| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. পাপপুঞ্ঞানং অপ্পানপ্পভাৰপঞ্হো
7. Pāpapuññānaṃ appānappabhāvapañho
৭. রাজা আহ ‘‘ভন্তে নাগসেন, কতরং নু খো বহুতরং পুঞ্ঞং ৰা অপুঞ্ঞং ৰা’’তি? ‘‘পুঞ্ঞং খো, মহারাজ , বহুতরং, অপুঞ্ঞং থোক’’ন্তি। ‘‘কেন কারণেনা’’তি? ‘‘অপুঞ্ঞং খো, মহারাজ, করোন্তো ৰিপ্পটিসারী হোতি ‘পাপকম্মং মযা কত’ন্তি, তেন পাপং ন ৰড্ঢতি। পুঞ্ঞং খো, মহারাজ, করোন্তো অৰিপ্পটিসারী হোতি, অৰিপ্পটিসারিনো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি, সমাহিতো যথাভূতং পজানাতি, তেন কারণেন পুঞ্ঞং ৰড্ঢতি। পুরিসো খো, মহারাজ, ছিন্নহত্থপাদো ভগৰতো একং উপ্পলহত্থং দত্ৰা একনৰুতিকপ্পানি ৰিনিপাতং ন গচ্ছিস্সতি। ইমিনাপি, মহারাজ, কারণেন ভণামি ‘পুঞ্ঞং বহুতরং, অপুঞ্ঞং থোক’’’ন্তি।
7. Rājā āha ‘‘bhante nāgasena, kataraṃ nu kho bahutaraṃ puññaṃ vā apuññaṃ vā’’ti? ‘‘Puññaṃ kho, mahārāja , bahutaraṃ, apuññaṃ thoka’’nti. ‘‘Kena kāraṇenā’’ti? ‘‘Apuññaṃ kho, mahārāja, karonto vippaṭisārī hoti ‘pāpakammaṃ mayā kata’nti, tena pāpaṃ na vaḍḍhati. Puññaṃ kho, mahārāja, karonto avippaṭisārī hoti, avippaṭisārino pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati, samāhito yathābhūtaṃ pajānāti, tena kāraṇena puññaṃ vaḍḍhati. Puriso kho, mahārāja, chinnahatthapādo bhagavato ekaṃ uppalahatthaṃ datvā ekanavutikappāni vinipātaṃ na gacchissati. Imināpi, mahārāja, kāraṇena bhaṇāmi ‘puññaṃ bahutaraṃ, apuññaṃ thoka’’’nti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
পাপপুঞ্ঞানং অপ্পানপ্পভাৰপঞ্হো সত্তমো।
Pāpapuññānaṃ appānappabhāvapañho sattamo.
