| Library / Tipiṭaka / ਤਿਪਿਟਕ • Tipiṭaka / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi |
ਪਕ੍ਖਿਕਭਤ੍ਤਾਦਿਕਥਾ
Pakkhikabhattādikathā
ਯਨ੍ਤਿ ਭਤ੍ਤਂ ਦਿਯ੍ਯਤੀਤਿ ਸਮ੍ਬਨ੍ਧੋ। ਚਾਤੁਦ੍ਦਸੀਪਞ੍ਚਦ੍ਦਸੀਪਞ੍ਚਮੀਅਟ੍ਠਮੀਤਿ ਅਭਿਲਕ੍ਖਿਤੇਸੂਤਿ ਯੋਜਨਾ। ਕਮ੍ਮਪ੍ਪਸੁਤੇਹੀਤਿ ਕਮ੍ਮੂਪਚਯੇਹਿ। ਇਮੇਹਿ ਪਾਠੇਹਿ ਪਕ੍ਖੇਸੁ ਦਾਤਬ੍ਬਂ ਪਕ੍ਖਿਕਨ੍ਤਿ વਚਨਤ੍ਥਂ ਦਸ੍ਸੇਤਿ। ਤਨ੍ਤਿ ਪਕ੍ਖਿਕਭਤ੍ਤਂ। ‘‘ਹੋਤੀ’’ਤਿ ਪਦੇ વੁਤ੍ਤਕਤ੍ਤਾ, ‘‘ਗਾਹੇਤ੍વਾ’’ਤਿ ਪਦੇ ਧਾਤੁਕਮ੍ਮਂ, ‘‘ਭੁਞ੍ਜਿਤਬ੍ਬ’’ਨ੍ਤਿ ਪਦੇ વੁਤ੍ਤਕਮ੍ਮਂ। ਸਬ੍ਬੇਸਨ੍ਤਿ ਭਿਕ੍ਖੂਨਂ। ਯੇਸਨ੍ਤਿ ਭਿਕ੍ਖੂਨਂ। ਮਨ੍ਦਾਤਿ ਅਪ੍ਪਾ। ਤਨ੍ਤਿ ਸਲਾਕਭਤ੍ਤਂ। ਪਣੀਤਂ ਦੇਨ੍ਤੀਤਿ ਪਣੀਤਂ ਕਤ੍વਾ ਦੇਨ੍ਤਿ। ਲੂਖਭਤ੍ਤਨ੍ਤਿ ਅਸਿਨਿਦ੍ਧਭਤ੍ਤਂ।
Yanti bhattaṃ diyyatīti sambandho. Cātuddasīpañcaddasīpañcamīaṭṭhamīti abhilakkhitesūti yojanā. Kammappasutehīti kammūpacayehi. Imehi pāṭhehi pakkhesu dātabbaṃ pakkhikanti vacanatthaṃ dasseti. Tanti pakkhikabhattaṃ. ‘‘Hotī’’ti pade vuttakattā, ‘‘gāhetvā’’ti pade dhātukammaṃ, ‘‘bhuñjitabba’’nti pade vuttakammaṃ. Sabbesanti bhikkhūnaṃ. Yesanti bhikkhūnaṃ. Mandāti appā. Tanti salākabhattaṃ. Paṇītaṃ dentīti paṇītaṃ katvā denti. Lūkhabhattanti asiniddhabhattaṃ.
