| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. ပဉ္ဟပုစ္ဆာသုတ္တံ
5. Pañhapucchāsuttaṃ
၁၆၅. တတ္ရ ခော အာယသ္မာ သာရိပုတ္တော ဘိက္ခူ အာမန္တေသိ။ပေ.။ ‘‘ယော ဟိ ကောစိ, အာဝုသော, ပရံ ပဉ္ဟံ ပုစ္ဆတိ, သဗ္ဗော သော ပဉ္စဟိ ဌာနေဟိ, ဧတေသံ ဝာ အညတရေန။ ကတမေဟိ ပဉ္စဟိ? မန္ဒတ္တာ မောမူဟတ္တာ 1 ပရံ ပဉ္ဟံ ပုစ္ဆတိ, ပာပိစ္ဆော ဣစ္ဆာပကတော ပရံ ပဉ္ဟံ ပုစ္ဆတိ, ပရိဘဝံ ပရံ ပဉ္ဟံ ပုစ္ဆတိ, အညာတုကာမော ပရံ ပဉ္ဟံ ပုစ္ဆတိ, အထ ဝာ ပနေဝံစိတ္တော 2 ပရံ ပဉ္ဟံ ပုစ္ဆတိ – ‘သစေ မေ ပဉ္ဟံ ပုဋ္ဌော သမ္မဒေဝ ဗ္ယာကရိသ္သတိ ဣစ္စေတံ ကုသလံ, နော စေ 3 မေ ပဉ္ဟံ ပုဋ္ဌော သမ္မဒေဝ ဗ္ယာကရိသ္သတိ အဟမသ္သ သမ္မဒေဝ ဗ္ယာကရိသ္သာမီ’တိ။ ယော ဟိ ကောစိ, အာဝုသော, ပရံ ပဉ္ဟံ ပုစ္ဆတိ, သဗ္ဗော သော ဣမေဟိ ပဉ္စဟိ ဌာနေဟိ, ဧတေသံ ဝာ အညတရေန။ အဟံ ခော ပနာဝုသော, ဧဝံစိတ္တော ပရံ ပဉ္ဟံ ပုစ္ဆာမိ – ‘သစေ မေ ပဉ္ဟံ ပုဋ္ဌော သမ္မဒေဝ ဗ္ယာကရိသ္သတိ ဣစ္စေတံ ကုသလံ, နော စေ မေ ပဉ္ဟံ ပုဋ္ဌော သမ္မဒေဝ ဗ္ယာကရိသ္သတိ, အဟမသ္သ သမ္မဒေဝ ဗ္ယာကရိသ္သာမီ’’တိ။ ပဉ္စမံ။
165. Tatra kho āyasmā sāriputto bhikkhū āmantesi…pe… ‘‘yo hi koci, āvuso, paraṃ pañhaṃ pucchati, sabbo so pañcahi ṭhānehi, etesaṃ vā aññatarena. Katamehi pañcahi? Mandattā momūhattā 4 paraṃ pañhaṃ pucchati, pāpiccho icchāpakato paraṃ pañhaṃ pucchati, paribhavaṃ paraṃ pañhaṃ pucchati, aññātukāmo paraṃ pañhaṃ pucchati, atha vā panevaṃcitto 5 paraṃ pañhaṃ pucchati – ‘sace me pañhaṃ puṭṭho sammadeva byākarissati iccetaṃ kusalaṃ, no ce 6 me pañhaṃ puṭṭho sammadeva byākarissati ahamassa sammadeva byākarissāmī’ti. Yo hi koci, āvuso, paraṃ pañhaṃ pucchati, sabbo so imehi pañcahi ṭhānehi, etesaṃ vā aññatarena. Ahaṃ kho panāvuso, evaṃcitto paraṃ pañhaṃ pucchāmi – ‘sace me pañhaṃ puṭṭho sammadeva byākarissati iccetaṃ kusalaṃ, no ce me pañhaṃ puṭṭho sammadeva byākarissati, ahamassa sammadeva byākarissāmī’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. ပဉ္ဟပုစ္ဆာသုတ္တဝဏ္ဏနာ • 5. Pañhapucchāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၅. ပဌမအာဃာတပဋိဝိနယသုတ္တာဒိဝဏ္ဏနာ • 1-5. Paṭhamaāghātapaṭivinayasuttādivaṇṇanā
