7. Pañcadīpakattheraapadānaṃ

50.

‘‘Padumuttarabuddhassa, sabbabhūtānukampino;

Saddahitvāna ² saddhamme, ujudiṭṭhi ahosahaṃ.

51.

‘‘Padīpadānaṃ pādāsiṃ, parivāretvāna bodhiyaṃ;

Saddahanto padīpāni, akariṃ tāvade ahaṃ.

52.

‘‘Yaṃ yaṃ yonupapajjāmi, devattaṃ atha mānusaṃ;

Ākāse ukkaṃ dhārenti, dīpadānassidaṃ phalaṃ.

53.

‘‘Tirokuṭṭaṃ tiroselaṃ, samatiggayha pabbataṃ;

Samantā yojanasataṃ, dassanaṃ anubhomahaṃ.

54.

‘‘Tena kammāvasesena, pattomhi āsavakkhayaṃ;

Dhāremi antimaṃ dehaṃ, dvipadindassa sāsane.

55.

‘‘Catuttiṃse kappasate, satacakkhusanāmakā;

Rājāhesuṃ mahātejā, cakkavattī mahabbalā.

56.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pañcadīpako thero imā gāthāyo abhāsitthāti.

Pañcadīpakattherassāpadānaṃ sattamaṃ.