ਯਂ ਭਤ੍ਤਂ ਅਤ੍ਤਨਾ ਭੁਞ੍ਜਤਿ, ਤਦੇવ ਦਿਯ੍ਯਤੀਤਿ ਯੋਜਨਾ। ਇਮਿਨਾ ਉਪੋਸਥੇ ਦਾਤਬ੍ਬਂ ਉਪੋਸਥਿਕਨ੍ਤਿ વਚਨਤ੍ਥਂ ਦਸ੍ਸੇਤਿ। ਉਪੋਸਥੇਤਿ ਉਪੋਸਥਦਿવਸੇ। ਏਤ੍ਥ ਚ ਪਞ੍ਚਦ੍ਦਸਿਯਂ ਸਚੇ ਦਾਯਕਾ ‘‘ਪਕ੍ਖਿਕ’’ਨ੍ਤਿ વਤ੍વਾ ਦੇਨ੍ਤਿ, ਪਕ੍ਖਿਕਂ ਨਾਮ। ਅਥ ‘‘ਉਪੋਸਥਿਕ’’ਨ੍ਤਿ વਤ੍વਾ ਦੇਨ੍ਤਿ, ਉਪੋਸਥਿਕਂ ਨਾਮਾਤਿ વਿਸੇਸੋ। ਪਾਟਿਪਦੇਤਿ ਪਾਟਿਪਦਦਿવਸੇ। ਉਪੋਸਥਕਮ੍ਮੇਨਾਤਿ ਉਪੋਸਥਕਮ੍ਮੇਨ ਹੇਤੁਭੂਤੇਨ। ‘‘ਪਾਟਿਪਦੇ ਦਿਯ੍ਯਨਕਦਾਨ’’ਨ੍ਤਿ ਇਮਿਨਾ ਪਾਟਿਪਦੇ ਦਾਤਬ੍ਬਂ ਪਾਟਿਪਦਿਕਨ੍ਤਿ વਚਨਤ੍ਥਂ ਦਸ੍ਸੇਤਿ। ਤਮ੍ਪਿ ਉਭਯਨ੍ਤਿ ਉਪੋਸਥਿਕਪਾਟਿਪਦਿਕવਸੇਨ ਉਭਯਮ੍ਪਿ ਤਂ ਭਤ੍ਤਂ। ਇਤਿ ਇਮਾਨੀਤਿ ਏਤ੍ਥ ਇਮਸਦ੍ਦੇਨ ਇਤਿਸਦ੍ਦਸ੍ਸ ਇਮਸਦ੍ਦਤ੍ਥਭਾવੋ ਦਸ੍ਸਿਤੋ ਹੋਤਿ। ਸਤ੍ਤਪਿ ਭਤ੍ਤਾਨੀਤਿ ਇਮਸ੍ਮਿਂ ਸੇਨਾਸਨਕ੍ਖਨ੍ਧਕੇ ਆਗਤਾਨਿ ਸਙ੍ਘਭਤ੍ਤਾਦੀਨਿ ਸਤ੍ਤਪਿ ਭਤ੍ਤਾਨਿ।
Yaṃ bhattaṃ attanā bhuñjati, tadeva diyyatīti yojanā. Iminā uposathe dātabbaṃ uposathikanti vacanatthaṃ dasseti. Uposatheti uposathadivase. Ettha ca pañcaddasiyaṃ sace dāyakā ‘‘pakkhika’’nti vatvā denti, pakkhikaṃ nāma. Atha ‘‘uposathika’’nti vatvā denti, uposathikaṃ nāmāti viseso. Pāṭipadeti pāṭipadadivase. Uposathakammenāti uposathakammena hetubhūtena. ‘‘Pāṭipade diyyanakadāna’’nti iminā pāṭipade dātabbaṃ pāṭipadikanti vacanatthaṃ dasseti. Tampi ubhayanti uposathikapāṭipadikavasena ubhayampi taṃ bhattaṃ. Iti imānīti ettha imasaddena itisaddassa imasaddatthabhāvo dassito hoti. Sattapi bhattānīti imasmiṃ senāsanakkhandhake āgatāni saṅghabhattādīni sattapi bhattāni.
ਅਪਰਾਨਿਪਿ ਚਤ੍ਤਾਰਿ ਭਤ੍ਤਾਨੀਤਿ ਸਮ੍ਬਨ੍ਧੋ। ਤਤ੍ਥਾਤਿ ਚਤੂਸੁ ਭਤ੍ਤੇਸੁ। ‘‘ਆਗਨ੍ਤੁਕਾਨਂ ਦਿਨ੍ਨ’’ਨ੍ਤਿਆਦਿਨਾ ਆਗਨ੍ਤੁਕਭਤ੍ਤਨ੍ਤਿ ਪਦਸ੍ਸ ਚਤੁਤ੍ਥੀਮਜ੍ਝੇਲੋਪਸਮਾਸਂ ਦਸ੍ਸੇਤਿ। ਅਞ੍ਞਤ੍ਥ ਪਨ ‘‘ਆਗਨ੍ਤੁਕਸ੍ਸ ਅਤ੍ਥਾਯ ਆਭਤ’’ਨ੍ਤਿਆਦਿਨਾ ਛਟ੍ਠੀਮਜ੍ਝੇਲੋਪਸਮਾਸਂ ਦਸ੍ਸੇਤਿ। ਏਤ੍ਥਾਤਿ ਚਤੂਸੁ ਭਤ੍ਤੇਸੁ। ਸਬ੍ਬੇਸਨ੍ਤਿ ਭਿਕ੍ਖੂਨਂ। ਏਕੋ ਆਗਨ੍ਤੁਕੋ ਨਿਸੀਦਤੀਤਿ ਸਮ੍ਬਨ੍ਧੋ। ਤੇਨਾਤਿ ਪਠਮਆਗਨ੍ਤੁਕੇਨ।
Aparānipi cattāri bhattānīti sambandho. Tatthāti catūsu bhattesu. ‘‘Āgantukānaṃ dinna’’ntiādinā āgantukabhattanti padassa catutthīmajjhelopasamāsaṃ dasseti. Aññattha pana ‘‘āgantukassa atthāya ābhata’’ntiādinā chaṭṭhīmajjhelopasamāsaṃ dasseti. Etthāti catūsu bhattesu. Sabbesanti bhikkhūnaṃ. Eko āgantuko nisīdatīti sambandho. Tenāti paṭhamaāgantukena.
