| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. པཉྩཱཡཏནཀམྨནིབྦཏྟཔཉྷོ
3. Pañcāyatanakammanibbattapañho
༣. རཱཛཱ ཨཱཧ ‘‘བྷནྟེ ནཱགསེན, ཡཱནིམཱནི པཉྩཱཡཏནཱནི, ཀིཾ ནུ ཏཱནི ནཱནཱཀམྨེཧི ནིབྦཏྟཱནི, ཨུདཱཧུ ཨེཀེན ཀམྨེནཱ’’ཏི? ‘‘ནཱནཱཀམྨེཧི, མཧཱརཱཛ, ནིབྦཏྟཱནི, ན ཨེཀེན ཀམྨེནཱ’’ཏི།
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘ཨོཔམྨཾ ཀརོཧཱི’’ཏི། ‘‘ཏཾ ཀིཾ མཉྙསི, མཧཱརཱཛ, ཨེཀསྨིཾ ཁེཏྟེ ནཱནཱབཱིཛཱནི ཝཔྤེཡྻུཾ , ཏེསཾ ནཱནཱབཱིཛཱནཾ ནཱནཱཕལཱནི ནིབྦཏྟེཡྻུ’’ནྟི? ‘‘ཨཱམ, བྷནྟེ, ནིབྦཏྟེཡྻུ’’ནྟི། ‘‘ཨེཝམེཝ ཁོ, མཧཱརཱཛ, ཡཱནི ཡཱནི པཉྩཱཡཏནཱནི, ཏཱནི ཏཱནི ནཱནཱཀམྨེཧི ནིབྦཏྟཱནི, ན ཨེཀེན ཀམྨེནཱ’’ཏི།
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
པཉྩཱཡཏནཀམྨནིབྦཏྟཔཉྷོ ཏཏིཡོ།
Pañcāyatanakammanibbattapañho tatiyo.
