| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
15. பஞ்ஞாலக்க²ணபஞ்ஹோ
15. Paññālakkhaṇapañho
15. ராஜா ஆஹ ‘‘ப⁴ந்தே நாக³ஸேன, கிங்லக்க²ணா பஞ்ஞா’’தி? ‘‘புப்³பே³வ கோ², மஹாராஜ, மயா வுத்தங் ‘சே²த³னலக்க²ணா பஞ்ஞா’தி, அபி ச ஓபா⁴ஸனலக்க²ணா பஞ்ஞா’’தி. ‘‘கத²ங், ப⁴ந்தே, ஓபா⁴ஸனலக்க²ணா பஞ்ஞா’’தி? ‘‘பஞ்ஞா, மஹாராஜ, உப்பஜ்ஜமானா அவிஜ்ஜந்த⁴காரங் வித⁴மேதி, விஜ்ஜோபா⁴ஸங் ஜனேதி, ஞாணாலோகங் வித³ங்ஸேதி, அரியஸச்சானி பாகடானி கரோதி. ததோ யோகா³வசரோ ‘அனிச்ச’ந்தி வா ‘து³க்க²’ந்தி வா ‘அனத்தா’தி வா ஸம்மப்பஞ்ஞாய பஸ்ஸதீ’’தி.
15. Rājā āha ‘‘bhante nāgasena, kiṃlakkhaṇā paññā’’ti? ‘‘Pubbeva kho, mahārāja, mayā vuttaṃ ‘chedanalakkhaṇā paññā’ti, api ca obhāsanalakkhaṇā paññā’’ti. ‘‘Kathaṃ, bhante, obhāsanalakkhaṇā paññā’’ti? ‘‘Paññā, mahārāja, uppajjamānā avijjandhakāraṃ vidhameti, vijjobhāsaṃ janeti, ñāṇālokaṃ vidaṃseti, ariyasaccāni pākaṭāni karoti. Tato yogāvacaro ‘anicca’nti vā ‘dukkha’nti vā ‘anattā’ti vā sammappaññāya passatī’’ti.
‘‘ஓபம்மங் கரோஹீ’’தி. ‘‘யதா², மஹாராஜ, புரிஸோ அந்த⁴காரே கே³ஹே பதீ³பங் பவேஸெய்ய, பவிட்டோ² பதீ³போ அந்த⁴காரங் வித⁴மேதி, ஓபா⁴ஸங் ஜனேதி, ஆலோகங் வித³ங்ஸேதி, ரூபானி பாகடானி கரோதி. ஏவமேவ கோ², மஹாராஜ, பஞ்ஞா உப்பஜ்ஜமானா அவிஜ்ஜந்த⁴காரங் வித⁴மேதி, விஜ்ஜோபா⁴ஸங் ஜனேதி, ஞாணாலோகங் வித³ங்ஸேதி, அரியஸச்சானி பாகடானி கரோதி. ததோ யோகா³வசரோ ‘அனிச்ச’ந்தி வா ‘து³க்க²’ந்தி வா ‘அனத்தா’தி வா ஸம்மப்பஞ்ஞாய பஸ்ஸதி. ஏவங் கோ², மஹாராஜ, ஓபா⁴ஸனலக்க²ணா பஞ்ஞா’’தி.
‘‘Opammaṃ karohī’’ti. ‘‘Yathā, mahārāja, puriso andhakāre gehe padīpaṃ paveseyya, paviṭṭho padīpo andhakāraṃ vidhameti, obhāsaṃ janeti, ālokaṃ vidaṃseti, rūpāni pākaṭāni karoti. Evameva kho, mahārāja, paññā uppajjamānā avijjandhakāraṃ vidhameti, vijjobhāsaṃ janeti, ñāṇālokaṃ vidaṃseti, ariyasaccāni pākaṭāni karoti. Tato yogāvacaro ‘anicca’nti vā ‘dukkha’nti vā ‘anattā’ti vā sammappaññāya passati. Evaṃ kho, mahārāja, obhāsanalakkhaṇā paññā’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
பஞ்ஞாலக்க²ணபஞ்ஹோ பன்னரஸமோ.
Paññālakkhaṇapañho pannarasamo.