ਯੋਤਿ ਆਗਨ੍ਤੁਕੋ। ਆਗਨ੍ਤ੍વਾਪੀਤਿ ਪਿਸਦ੍ਦੋ ਗਰਹਤ੍ਥੋ, ਪਚ੍ਛਾ ਪਨ ਪਗੇવਾਤਿ ਅਤ੍ਥੋ। ਤੇਨ ਗਣ੍ਹਿਤਬ੍ਬਨ੍ਤਿ ਯੋਜਨਾ। ‘‘ਆਗਤਦਿવਸੇਯੇવਾ’’ਤਿ ਇਮਿਨਾ ਨ ਦੁਤਿਯਦਿવਸਾਦੀਸੁ ਭੁਞ੍ਜਿਤਬ੍ਬਨ੍ਤਿ ਦਸ੍ਸੇਤਿ।
Yoti āgantuko. Āgantvāpīti pisaddo garahattho, pacchā pana pagevāti attho. Tena gaṇhitabbanti yojanā. ‘‘Āgatadivaseyevā’’ti iminā na dutiyadivasādīsu bhuñjitabbanti dasseti.
ਕਤ੍ਥਚੀਤਿ ਕਿਞ੍ਚਿ ਠਾਨਂ। ਤਨ੍ਤਿ ਆਗਨ੍ਤੁਕਭਤ੍ਤਂ। ਨਿਬਨ੍ਧਾਪਿਤਨ੍ਤਿ ਨਿਚ੍ਚਂ ਠਪਿਤਂ। ਅਸਨਸਾਲਾਯਨ੍ਤਿ ਅਨ੍ਤੋਗਾਮੇ ਅਸਨਸਾਲਾਯਂ। ਅਸਤੀਤਿ ਅਸਨ੍ਤੇਸੁ।
Katthacīti kiñci ṭhānaṃ. Tanti āgantukabhattaṃ. Nibandhāpitanti niccaṃ ṭhapitaṃ. Asanasālāyanti antogāme asanasālāyaṃ. Asatīti asantesu.
ਆવਾਸਿਕੋਪੀਤਿ ਪਿਸਦ੍ਦੋ ਨ ਗਮਿਕੋਯੇવਾਤਿ ਦਸ੍ਸੇਤਿ। ਯਥਾ ਆਗਨ੍ਤੁਕਭਤ੍ਤਂ ਦ੍વੇ વਾ ਤੀਣਿ વਾ ਸਤ੍ਤ વਾ ਦਿવਸਾਨਿ ਲਬ੍ਭਤਿ, ਏવਂ ਇਦਂ ਗਮਿਯਭਤ੍ਤਂ ਨ ਲਬ੍ਭਤੀਤਿ ਯੋਜਨਾ। ਪਨ੍ਥਨ੍ਤਿ ਮਗ੍ਗਂ। ਰੁਨ੍ਧਨ੍ਤੀਤਿ ਪਿਦਹਨ੍ਤਿ। ਉਦਕਂ વਾ ਰੁਨ੍ਧਤੀਤਿ ਸਮ੍ਬਨ੍ਧੋ। ਏਤੇ ਉਪਦ੍ਦવੇਤਿ ਚੋਰਾਦਯੋ ਏਤੇ ਉਪਦ੍ਦવੇ। ਓਡ੍ਡੇਤ੍વਾਤਿ ਠਪੇਤ੍વਾ।
Āvāsikopīti pisaddo na gamikoyevāti dasseti. Yathā āgantukabhattaṃ dve vā tīṇi vā satta vā divasāni labbhati, evaṃ idaṃ gamiyabhattaṃ na labbhatīti yojanā. Panthanti maggaṃ. Rundhantīti pidahanti. Udakaṃ vā rundhatīti sambandho. Ete upaddaveti corādayo ete upaddave. Oḍḍetvāti ṭhapetvā.
