| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
९. परअभिसपनसिक्खापदवण्णना
9. Paraabhisapanasikkhāpadavaṇṇanā
मनुस्सदोभग्गेन वाति ‘‘काणा होमि, कुणी होमि, इतरा वा ईदिसा होतू’’तिआदिना मनुस्सविरूपभावेन। अत्थधम्मअनुसासनिपुरेक्खारानन्ति एत्थ अत्थपुरेक्खारायाति अट्ठकथं कथेन्तिया। धम्मपुरेक्खारायाति पाळिं वाचेन्तिया। अनुसासनिपुरेक्खारायाति ‘‘इदानिपि त्वं एदिसा, साधु विरमस्सु, नो चे विरमसि, अद्धा पुन एवरूपानि कम्मानि कत्वा निरये उप्पज्जिस्ससि, तिरच्छानयोनिया उप्पज्जिस्ससी’’ति (पाचि॰ अट्ठ॰ ८७८) एवं अनुसासनियं ठत्वा वदन्तिया।
Manussadobhaggena vāti ‘‘kāṇā homi, kuṇī homi, itarā vā īdisā hotū’’tiādinā manussavirūpabhāvena. Atthadhammaanusāsanipurekkhārānanti ettha atthapurekkhārāyāti aṭṭhakathaṃ kathentiyā. Dhammapurekkhārāyāti pāḷiṃ vācentiyā. Anusāsanipurekkhārāyāti ‘‘idānipi tvaṃ edisā, sādhu viramassu, no ce viramasi, addhā puna evarūpāni kammāni katvā niraye uppajjissasi, tiracchānayoniyā uppajjissasī’’ti (pāci. aṭṭha. 878) evaṃ anusāsaniyaṃ ṭhatvā vadantiyā.
परअभिसपनसिक्खापदवण्णना निट्ठिता।
Paraabhisapanasikkhāpadavaṇṇanā niṭṭhitā.
