| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. पल्लङ्कदायकत्थेरअपदानं
10. Pallaṅkadāyakattheraapadānaṃ
४८.
48.
‘‘सुमेधस्स भगवतो, लोकजेट्ठस्स तादिनो।
‘‘Sumedhassa bhagavato, lokajeṭṭhassa tādino;
पल्लङ्को हि मया दिन्नो, सउत्तरसपच्छदो॥
Pallaṅko hi mayā dinno, sauttarasapacchado.
४९.
49.
‘‘सत्तरतनसम्पन्नो , पल्लङ्को आसि सो तदा।
‘‘Sattaratanasampanno , pallaṅko āsi so tadā;
मम सङ्कप्पमञ्ञाय, निब्बत्तति सदा मम॥
Mama saṅkappamaññāya, nibbattati sadā mama.
५०.
50.
‘‘तिंसकप्पसहस्सम्हि, पल्लङ्कमददिं तदा।
‘‘Tiṃsakappasahassamhi, pallaṅkamadadiṃ tadā;
दुग्गतिं नाभिजानामि, पल्लङ्कस्स इदं फलं॥
Duggatiṃ nābhijānāmi, pallaṅkassa idaṃ phalaṃ.
५१.
51.
‘‘वीसकप्पसहस्सम्हि, सुवण्णाभा तयो जना।
‘‘Vīsakappasahassamhi, suvaṇṇābhā tayo janā;
सत्तरतनसम्पन्ना, चक्कवत्ती महब्बला॥
Sattaratanasampannā, cakkavattī mahabbalā.
५२.
52.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पल्लङ्कदायको थेरो इमा गाथायो अभासित्थाति।
Itthaṃ sudaṃ āyasmā pallaṅkadāyako thero imā gāthāyo abhāsitthāti.
पल्लङ्कदायकत्थेरस्सापदानं दसमं।
Pallaṅkadāyakattherassāpadānaṃ dasamaṃ.
छत्तवग्गो पन्नरसमो।
Chattavaggo pannarasamo.
तस्सुद्दानं –
Tassuddānaṃ –
छत्तं थम्भो च वेदि च, परिवारुमपुप्फियो।
Chattaṃ thambho ca vedi ca, parivārumapupphiyo;
अनुलेपो च मग्गो च, फलको च वटंसको।
Anulepo ca maggo ca, phalako ca vaṭaṃsako;
पल्लङ्कदायी च गाथायो, छप्पञ्ञास पकित्तिताति॥
Pallaṅkadāyī ca gāthāyo, chappaññāsa pakittitāti.