ਏਤਸ੍ਸਾਤਿ ਮਹਾਗਿਲਾਨਸ੍ਸ। ਪੁਨ ਏਤਸ੍ਸਾਤਿ ਅਨਾਗਤਸ੍ਸ ਮਹਾਗਿਲਾਨਸ੍ਸ। ਸਪ੍ਪਾਯਭੋਜਨਨ੍ਤਿ ਗਿਲਾਨਾਨਂ ਸਪ੍ਪਾਯਭੋਜਨਂ। ਮਿਸ੍ਸਕਯਾਗੁਨ੍ਤਿ ਨਾਨਾਤਣ੍ਡੁਲੇ ਮਿਸ੍ਸੇਤ੍વਾ ਪਚਿਤਂ ਯਾਗੁਂ। ਨ ਕੁਪ੍ਪਤੀਤਿ ਨ વਿਕਾਰਂ ਕਰੋਤਿ।
Etassāti mahāgilānassa. Puna etassāti anāgatassa mahāgilānassa. Sappāyabhojananti gilānānaṃ sappāyabhojanaṃ. Missakayāgunti nānātaṇḍule missetvā pacitaṃ yāguṃ. Na kuppatīti na vikāraṃ karoti.
ਇਦਮ੍ਪੀਤਿ ਗਿਲਾਨੁਪਟ੍ਠਾਕਭਤ੍ਤਮ੍ਪਿ। ਤਤ੍ਥਾਤਿ ਤਸ੍ਮਿਂ ਕੁਲੇ। ਅਸ੍ਸਾਤਿ ਗਿਲਾਨਸ੍ਸ। ਏવਂ ਦਿਨ੍ਨਾਨੀਤਿ ਏવਂ વਕ੍ਖਮਾਨਨਯੇਨ ਦਿਨ੍ਨਾਨਿ ਹੋਨ੍ਤਿ। ਪਿਣ੍ਡਪਾਤਿਕਾਨਮ੍ਪਿ વਟ੍ਟਤੀਤਿ ‘‘ਭਿਕ੍ਖ’’ਨ੍ਤਿ ਕਪ੍ਪਿਯવੋਹਾਰੇਨ વੁਤ੍ਤਤ੍ਤਾ ਪਿਣ੍ਡਪਾਤਿਕਾਨਮ੍ਪਿ વਟ੍ਟਤਿ। ਨ વਟ੍ਟਤੀਤਿ ‘‘ਭਤ੍ਤ’’ਨ੍ਤਿ ਅਕਪ੍ਪਿਯવੋਹਾਰੇਨ વੁਤ੍ਤਤ੍ਤਾ ਨ વਟ੍ਟਤਿ।
Idampīti gilānupaṭṭhākabhattampi. Tatthāti tasmiṃ kule. Assāti gilānassa. Evaṃ dinnānīti evaṃ vakkhamānanayena dinnāni honti. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Na vaṭṭatīti ‘‘bhatta’’nti akappiyavohārena vuttattā na vaṭṭati.
ਅਪਰਾਨਿਪਿ ਤੀਣਿ ਭਤ੍ਤਾਨੀਤਿ ਸਮ੍ਬਨ੍ਧੋ। ਤਤ੍ਥਾਤਿ ਤੀਸੁ ਭਤ੍ਤੇਸੁ। ਧੁਰਭਤ੍ਤਨ੍ਤਿ ਏਤ੍ਥ ਧੁਰਸਦ੍ਦਸ੍ਸ ਧੁવਸਦ੍ਦੇਨ ਅਤ੍ਥਤੋ ਸਦਿਸਤ੍ਤਾ ਨਿਚ੍ਚਤ੍ਥੋਤਿ ਆਹ ‘‘ਨਿਚ੍ਚਭਤ੍ਤਂ વੁਚ੍ਚਤੀ’’ਤਿ। ਤਨ੍ਤਿ ਧੁਰਭਤ੍ਤਂ। ਤਤ੍ਥਾਤਿ ਦੁવਿਧੇਸੁ। ‘‘ਸਙ੍ਘਿਕੇ’’ਤਿ ਪਾਠਸੇਸੋ ਯੋਜੇਤਬ੍ਬੋ। ਪੁਗ੍ਗਲਿਕੇਪੀਤਿ ਪਿਸਦ੍ਦੋ ‘‘ਸਙ੍ਘਿਕੇ’’ਤਿ ਪਦਂ ਅਪੇਕ੍ਖਤਿ। ਪਚ੍ਛਾਤਿ ਪਠਮਂ ‘‘ਭਿਕ੍ਖਂ ਗਣ੍ਹਥਾ’’ਤਿ વੁਤ੍ਤવਚਨਤੋ, વੁਤ੍ਤવਚਨਸ੍ਸ વਾ ਪਰਂ।
Aparānipi tīṇi bhattānīti sambandho. Tatthāti tīsu bhattesu. Dhurabhattanti ettha dhurasaddassa dhuvasaddena atthato sadisattā niccatthoti āha ‘‘niccabhattaṃ vuccatī’’ti. Tanti dhurabhattaṃ. Tatthāti duvidhesu. ‘‘Saṅghike’’ti pāṭhaseso yojetabbo. Puggalikepīti pisaddo ‘‘saṅghike’’ti padaṃ apekkhati. Pacchāti paṭhamaṃ ‘‘bhikkhaṃ gaṇhathā’’ti vuttavacanato, vuttavacanassa vā paraṃ.
