṭṭhakathā / (2) පාරාජිකාදිපඤ්හාවණ්ණනා • (2) Pārājikādipañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්ථදීපනී-ටීකා • Sāratthadīpanī-ṭīkā / පාරාජිකාදිපඤ්හවණ්ණනා • Pārājikādipañhavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්ධි-ටීකා • Vajirabuddhi-ṭīkā / පාරාජිකාදිපඤ්හාවණ්ණනා • Pārājikādipañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාරාජිකාදිපඤ්හාවණ්ණනා • Pārājikādipañhāvaṇṇanā
