| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
ပဉ္စဝီသတိအဝဟာရကထာဝဏ္ဏနာ
Pañcavīsatiavahārakathāvaṇṇanā
ပဉ္စဝီသတိ အဝဟာရာ နာမ ဝစနဘေဒေနေဝ ဘိန္နာ, အတ္ထတော ပန အဘိန္နာ။ အာကုလာ ဒုဝိညေယ္ယဝိနိစ္ဆယာတိ အာစရိယာနံ မုခေ သန္တိကေ သဗ္ဗာကာရေန အဂ္ဂဟိတဝိနိစ္ဆယာနံ ဒုဝိညေယ္ယာ။ ဒုကတိကပဋ္ဌာနပာဠိ (ပဋ္ဌာ. ၅.၁.၁ အာဒယော, ဒုကတိကပဋ္ဌာနပာဠိ) ဝိယ အာကုလာ ဒုဝိညေယ္ယဝိနိစ္ဆယာ, ကေဝလံ တံ အာစရိယာ ပုဗ္ဗာပရဝိရောဓမကတ္ဝာ သင္ဂီတိတော ပဋ္ဌာယ အာဂတနယမဝိနာသေတ္ဝာ ဝဏ္ဏယန္တီတိ ‘‘ပဋ္ဌာနပာဠိမိဝာတိ အပရေ ဝဒန္တီ’’တိ စ ဝုတ္တာ။ ပောရာဏာတိ သင္ဂီတိအာစရိယာ။ အယမေတ္ထ သာမီစိ ဧဝ, သစေ န ဒေတိ, အာပတ္တိ နတ္ထိ, ပာရာဇိကဘယာ ပန ယထာ သိက္ခာကာမော ဒေတိ, ဧဝံ ဒာတဗ္ဗမေဝ။ ယာနိ ပနေတ္ထ ဝတ္ထူနိ, တာနိ သီဟဠဒီပေ အာစရိယေဟိ သင္ဃာဒီနမနုမတိယာ အဋ္ဌကထာသု ပက္ခိတ္တာနိ, ‘‘အနာဂတေ ဗ္ရဟ္မစာရီနံ ဟိတတ္ထာယ ပောတ္ထကာရုဠ္ဟကာလတော ပစ္ဆာပီ’’တိ ဝုတ္တံ။ အာဏတ္တိကံ အာဏတ္တိက္ခဏေပိ ဂဏ္ဟာတိ, ကာလန္တရေနာပိ အတ္ထသာဓကော, ကာလန္တရံ သန္ဓာယာတိ ဣဒမေတေသံ နာနတ္တံ။ ဘဋ္ဌေတိ အပဂတေ။ အန္တရသမုဒ္ဒေ အတုရုမုဟုဒေ။ ဖရတိ သာဓေတိ။ နဝဓောတောတိ နဝကတော။ ပာသာဏသက္ခရန္တိ ပာသာဏဉ္စ သက္ခရဉ္စ။
Pañcavīsati avahārā nāma vacanabhedeneva bhinnā, atthato pana abhinnā. Ākulā duviññeyyavinicchayāti ācariyānaṃ mukhe santike sabbākārena aggahitavinicchayānaṃ duviññeyyā. Dukatikapaṭṭhānapāḷi (paṭṭhā. 5.1.1 ādayo, dukatikapaṭṭhānapāḷi) viya ākulā duviññeyyavinicchayā, kevalaṃ taṃ ācariyā pubbāparavirodhamakatvā saṅgītito paṭṭhāya āgatanayamavināsetvā vaṇṇayantīti ‘‘paṭṭhānapāḷimivāti apare vadantī’’ti ca vuttā. Porāṇāti saṅgītiācariyā. Ayamettha sāmīci eva, sace na deti, āpatti natthi, pārājikabhayā pana yathā sikkhākāmo deti, evaṃ dātabbameva. Yāni panettha vatthūni, tāni sīhaḷadīpe ācariyehi saṅghādīnamanumatiyā aṭṭhakathāsu pakkhittāni, ‘‘anāgate brahmacārīnaṃ hitatthāya potthakāruḷhakālato pacchāpī’’ti vuttaṃ. Āṇattikaṃ āṇattikkhaṇepi gaṇhāti, kālantarenāpi atthasādhako, kālantaraṃ sandhāyāti idametesaṃ nānattaṃ. Bhaṭṭheti apagate. Antarasamudde aturumuhude. Pharati sādheti. Navadhototi navakato. Pāsāṇasakkharanti pāsāṇañca sakkharañca.