ਕੁਟਿਂ ਕਤ੍વਾ ਦਾਤਬ੍ਬਂ ਭਤ੍ਤਂ ਕੁਟਿਭਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਕੁਟਿਭਤ੍ਤਂ ਨਾਮਾ’’ਤਿਆਦਿ। ਯਨ੍ਤਿ ਭਤ੍ਤਂ, ਨਿਬਨ੍ਧਾਪਿਤਨ੍ਤਿ ਸਮ੍ਬਨ੍ਧੋ, ਸੇਨਾਸਨવਾਸਿਨੋ ਭਿਕ੍ਖੂਤਿ ਸਮ੍ਬਨ੍ਧੋ। ਯਂ ਪਨਾਤਿ ਭਤ੍ਤਂ ਪਨ, ਦਿਨ੍ਨਨ੍ਤਿ ਸਮ੍ਬਨ੍ਧੋ। ਤਸ੍ਸੇવਾਤਿ ਪੁਗ੍ਗਲਸ੍ਸੇવ। ਤਸ੍ਮਿਨ੍ਤਿ ਪੁਗ੍ਗਲੇ।
Kuṭiṃ katvā dātabbaṃ bhattaṃ kuṭibhattanti dassento āha ‘‘kuṭibhattaṃ nāmā’’tiādi. Yanti bhattaṃ, nibandhāpitanti sambandho, senāsanavāsino bhikkhūti sambandho. Yaṃ panāti bhattaṃ pana, dinnanti sambandho. Tassevāti puggalasseva. Tasminti puggale.
વਾਰੇਨ , વਾਰਂ ਗਹੇਤ੍વਾ વਾ ਦਿਨ੍ਨਂ ਭਤ੍ਤਂ વਾਰਭਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘વਾਰਭਤ੍ਤਂ ਨਾਮਾ’’ਤਿਆਦਿ। ਤਮ੍ਪੀਤਿ વਾਰਭਤ੍ਤਮ੍ਪਿ। ਨਿਗਮਨવਸੇਨ ਸਮ੍ਪਿਣ੍ਡੇਤ੍વਾ ਦਸ੍ਸੇਨ੍ਤੋ ਆਹ ‘‘ਇਤਿ ਇਮਾਨਿ ਚਾ’’ਤਿਆਦਿ।
Vārena , vāraṃ gahetvā vā dinnaṃ bhattaṃ vārabhattanti dassento āha ‘‘vārabhattaṃ nāmā’’tiādi. Tampīti vārabhattampi. Nigamanavasena sampiṇḍetvā dassento āha ‘‘iti imāni cā’’tiādi.
