| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. பாபபுஞ்ஞானங் அப்பானப்பபா⁴வபஞ்ஹோ
7. Pāpapuññānaṃ appānappabhāvapañho
7. ராஜா ஆஹ ‘‘ப⁴ந்தே நாக³ஸேன, கதரங் நு கோ² ப³ஹுதரங் புஞ்ஞங் வா அபுஞ்ஞங் வா’’தி? ‘‘புஞ்ஞங் கோ², மஹாராஜ , ப³ஹுதரங், அபுஞ்ஞங் தோ²க’’ந்தி. ‘‘கேன காரணேனா’’தி? ‘‘அபுஞ்ஞங் கோ², மஹாராஜ, கரொந்தோ விப்படிஸாரீ ஹோதி ‘பாபகம்மங் மயா கத’ந்தி, தேன பாபங் ந வட்³ட⁴தி. புஞ்ஞங் கோ², மஹாராஜ, கரொந்தோ அவிப்படிஸாரீ ஹோதி, அவிப்படிஸாரினோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி, ஸமாஹிதோ யதா²பூ⁴தங் பஜானாதி, தேன காரணேன புஞ்ஞங் வட்³ட⁴தி. புரிஸோ கோ², மஹாராஜ, சி²ன்னஹத்த²பாதோ³ ப⁴க³வதோ ஏகங் உப்பலஹத்த²ங் த³த்வா ஏகனவுதிகப்பானி வினிபாதங் ந க³ச்சி²ஸ்ஸதி. இமினாபி, மஹாராஜ, காரணேன ப⁴ணாமி ‘புஞ்ஞங் ப³ஹுதரங், அபுஞ்ஞங் தோ²க’’’ந்தி.
7. Rājā āha ‘‘bhante nāgasena, kataraṃ nu kho bahutaraṃ puññaṃ vā apuññaṃ vā’’ti? ‘‘Puññaṃ kho, mahārāja , bahutaraṃ, apuññaṃ thoka’’nti. ‘‘Kena kāraṇenā’’ti? ‘‘Apuññaṃ kho, mahārāja, karonto vippaṭisārī hoti ‘pāpakammaṃ mayā kata’nti, tena pāpaṃ na vaḍḍhati. Puññaṃ kho, mahārāja, karonto avippaṭisārī hoti, avippaṭisārino pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati, samāhito yathābhūtaṃ pajānāti, tena kāraṇena puññaṃ vaḍḍhati. Puriso kho, mahārāja, chinnahatthapādo bhagavato ekaṃ uppalahatthaṃ datvā ekanavutikappāni vinipātaṃ na gacchissati. Imināpi, mahārāja, kāraṇena bhaṇāmi ‘puññaṃ bahutaraṃ, apuññaṃ thoka’’’nti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
பாபபுஞ்ஞானங் அப்பானப்பபா⁴வபஞ்ஹோ ஸத்தமோ.
Pāpapuññānaṃ appānappabhāvapañho sattamo.
