| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৬. মক্কটকৰগ্গো
6. Makkaṭakavaggo
১. পন্থমক্কটকঙ্গপঞ্হো
1. Panthamakkaṭakaṅgapañho
১. ‘‘ভন্তে নাগসেন, ‘পন্থমক্কটকস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, পন্থমক্কটকো পন্থে মক্কটজালৰিতানং কত্ৰা যদি তত্থ জালকে লগ্গতি কিমি ৰা মক্খিকা ৰা পটঙ্গো ৰা, তং গহেত্ৰা ভক্খযতি, এৰমেৰ খো, মহারাজ, যোগিনা যোগাৰচরেন ছসু দ্ৰারেসু সতিপট্ঠানজালৰিতানং কত্ৰা যদি তত্থ কিলেসমক্খিকা বজ্ঝন্তি, তত্থেৰ ঘাতেতব্বা। ইদং, মহারাজ, পন্থমক্কটকস্স একং অঙ্গং গহেতব্বং। ভাসিতম্পেতং, মহারাজ, থেরেন অনুরুদ্ধেন –
1. ‘‘Bhante nāgasena, ‘panthamakkaṭakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, panthamakkaṭako panthe makkaṭajālavitānaṃ katvā yadi tattha jālake laggati kimi vā makkhikā vā paṭaṅgo vā, taṃ gahetvā bhakkhayati, evameva kho, mahārāja, yoginā yogāvacarena chasu dvāresu satipaṭṭhānajālavitānaṃ katvā yadi tattha kilesamakkhikā bajjhanti, tattheva ghātetabbā. Idaṃ, mahārāja, panthamakkaṭakassa ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘চিত্তং নিযমে ছসু দ্ৰারেসু, সতিপট্ঠানৰরুত্তমে।
‘‘‘Cittaṃ niyame chasu dvāresu, satipaṭṭhānavaruttame;
কিলেসা তত্থ লগ্গা চে, হন্তব্বা তে ৰিপস্সিনা’’’তি॥
Kilesā tattha laggā ce, hantabbā te vipassinā’’’ti.
পন্থমক্কটকঙ্গপঞ্হো পঠমো।
Panthamakkaṭakaṅgapañho paṭhamo.