ਅਟ੍ਠਕਥਾਯਨ੍ਤਿ ਮਹਾਅਟ੍ਠਕਥਾਯਂ, વੁਤ੍ਤਾਨੀਤਿ ਸਮ੍ਬਨ੍ਧੋ। ਤਤ੍ਥਾਤਿ ਚਤੂਸੁ ਭਤ੍ਤੇਸੁ। વਿਹਾਰੇ ਉਪ੍ਪਨ੍ਨਂ ਭਤ੍ਤਂ વਿਹਾਰਭਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘વਿਹਾਰਭਤ੍ਤਂ ਨਾਮਾ’’ਤਿਆਦਿ। ਤਤ੍ਰੁਪ੍ਪਾਦਭਤ੍ਤਨ੍ਤਿ ਤਸ੍ਮਿਂ વਿਹਾਰੇ ਦਿਨ੍ਨਖੇਤ੍ਤવਤ੍ਥੁਆਦੀਹਿ ਉਪ੍ਪਾਦਭਤ੍ਤਂ। ਤਨ੍ਤਿ વਿਹਾਰਭਤ੍ਤਂ। ਯਥਾਤਿ ਯੇਨਾਕਾਰੇਨ, ਪਟਿਗ੍ਗਹਿਯਮਾਨੇਤਿ ਸਮ੍ਬਨ੍ਧੋ। ਅਟ੍ਠਨ੍ਨਂ ਸਮੂਹੋ, ਅਟ੍ਠ ਪਰਿਮਾਣਾਨਿ ਯਸ੍ਸਾਤਿ વਾ ਅਟ੍ਠਕੋ, ਤਸ੍ਸ ਦਿਨ੍ਨਂ ਭਤ੍ਤਂ ਅਟ੍ਠਕਭਤ੍ਤਂ। ਏવਂ ਚਤੁਕ੍ਕਭਤ੍ਤਨ੍ਤਿ ਏਤ੍ਥਾਪਿ। ਤਮੇવਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਟ੍ਠਨ੍ਨਂ ਭਿਕ੍ਖੂਨਂ ਦੇਮਾ’’ਤਿਆਦਿ। ਮਹਾਭਿਸਙ੍ਖਾਰਿਕੇਨਾਤਿ ਸਬ੍ਬਿਨੋਨੀਤਾਦੀਹਿ ਮਹਨ੍ਤੋ ਅਭਿਸਙ੍ਖਾਰੋ ਮਹਾਭਿਸਙ੍ਖਾਰੋ, ਸੋ ਏਤਸ੍ਸ ਅਤ੍ਥੀਤਿ ਮਹਾਭਿਸਙ੍ਖਾਰਿਕੋ, ਤੇਨ ਅਤਿਰਸਕਪੂવੇਨ ਪਤ੍ਤੇ ਪਕ੍ਖਿਪਿਤ੍વਾਤਿ ਸਮ੍ਬਨ੍ਧੋ। ‘‘ਥਕੇਤ੍વਾ ਦਿਨ੍ਨ’’ਨ੍ਤਿ ਇਮਿਨਾ ਗੂਹਿਤ੍વਾ ਦਾਤਬ੍ਬਂ ਗੁਲ਼੍ਹਕਂ, ਤਮੇવ ਭਤ੍ਤਂ ਗੁਲ਼੍ਹਕਭਤ੍ਤਨ੍ਤਿ વਚਨਤ੍ਥਂ ਦਸ੍ਸੇਤਿ।
Aṭṭhakathāyanti mahāaṭṭhakathāyaṃ, vuttānīti sambandho. Tatthāti catūsu bhattesu. Vihāre uppannaṃ bhattaṃ vihārabhattanti dassento āha ‘‘vihārabhattaṃ nāmā’’tiādi. Tatruppādabhattanti tasmiṃ vihāre dinnakhettavatthuādīhi uppādabhattaṃ. Tanti vihārabhattaṃ. Yathāti yenākārena, paṭiggahiyamāneti sambandho. Aṭṭhannaṃ samūho, aṭṭha parimāṇāni yassāti vā aṭṭhako, tassa dinnaṃ bhattaṃ aṭṭhakabhattaṃ. Evaṃ catukkabhattanti etthāpi. Tamevatthaṃ dassento āha ‘‘aṭṭhannaṃ bhikkhūnaṃ demā’’tiādi. Mahābhisaṅkhārikenāti sabbinonītādīhi mahanto abhisaṅkhāro mahābhisaṅkhāro, so etassa atthīti mahābhisaṅkhāriko, tena atirasakapūvena patte pakkhipitvāti sambandho. ‘‘Thaketvā dinna’’nti iminā gūhitvā dātabbaṃ guḷhakaṃ, tameva bhattaṃ guḷhakabhattanti vacanatthaṃ dasseti.
