| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೭. ಪಞ್ಚದೀಪಕತ್ಥೇರಅಪದಾನವಣ್ಣನಾ
7. Pañcadīpakattheraapadānavaṇṇanā
ಪದುಮುತ್ತರಬುದ್ಧಸ್ಸಾತಿಆದಿಕಂ ಆಯಸ್ಮತೋ ಪಞ್ಚದೀಪಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಉಪ್ಪನ್ನುಪ್ಪನ್ನಭವೇಸು ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಘರಾವಾಸೇ ವಸನ್ತೋ ಭಗವತೋ ಧಮ್ಮಂ ಸುತ್ವಾ ಸಮ್ಮಾದಿಟ್ಠಿಯಂ ಪತಿಟ್ಠಿತೋ ಸದ್ಧೋ ಪಸನ್ನೋ ಮಹಾಜನೇಹಿ ಬೋಧಿಪೂಜಂ ಕಯಿರಮಾನಂ ದಿಸ್ವಾ ಸಯಮ್ಪಿ ಬೋಧಿಂ ಪರಿವಾರೇತ್ವಾ ದೀಪಂ ಜಾಲೇತ್ವಾ ಪೂಜೇಸಿ। ಸೋ ತೇನ ಪುಞ್ಞಕಮ್ಮೇನ ದೇವಮನುಸ್ಸೇಸು ಸಂಸರನ್ತೋ ಚಕ್ಕವತ್ತಿಸಮ್ಪತ್ತಿಆದಯೋ ಅನುಭವಿತ್ವಾ ಸಬ್ಬತ್ಥೇವ ಉಪ್ಪನ್ನಭವೇ ಜಲಮಾನೋ ಜೋತಿಸಮ್ಪನ್ನವಿಮಾನಾದೀಸು ವಸಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ವಿಭವಸಮ್ಪನ್ನೇ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಸದ್ಧಾಜಾತೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ, ದೀಪಪೂಜಾನಿಸ್ಸನ್ದೇನ ದೀಪಕತ್ಥೇರೋತಿ ಪಾಕಟೋ।
Padumuttarabuddhassātiādikaṃ āyasmato pañcadīpakattherassa apadānaṃ. Ayampi purimabuddhesu katādhikāro uppannuppannabhavesu vivaṭṭūpanissayāni puññāni upacinanto padumuttarassa bhagavato kāle kulagehe nibbatto vuddhimanvāya gharāvāse vasanto bhagavato dhammaṃ sutvā sammādiṭṭhiyaṃ patiṭṭhito saddho pasanno mahājanehi bodhipūjaṃ kayiramānaṃ disvā sayampi bodhiṃ parivāretvā dīpaṃ jāletvā pūjesi. So tena puññakammena devamanussesu saṃsaranto cakkavattisampattiādayo anubhavitvā sabbattheva uppannabhave jalamāno jotisampannavimānādīsu vasitvā imasmiṃ buddhuppāde ekasmiṃ vibhavasampanne kulagehe nibbatto vuddhippatto saddhājāto pabbajitvā nacirasseva arahā ahosi, dīpapūjānissandena dīpakattheroti pākaṭo.
೫೦. ಸೋ ಏಕದಿವಸಂ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮುತ್ತರಬುದ್ಧಸ್ಸಾತಿಆದಿಮಾಹ। ತಂ ವುತ್ತತ್ಥಮೇವ। ಉಜುದಿಟ್ಠಿ ಅಹೋಸಹನ್ತಿ ವಙ್ಕಂ ಮಿಚ್ಛಾದಿಟ್ಠಿಂ ಛಡ್ಡೇತ್ವಾ ಉಜು ಅವಙ್ಕಂ ನಿಬ್ಬಾನಾಭಿಮುಖಂ ಪಾಪುಣನಸಮ್ಮಾದಿಟ್ಠಿ ಅಹೋಸಿನ್ತಿ ಅತ್ಥೋ।
50. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Ujudiṭṭhi ahosahanti vaṅkaṃ micchādiṭṭhiṃ chaḍḍetvā uju avaṅkaṃ nibbānābhimukhaṃ pāpuṇanasammādiṭṭhi ahosinti attho.
೫೧. ಪದೀಪದಾನಂ ಪಾದಾಸಿನ್ತಿ ಏತ್ಥ ಪಕಾರೇನ ದಿಬ್ಬತಿ ಜೋತತೀತಿ ಪದೀಪೋ, ತಸ್ಸ ದಾನಂ ಪದೀಪದಾನಂ, ತಂ ಅದಾಸಿಂ ಪದೀಪಪೂಜಂ ಅಕಾಸಿನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
51.Padīpadānaṃ pādāsinti ettha pakārena dibbati jotatīti padīpo, tassa dānaṃ padīpadānaṃ, taṃ adāsiṃ padīpapūjaṃ akāsinti attho. Sesaṃ sabbattha uttānatthamevāti.
ಪಞ್ಚದೀಪಕತ್ಥೇರಅಪದಾನವಣ್ಣನಾ ಸಮತ್ತಾ।
Pañcadīpakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೭. ಪಞ್ಚದೀಪಕತ್ಥೇರಅಪದಾನಂ • 7. Pañcadīpakattheraapadānaṃ
