| Library / Tipiṭaka / ติปิฎก • Tipiṭaka / วิมานวตฺถุปาฬิ • Vimānavatthupāḷi |
๓. ปลฺลงฺกวิมานวตฺถุ
3. Pallaṅkavimānavatthu
๓๐๗.
307.
‘‘ปลฺลงฺกเสเฎฺฐ มณิโสณฺณจิเตฺต, ปุปฺผาภิกิเณฺณ สยเน อุฬาเร;
‘‘Pallaṅkaseṭṭhe maṇisoṇṇacitte, pupphābhikiṇṇe sayane uḷāre;
ตตฺถจฺฉสิ เทวิ มหานุภาเว, อุจฺจาวจา อิทฺธิ วิกุพฺพมานาฯ
Tatthacchasi devi mahānubhāve, uccāvacā iddhi vikubbamānā.
๓๐๘.
308.
‘‘อิมา จ เต อจฺฉราโย สมนฺตโต, นจฺจนฺติ คายนฺติ ปโมทยนฺติ;
‘‘Imā ca te accharāyo samantato, naccanti gāyanti pamodayanti;
เทวิทฺธิปตฺตาสิ มหานุภาเว, มนุสฺสภูตา กิมกาสิ ปุญฺญํ;
Deviddhipattāsi mahānubhāve, manussabhūtā kimakāsi puññaṃ;
เกนาสิ เอวํ ชลิตานุภาวา, วโณฺณ จ เต สพฺพทิสา ปภาสตี’’ติฯ
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
๓๐๙.
309.
‘‘อหํ มนุเสฺสสุ มนุสฺสภูตา, อเฑฺฒ กุเล สุณิสา อโหสิํ;
‘‘Ahaṃ manussesu manussabhūtā, aḍḍhe kule suṇisā ahosiṃ;
อโกฺกธนา ภตฺตุวสานุวตฺตินี, อุโปสเถ อปฺปมตฺตา อโหสิํ 1ฯ
Akkodhanā bhattuvasānuvattinī, uposathe appamattā ahosiṃ 2.
๓๑๐.
310.
‘‘มนุสฺสภูตา ทหรา อปาปิกา 3, ปสนฺนจิตฺตา ปติมาภิราธยิํ;
‘‘Manussabhūtā daharā apāpikā 4, pasannacittā patimābhirādhayiṃ;
ทิวา จ รโตฺต จ มนาปจารินี, อหํ ปุเร สีลวตี อโหสิํฯ
Divā ca ratto ca manāpacārinī, ahaṃ pure sīlavatī ahosiṃ.
๓๑๑.
311.
‘‘ปาณาติปาตา วิรตา อโจริกา, สํสุทฺธกายา สุจิพฺรหฺมจารินี;
‘‘Pāṇātipātā viratā acorikā, saṃsuddhakāyā sucibrahmacārinī;
อมชฺชปา โน จ มุสา อภาณิํ, สิกฺขาปเทสุ ปริปูรการินีฯ
Amajjapā no ca musā abhāṇiṃ, sikkhāpadesu paripūrakārinī.
๓๑๒.
312.
‘‘จาตุทฺทสิํ ปญฺจทสิํ, ยา จ ปกฺขสฺส อฎฺฐมี;
‘‘Cātuddasiṃ pañcadasiṃ, yā ca pakkhassa aṭṭhamī;
๓๑๓.
313.
‘‘อฎฺฐงฺคุเปตํ อนุธมฺมจารินี, อุโปสถํ ปีติมนา อุปาวสิํ;
‘‘Aṭṭhaṅgupetaṃ anudhammacārinī, uposathaṃ pītimanā upāvasiṃ;
อิมญฺจ อริยํ อฎฺฐงฺควเรหุเปตํ, สมาทิยิตฺวา กุสลํ สุขุทฺรยํ;
Imañca ariyaṃ aṭṭhaṅgavarehupetaṃ, samādiyitvā kusalaṃ sukhudrayaṃ;
ปติมฺหิ กลฺยาณี วสานุวตฺตินี, อโหสิํ ปุเพฺพ สุคตสฺส สาวิกาฯ
Patimhi kalyāṇī vasānuvattinī, ahosiṃ pubbe sugatassa sāvikā.
๓๑๔.
314.
‘‘เอตาทิสํ กุสลํ ชีวโลเก, กมฺมํ กริตฺวาน วิเสสภาคินี;
‘‘Etādisaṃ kusalaṃ jīvaloke, kammaṃ karitvāna visesabhāginī;
กายสฺส เภทา อภิสมฺปรายํ, เทวิทฺธิปตฺตา สุคติมฺหิ อาคตาฯ
Kāyassa bhedā abhisamparāyaṃ, deviddhipattā sugatimhi āgatā.
๓๑๕.
315.
‘‘วิมานปาสาทวเร มโนรเม, ปริวาริตา อจฺฉราสงฺคเณน;
‘‘Vimānapāsādavare manorame, parivāritā accharāsaṅgaṇena;
สยํปภา เทวคณา รเมนฺติ มํ, ทีฆายุกิํ เทววิมานมาคต’’นฺติ;
Sayaṃpabhā devagaṇā ramenti maṃ, dīghāyukiṃ devavimānamāgata’’nti;
ปลฺลงฺกวิมานํ ตติยํฯ
Pallaṅkavimānaṃ tatiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / วิมานวตฺถุ-อฎฺฐกถา • Vimānavatthu-aṭṭhakathā / ๓. ปลฺลงฺกวิมานวณฺณนา • 3. Pallaṅkavimānavaṇṇanā