ਇਧਾਤਿ ਇਮਸ੍ਮਿਂ ਲੋਕੇ। ਏਕਚ੍ਚੇ ਮਨੁਸ੍ਸਾ ਦੇਨ੍ਤੀਤਿ ਸਮ੍ਬਨ੍ਧੋ। ‘‘ਭਿਕ੍ਖੁਪਰਿਚ੍ਛੇਦਜਾਨਨਤ੍ਥਂ ਗੁਲ਼ਕੇ ਦੇਨ੍ਤੀ’’ਤਿ ਇਮਿਨਾ ਗੁਲ਼ਕੇਨ ਭਿਕ੍ਖੂ ਗਣੇਤ੍વਾ ਦਾਤਬ੍ਬਂ ਭਤ੍ਤਂ ਗੁਲ਼ਕਭਤ੍ਤਨ੍ਤਿ વਚਨਤ੍ਥਂ ਦਸ੍ਸੇਤਿ। ਏਤ੍ਥ ਚ ਪੁਰਿਮਨਯੇ ਲ਼ਕਾਰੇ ਹਕਾਰਸਂਯੋਗੋ ਅਤ੍ਥਿ, ਪਚ੍ਛਿਮਨਯੇ ਨਤ੍ਥੀਤਿ ਦਟ੍ਠਬ੍ਬਂ। ਗੁਲ਼ਪਿਣ੍ਡਗਣਨਾਯ ਭਿਕ੍ਖੁਗਣਨਂ ਜਾਨਾਤਿ। ਇਤੀਤਿਆਦਿ ਨਿਗਮਨਂ। ਚੀવਰਭਾਜਨੀਯਂ વੁਤ੍ਤਨ੍ਤਿ ਸਮ੍ਬਨ੍ਧੋ।
Idhāti imasmiṃ loke. Ekacce manussā dentīti sambandho. ‘‘Bhikkhuparicchedajānanatthaṃ guḷake dentī’’ti iminā guḷakena bhikkhū gaṇetvā dātabbaṃ bhattaṃ guḷakabhattanti vacanatthaṃ dasseti. Ettha ca purimanaye ḷakāre hakārasaṃyogo atthi, pacchimanaye natthīti daṭṭhabbaṃ. Guḷapiṇḍagaṇanāya bhikkhugaṇanaṃ jānāti. Itītiādi nigamanaṃ. Cīvarabhājanīyaṃ vuttanti sambandho.
ਸਬ੍ਬਿਆਦੀਸੁ ਭੇਸਜ੍ਜੇਸੂਤਿ ਨਿਦ੍ਧਾਰਣੇ ਭੁਮ੍ਮਂ, ‘‘ਸਬ੍ਬਿਸ੍ਸਾ’’ਤਿ ਪਦਂ ‘‘ਕੁਮ੍ਭਸਤਮ੍ਪੀ’’ਤਿ ਪਦੇ ਨਿਸ੍ਸਿਤਸਮ੍ਬਨ੍ਧੋ।
Sabbiādīsu bhesajjesūti niddhāraṇe bhummaṃ, ‘‘sabbissā’’ti padaṃ ‘‘kumbhasatampī’’ti pade nissitasambandho.
ਪਚ੍ਛਾ ਆਗਤਾਨਂ ਦਾਤਬ੍ਬਮੇવਾਤਿ ਦੁਤਿਯਭਾਗੇ ਅਦਾਤਬ੍ਬੇਯੇવ ਪਚ੍ਛਾ ਆਗਤਾਨਂ ਦਾਤਬ੍ਬਮੇવ। ਸਬ੍ਬਸਨ੍ਨਿਪਾਤਟ੍ਠਾਨੇਯੇવਾਤਿ ਸਬ੍ਬੇਸਂ ਭਿਕ੍ਖੂਨਂ ਸਨ੍ਨਿਪਾਤਟ੍ਠਾਨੇવ। ਭਾਜਨੀਯਭਣ੍ਡਂ ਨਾਮ ਭਾਜਨਟ੍ਠਾਨਂ ਸਮ੍ਪਤ੍ਤਸ੍ਸੇવ ਪਾਪੁਣਾਤਿ, ਨ ਅਸਮ੍ਪਤ੍ਤਸ੍ਸ। ਸਬ੍ਬਸਨ੍ਨਿਪਾਤਟ੍ਠਾਨੇ ਚ ਯੇਭੁਯ੍ਯੇਨ ਸਮ੍ਪਤ੍ਤੋ ਹੋਤਿ, ਤੇਨ વੁਤ੍ਤਂ ‘‘ਸਬ੍ਬਸਨ੍ਨਿਪਾਤਟ੍ਠਾਨੇਯੇવਾ’’ਤਿ।
Pacchāāgatānaṃ dātabbamevāti dutiyabhāge adātabbeyeva pacchā āgatānaṃ dātabbameva. Sabbasannipātaṭṭhāneyevāti sabbesaṃ bhikkhūnaṃ sannipātaṭṭhāneva. Bhājanīyabhaṇḍaṃ nāma bhājanaṭṭhānaṃ sampattasseva pāpuṇāti, na asampattassa. Sabbasannipātaṭṭhāne ca yebhuyyena sampatto hoti, tena vuttaṃ ‘‘sabbasannipātaṭṭhāneyevā’’ti.
