| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. পারাজিকাদিপঞ্হা
2. Pārājikādipañhā
৪৮০.
480.
ইত্থী চ অব্ভন্তরে সিযা,
Itthī ca abbhantare siyā,
ভিক্খু চ বহিদ্ধা সিযা।
Bhikkhu ca bahiddhā siyā;
ছিদ্দং তস্মিং ঘরে নত্থি।
Chiddaṃ tasmiṃ ghare natthi;
মেথুনধম্মপচ্চযা।
Methunadhammapaccayā;
কথং পারাজিকো সিযা।
Kathaṃ pārājiko siyā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
তেলং মধুং ফাণিতঞ্চাপি সপ্পিং।
Telaṃ madhuṃ phāṇitañcāpi sappiṃ;
সামং গহেত্ৰান নিক্খিপেয্য।
Sāmaṃ gahetvāna nikkhipeyya;
অৰীতিৰত্তে সত্তাহে।
Avītivatte sattāhe;
সতি পচ্চযে পরিভুঞ্জন্তস্স আপত্তি।
Sati paccaye paribhuñjantassa āpatti;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
নিস্সগ্গিযেন আপত্তি।
Nissaggiyena āpatti;
সুদ্ধকেন পাচিত্তিযং।
Suddhakena pācittiyaṃ;
আপজ্জন্তস্স একতো।
Āpajjantassa ekato;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ভিক্খূ সিযা ৰীসতিযা সমাগতা।
Bhikkhū siyā vīsatiyā samāgatā;
কম্মং করেয্যুং সমগ্গসঞ্ঞিনো।
Kammaṃ kareyyuṃ samaggasaññino;
ভিক্খু সিযা দ্ৰাদসযোজনে ঠিতো।
Bhikkhu siyā dvādasayojane ṭhito;
কম্মঞ্চ তং কুপ্পেয্য ৰগ্গপচ্চযা।
Kammañca taṃ kuppeyya vaggapaccayā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
পদৰীতিহারমত্তেন ৰাচায ভণিতেন চ।
Padavītihāramattena vācāya bhaṇitena ca;
সব্বানি গরুকানি সপ্পটিকম্মানি।
Sabbāni garukāni sappaṭikammāni;
চতুসট্ঠি আপত্তিযো আপজ্জেয্য একতো।
Catusaṭṭhi āpattiyo āpajjeyya ekato;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
নিৰত্থো অন্তরৰাসকেন।
Nivattho antaravāsakena;
দিগুণং সঙ্ঘাটিং পারুতো।
Diguṇaṃ saṅghāṭiṃ pāruto;
সব্বানি তানি নিস্সগ্গিযানি হোন্তি।
Sabbāni tāni nissaggiyāni honti;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ন চাপি ঞত্তি ন চ পন কম্মৰাচা।
Na cāpi ñatti na ca pana kammavācā;
ন চেহি ভিক্খূতি জিনো অৰোচ।
Na cehi bhikkhūti jino avoca;
সরণগমনম্পি ন তস্স অত্থি।
Saraṇagamanampi na tassa atthi;
উপসম্পদা চস্স অকুপ্পা।
Upasampadā cassa akuppā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ইত্থিং হনে ন মাতরং, পুরিসঞ্চ ন পিতরং হনে।
Itthiṃ hane na mātaraṃ, purisañca na pitaraṃ hane;
হনেয্য অনরিযং মন্দো, তেন চানন্তরং ফুসে।
Haneyya anariyaṃ mando, tena cānantaraṃ phuse;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ইত্থিং হনে চ মাতরং, পুরিসঞ্চ পিতরং হনে।
Itthiṃ hane ca mātaraṃ, purisañca pitaraṃ hane;
মাতরং পিতরং হন্ত্ৰা, ন তেনানন্তরং ফুসে।
Mātaraṃ pitaraṃ hantvā, na tenānantaraṃ phuse;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
অচোদযিত্ৰা অস্সারযিত্ৰা।
Acodayitvā assārayitvā;
অসম্মুখীভূতস্স করেয্য কম্মং।
Asammukhībhūtassa kareyya kammaṃ;
কতঞ্চ কম্মং সুকতং ভৰেয্য।
Katañca kammaṃ sukataṃ bhaveyya;
কারকো চ সঙ্ঘো অনাপত্তিকো সিযা।
Kārako ca saṅgho anāpattiko siyā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
চোদযিত্ৰা সারযিত্ৰা।
Codayitvā sārayitvā;
সম্মুখীভূতস্স করেয্য কম্মং।
Sammukhībhūtassa kareyya kammaṃ;
কতঞ্চ কম্মং অকতং ভৰেয্য।
Katañca kammaṃ akataṃ bhaveyya;
কারকো চ সঙ্ঘো সাপত্তিকো সিযা।
Kārako ca saṅgho sāpattiko siyā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ছিন্দন্তস্স আপত্তি, ছিন্দন্তস্স অনাপত্তি।
Chindantassa āpatti, chindantassa anāpatti;
ছাদেন্তস্স আপত্তি, ছাদেন্তস্স অনাপত্তি।
Chādentassa āpatti, chādentassa anāpatti;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
সচ্চং ভণন্তো গরুকং, মুসা চ লহু ভাসতো।
Saccaṃ bhaṇanto garukaṃ, musā ca lahu bhāsato;
মুসা ভণন্তো গরুকং, সচ্চঞ্চ লহু ভাসতো।
Musā bhaṇanto garukaṃ, saccañca lahu bhāsato;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (২) পারাজিকাদিপঞ্হাৰণ্ণনা • (2) Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারাজিকাদিপঞ্হৰণ্ণনা • Pārājikādipañhavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (২) পারাজিকাদিপঞ্হাৰণ্ণনা • (2) Pārājikādipañhāvaṇṇanā
