| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૩. પઞ્ચાયતનકમ્મનિબ્બત્તપઞ્હો
3. Pañcāyatanakammanibbattapañho
૩. રાજા આહ ‘‘ભન્તે નાગસેન, યાનિમાનિ પઞ્ચાયતનાનિ, કિં નુ તાનિ નાનાકમ્મેહિ નિબ્બત્તાનિ, ઉદાહુ એકેન કમ્મેના’’તિ? ‘‘નાનાકમ્મેહિ, મહારાજ, નિબ્બત્તાનિ, ન એકેન કમ્મેના’’તિ.
3. Rājā āha ‘‘bhante nāgasena, yānimāni pañcāyatanāni, kiṃ nu tāni nānākammehi nibbattāni, udāhu ekena kammenā’’ti? ‘‘Nānākammehi, mahārāja, nibbattāni, na ekena kammenā’’ti.
‘‘ઓપમ્મં કરોહી’’તિ. ‘‘તં કિં મઞ્ઞસિ, મહારાજ, એકસ્મિં ખેત્તે નાનાબીજાનિ વપ્પેય્યું , તેસં નાનાબીજાનં નાનાફલાનિ નિબ્બત્તેય્યુ’’ન્તિ? ‘‘આમ, ભન્તે, નિબ્બત્તેય્યુ’’ન્તિ. ‘‘એવમેવ ખો, મહારાજ, યાનિ યાનિ પઞ્ચાયતનાનિ, તાનિ તાનિ નાનાકમ્મેહિ નિબ્બત્તાનિ, ન એકેન કમ્મેના’’તિ.
‘‘Opammaṃ karohī’’ti. ‘‘Taṃ kiṃ maññasi, mahārāja, ekasmiṃ khette nānābījāni vappeyyuṃ , tesaṃ nānābījānaṃ nānāphalāni nibbatteyyu’’nti? ‘‘Āma, bhante, nibbatteyyu’’nti. ‘‘Evameva kho, mahārāja, yāni yāni pañcāyatanāni, tāni tāni nānākammehi nibbattāni, na ekena kammenā’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
પઞ્ચાયતનકમ્મનિબ્બત્તપઞ્હો તતિયો.
Pañcāyatanakammanibbattapañho tatiyo.
