5. Pañcahatthiyattheraapadānaṃ

77.

‘‘Sumedho nāma sambuddho, gacchate antarāpaṇe;

Okkhittacakkhu ² mitabhāṇī, satimā saṃvutindriyo.

78.

‘‘Pañca uppalahatthāni, āveḷatthaṃ ahaṃsu me;

Tena buddhaṃ apūjesiṃ, pasanno sehi pāṇibhi.

79.

‘‘Āropitā ca te pupphā, chadanaṃ assu satthuno;

Samādhiṃsu ⁴ mahānāgaṃ, sissā ācariyaṃ yathā.

80.

‘‘Tiṃsakappasahassamhi , yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

81.

‘‘Ito vīsakappasate, ahesuṃ pañca khattiyā;

Hatthiyā nāma nāmena, cakkavattī mahabbalā.

82.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pañcahatthiyo thero imā gāthāyo abhāsitthāti.

Pañcahatthiyattherassāpadānaṃ pañcamaṃ.