| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. पापनिवारियत्थेरअपदानं
10. Pāpanivāriyattheraapadānaṃ
४४.
44.
‘‘तिस्सस्स तु भगवतो, देवदेवस्स तादिनो।
‘‘Tissassa tu bhagavato, devadevassa tādino;
एकच्छत्तं मया दिन्नं, विप्पसन्नेन चेतसा॥
Ekacchattaṃ mayā dinnaṃ, vippasannena cetasā.
४५.
45.
‘‘निवुतं होति मे पापं, कुसलस्सुपसम्पदा।
‘‘Nivutaṃ hoti me pāpaṃ, kusalassupasampadā;
आकासे छत्तं धारेन्ति, पुब्बकम्मस्सिदं फलं॥
Ākāse chattaṃ dhārenti, pubbakammassidaṃ phalaṃ.
४६.
46.
‘‘चरिमं वत्तते मय्हं, भवा सब्बे समूहता।
‘‘Carimaṃ vattate mayhaṃ, bhavā sabbe samūhatā;
धारेमि अन्तिमं देहं, सम्मासम्बुद्धसासने॥
Dhāremi antimaṃ dehaṃ, sammāsambuddhasāsane.
४७.
47.
‘‘द्वेनवुते इतो कप्पे, यं छत्तमददिं तदा।
‘‘Dvenavute ito kappe, yaṃ chattamadadiṃ tadā;
दुग्गतिं नाभिजानामि, छत्तदानस्सिदं फलं॥
Duggatiṃ nābhijānāmi, chattadānassidaṃ phalaṃ.
४८.
48.
‘‘द्वेसत्ततिम्हितो कप्पे, अट्ठासिंसु जनाधिपा।
‘‘Dvesattatimhito kappe, aṭṭhāsiṃsu janādhipā;
महानिदाननामेन, राजानो चक्कवत्तिनो॥
Mahānidānanāmena, rājāno cakkavattino.
४९.
49.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पापनिवारियो 1 थेरो इमा गाथायो अभासित्थाति।
Itthaṃ sudaṃ āyasmā pāpanivāriyo 2 thero imā gāthāyo abhāsitthāti;
पापनिवारियत्थेरस्सापदानं दसमं।
Pāpanivāriyattherassāpadānaṃ dasamaṃ.
कणिकारपुप्फियवग्गो एकवीसतिमो।
Kaṇikārapupphiyavaggo ekavīsatimo.
तस्सुद्दानं –
Tassuddānaṃ –
कणिकारो मिनेलञ्च, किङ्कणि तरणेन च।
Kaṇikāro minelañca, kiṅkaṇi taraṇena ca;
निग्गुण्डिपुप्फी दकदो, सललो च कुरण्डको।
Nigguṇḍipupphī dakado, salalo ca kuraṇḍako;
आधारको पापवारी, अट्ठतालीस गाथकाति॥
Ādhārako pāpavārī, aṭṭhatālīsa gāthakāti.
Footnotes:
