| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பாணகதா²வண்ணனா
Pāṇakathāvaṇṇanā
114. பாணகதா²யங் திரச்சா²னக³தஸ்ஸ ஏகந்தேன பாத³க்³க⁴னகதா ந ஸம்ப⁴வதீதி ஆஹ – ‘‘ஏகங்ஸேன அவஹாரகப்பஹோனகபாணங் த³ஸ்ஸெந்தோ’’தி. பு⁴ஜிஸ்ஸங் ஹரந்தஸ்ஸ அவஹாரோ நத்தீ²தி பரபரிக்³க³ஹிதாபா⁴வதோ. பு⁴ஜிஸ்ஸோதி அதா³ஸோ. ஆட²பிதோதி மாதாபிதூஹி இணங் க³ண்ஹந்தேஹி ‘‘யாவ இணதா³னா அயங் தும்ஹாகங் ஸந்திகே ஹோதூ’’தி இணதா³யகானங் நிய்யாதிதோ. யஸ்மா மாதாபிதரோ தா³ஸானங் விய புத்தானங் ந ஸாமினோ. யேஸஞ்ச ஸந்திகே ஆட²பிதோ, தேபி தஸ்ஸ ஹத்த²கம்மே ஸாமினோ, ந தஸ்ஸாதி ஆஹ ‘‘அவஹாரோ நத்தீ²’’தி. த⁴னங் பன க³தட்டா²னே வட்³ட⁴தீதி எத்த² ‘‘ஆட²பெத்வா க³ஹிதத⁴னங் வட்³டி⁴யா ஸஹ அவஹாரகஸ்ஸ கீ³வா’’தி தீஸுபி க³ண்டி²பதே³ஸு வுத்தங்.
114. Pāṇakathāyaṃ tiracchānagatassa ekantena pādagghanakatā na sambhavatīti āha – ‘‘ekaṃsena avahārakappahonakapāṇaṃ dassento’’ti. Bhujissaṃ harantassa avahāro natthīti parapariggahitābhāvato. Bhujissoti adāso. Āṭhapitoti mātāpitūhi iṇaṃ gaṇhantehi ‘‘yāva iṇadānā ayaṃ tumhākaṃ santike hotū’’ti iṇadāyakānaṃ niyyātito. Yasmā mātāpitaro dāsānaṃ viya puttānaṃ na sāmino. Yesañca santike āṭhapito, tepi tassa hatthakamme sāmino, na tassāti āha ‘‘avahāro natthī’’ti. Dhanaṃ pana gataṭṭhāne vaḍḍhatīti ettha ‘‘āṭhapetvā gahitadhanaṃ vaḍḍhiyā saha avahārakassa gīvā’’ti tīsupi gaṇṭhipadesu vuttaṃ.
அந்தோஜாத…பே॰… அவஹாரோ ஹோதீதி எத்த² பதே³ஸசாரித்தவஸேன அத்தனாவ அத்தானங் நிய்யாதெத்வா தா³ஸப்³யங் உபக³தங் அவஹரந்தஸ்ஸபி பாராஜிகமேவாதி வேதி³தப்³ப³ங். கே³ஹதா³ஸியா குச்சி²ம்ஹி தா³ஸஸ்ஸ ஜாதோதி ஏவம்பி ஸம்ப⁴வதீதி ஸம்ப⁴வந்தங் க³ஹெத்வா வுத்தங். கே³ஹதா³ஸியா குச்சி²ஸ்மிங் பன அஞ்ஞஸ்ஸ ஜாதோபி எத்தே²வ ஸங்க³ஹிதோ. கரமரானீதோ நாம ப³ந்த⁴கா³ஹக³ஹிதோ. தேனாஹ ‘‘பரதே³ஸதோ பஹரித்வா’’திஆதி³. தத்த² பரதே³ஸதோ பஹரித்வாதி பரதே³ஸங் விலும்பகேஹி ராஜராஜமஹாமத்தாதீ³ஹி மஹாசோரேஹி பரதே³ஸதோ பஹரித்வா. அனாபத்தி பாராஜிகஸ்ஸாதி யதி³ தஸ்ஸ வசனேன ததோ அதி⁴கங் வேக³ங் ந வட்³டே⁴தி, அனாபத்தி. பரியாயேனாதி பரியாயவசனேன. மனுஸ்ஸவிக்³க³ஹே ‘‘மரணவண்ணங் வா ஸங்வண்ணெய்யா’’தி வுத்தத்தா பரியாயகதா²யபி ந முச்சதி, இத⁴ பன ‘‘அதி³ன்னங் தெ²ய்யஸங்கா²தங் ஆதி³யெய்யா’’தி ஆதா³னஸ்ஸேவ வுத்தத்தா பரியாயகதா²ய முச்சதி.
Antojāta…pe… avahāro hotīti ettha padesacārittavasena attanāva attānaṃ niyyātetvā dāsabyaṃ upagataṃ avaharantassapi pārājikamevāti veditabbaṃ. Gehadāsiyā kucchimhi dāsassa jātoti evampi sambhavatīti sambhavantaṃ gahetvā vuttaṃ. Gehadāsiyā kucchismiṃ pana aññassa jātopi ettheva saṅgahito. Karamarānīto nāma bandhagāhagahito. Tenāha ‘‘paradesato paharitvā’’tiādi. Tattha paradesato paharitvāti paradesaṃ vilumpakehi rājarājamahāmattādīhi mahācorehi paradesato paharitvā. Anāpatti pārājikassāti yadi tassa vacanena tato adhikaṃ vegaṃ na vaḍḍheti, anāpatti. Pariyāyenāti pariyāyavacanena. Manussaviggahe ‘‘maraṇavaṇṇaṃ vā saṃvaṇṇeyyā’’ti vuttattā pariyāyakathāyapi na muccati, idha pana ‘‘adinnaṃ theyyasaṅkhātaṃ ādiyeyyā’’ti ādānasseva vuttattā pariyāyakathāya muccati.
பாணகதா²வண்ணனா நிட்டி²தா.
Pāṇakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாணகதா²வண்ணனா • Pāṇakathāvaṇṇanā