ਯਥਾਠਿਤਂਯੇવਾਤਿ ਕਿਞ੍ਚਿ ਅਭਾਜੇਤ੍વਾ ਯਥਾਠਿਤਂਯੇવ। ‘‘ਦੁਗ੍ਗਹਿਤ’’ਨ੍ਤਿ વਤ੍વਾ ਤਦਤ੍ਥਂ ਦਸ੍ਸੇਨ੍ਤੋ ਆਹ ‘‘ਤਂ ਗਤਗਤਟ੍ਠਾਨੇ ਸਙ੍ਘਿਕਮੇવ ਹੋਤੀ’’ਤਿ। ਆવਜ੍ਜੇਤ੍વਾਤਿ ਪਰਿਣਾਮੇਤ੍વਾ। ਤਮ੍ਪੀਤਿ ਥਾਲਕੇ ਪਕ੍ਖਿਤ੍ਤਂ ਸਬ੍ਬਿਮ੍ਪਿ। ਥਿਨਨ੍ਤਿ ਘਨਭਾવੇਨ ਤਿਟ੍ਠਤੀਤਿ ਥਿਨਂ, ਘਨਨ੍ਤਿ વੁਤ੍ਤਂ ਹੋਤਿ। વੁਤ੍ਤਪਰਿਚ੍ਛੇਦਤੋਤਿ ‘‘ਦਸ ਭਿਕ੍ਖੂ, ਦਸੇવ ਚ ਸਬ੍ਬਿਕੁਮ੍ਭਾ’’ਤਿ વੁਤ੍ਤਪਰਿਚ੍ਛੇਦਤੋ।
Yathāṭhitaṃyevāti kiñci abhājetvā yathāṭhitaṃyeva. ‘‘Duggahita’’nti vatvā tadatthaṃ dassento āha ‘‘taṃ gatagataṭṭhāne saṅghikameva hotī’’ti. Āvajjetvāti pariṇāmetvā. Tampīti thālake pakkhittaṃ sabbimpi. Thinanti ghanabhāvena tiṭṭhatīti thinaṃ, ghananti vuttaṃ hoti. Vuttaparicchedatoti ‘‘dasa bhikkhū, daseva ca sabbikumbhā’’ti vuttaparicchedato.
ਗਾਥਾਯਂ ਪਾਲ਼ਿਨ੍ਤਿ વਿਨਯਪਾਲ਼ਿਂ। ਅਟ੍ਠਕਥਞ੍ਚੇવਾਤਿ ਤਸ੍ਸਾ ਅਟ੍ਠਕਥਞ੍ਚੇવ। વਿਚਕ੍ਖਣੋਤਿ વਿવਿਧਂ ਅਤ੍ਥਂ ਚਕ੍ਖਤਿ ਪਸ੍ਸਤੀਤਿ વਿਚਕ੍ਖਣੋ। ਏવਨ੍ਤਿ ਯਥਾવੁਤ੍ਤਨਯੇਨ। ਤਤ੍ਰਾਯਂ ਯੋਜਨਾ – ਏવਂ વਿਚਕ੍ਖਣੋ ਭਿਕ੍ਖੁ ਪਾਲ਼ਿਂ, ਅਟ੍ਠਕਥਞ੍ਚੇવ ਓਲੋਕੇਤ੍વਾ ਅਪ੍ਪਮਤ੍ਤੋવ ਹੁਤ੍વਾ ਸਙ੍ਘਿਕੇ ਪਚ੍ਚਯੇ ਭਾਜਯੇਤਿ।
Gāthāyaṃ pāḷinti vinayapāḷiṃ. Aṭṭhakathañcevāti tassā aṭṭhakathañceva. Vicakkhaṇoti vividhaṃ atthaṃ cakkhati passatīti vicakkhaṇo. Evanti yathāvuttanayena. Tatrāyaṃ yojanā – evaṃ vicakkhaṇo bhikkhu pāḷiṃ, aṭṭhakathañceva oloketvā appamattova hutvā saṅghike paccaye bhājayeti.
ਇਤਿ ਪਚ੍ਚਯਭਾਜਨੀਯਕਥਾਯ ਯੋਜਨਾ ਸਮਤ੍ਤਾ।
Iti paccayabhājanīyakathāya yojanā samattā.
ਉਪਡ੍ਢਭਾਗੋਤਿ ਭਿਕ੍ਖੂਨਂ ਲਦ੍ਧਭਾਗਤੋ ਉਪਡ੍ਢੋ ਭਾਗੋ। ਸੇਸਂ ਸੁવਿਞ੍ਞੇਯ੍ਯਮੇવ।
Upaḍḍhabhāgoti bhikkhūnaṃ laddhabhāgato upaḍḍho bhāgo. Sesaṃ suviññeyyameva.
ਇਤਿ ਸੇਨਾਸਨਕ੍ਖਨ੍ਧਕવਣ੍ਣਨਾਯ ਯੋਜਨਾ ਸਮਤ੍ਤਾ।
Iti senāsanakkhandhakavaṇṇanāya yojanā samattā.
