| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಪಕ್ಖಿಕಭತ್ತಾದಿಕಥಾ
Pakkhikabhattādikathā
ಯನ್ತಿ ಭತ್ತಂ ದಿಯ್ಯತೀತಿ ಸಮ್ಬನ್ಧೋ। ಚಾತುದ್ದಸೀಪಞ್ಚದ್ದಸೀಪಞ್ಚಮೀಅಟ್ಠಮೀತಿ ಅಭಿಲಕ್ಖಿತೇಸೂತಿ ಯೋಜನಾ। ಕಮ್ಮಪ್ಪಸುತೇಹೀತಿ ಕಮ್ಮೂಪಚಯೇಹಿ। ಇಮೇಹಿ ಪಾಠೇಹಿ ಪಕ್ಖೇಸು ದಾತಬ್ಬಂ ಪಕ್ಖಿಕನ್ತಿ ವಚನತ್ಥಂ ದಸ್ಸೇತಿ। ತನ್ತಿ ಪಕ್ಖಿಕಭತ್ತಂ। ‘‘ಹೋತೀ’’ತಿ ಪದೇ ವುತ್ತಕತ್ತಾ, ‘‘ಗಾಹೇತ್ವಾ’’ತಿ ಪದೇ ಧಾತುಕಮ್ಮಂ, ‘‘ಭುಞ್ಜಿತಬ್ಬ’’ನ್ತಿ ಪದೇ ವುತ್ತಕಮ್ಮಂ। ಸಬ್ಬೇಸನ್ತಿ ಭಿಕ್ಖೂನಂ। ಯೇಸನ್ತಿ ಭಿಕ್ಖೂನಂ। ಮನ್ದಾತಿ ಅಪ್ಪಾ। ತನ್ತಿ ಸಲಾಕಭತ್ತಂ। ಪಣೀತಂ ದೇನ್ತೀತಿ ಪಣೀತಂ ಕತ್ವಾ ದೇನ್ತಿ। ಲೂಖಭತ್ತನ್ತಿ ಅಸಿನಿದ್ಧಭತ್ತಂ।
Yanti bhattaṃ diyyatīti sambandho. Cātuddasīpañcaddasīpañcamīaṭṭhamīti abhilakkhitesūti yojanā. Kammappasutehīti kammūpacayehi. Imehi pāṭhehi pakkhesu dātabbaṃ pakkhikanti vacanatthaṃ dasseti. Tanti pakkhikabhattaṃ. ‘‘Hotī’’ti pade vuttakattā, ‘‘gāhetvā’’ti pade dhātukammaṃ, ‘‘bhuñjitabba’’nti pade vuttakammaṃ. Sabbesanti bhikkhūnaṃ. Yesanti bhikkhūnaṃ. Mandāti appā. Tanti salākabhattaṃ. Paṇītaṃ dentīti paṇītaṃ katvā denti. Lūkhabhattanti asiniddhabhattaṃ.
ಯಂ ಭತ್ತಂ ಅತ್ತನಾ ಭುಞ್ಜತಿ, ತದೇವ ದಿಯ್ಯತೀತಿ ಯೋಜನಾ। ಇಮಿನಾ ಉಪೋಸಥೇ ದಾತಬ್ಬಂ ಉಪೋಸಥಿಕನ್ತಿ ವಚನತ್ಥಂ ದಸ್ಸೇತಿ। ಉಪೋಸಥೇತಿ ಉಪೋಸಥದಿವಸೇ। ಏತ್ಥ ಚ ಪಞ್ಚದ್ದಸಿಯಂ ಸಚೇ ದಾಯಕಾ ‘‘ಪಕ್ಖಿಕ’’ನ್ತಿ ವತ್ವಾ ದೇನ್ತಿ, ಪಕ್ಖಿಕಂ ನಾಮ। ಅಥ ‘‘ಉಪೋಸಥಿಕ’’ನ್ತಿ ವತ್ವಾ ದೇನ್ತಿ, ಉಪೋಸಥಿಕಂ ನಾಮಾತಿ ವಿಸೇಸೋ। ಪಾಟಿಪದೇತಿ ಪಾಟಿಪದದಿವಸೇ। ಉಪೋಸಥಕಮ್ಮೇನಾತಿ ಉಪೋಸಥಕಮ್ಮೇನ ಹೇತುಭೂತೇನ। ‘‘ಪಾಟಿಪದೇ ದಿಯ್ಯನಕದಾನ’’ನ್ತಿ ಇಮಿನಾ ಪಾಟಿಪದೇ ದಾತಬ್ಬಂ ಪಾಟಿಪದಿಕನ್ತಿ ವಚನತ್ಥಂ ದಸ್ಸೇತಿ। ತಮ್ಪಿ ಉಭಯನ್ತಿ ಉಪೋಸಥಿಕಪಾಟಿಪದಿಕವಸೇನ ಉಭಯಮ್ಪಿ ತಂ ಭತ್ತಂ। ಇತಿ ಇಮಾನೀತಿ ಏತ್ಥ ಇಮಸದ್ದೇನ ಇತಿಸದ್ದಸ್ಸ ಇಮಸದ್ದತ್ಥಭಾವೋ ದಸ್ಸಿತೋ ಹೋತಿ। ಸತ್ತಪಿ ಭತ್ತಾನೀತಿ ಇಮಸ್ಮಿಂ ಸೇನಾಸನಕ್ಖನ್ಧಕೇ ಆಗತಾನಿ ಸಙ್ಘಭತ್ತಾದೀನಿ ಸತ್ತಪಿ ಭತ್ತಾನಿ।
Yaṃ bhattaṃ attanā bhuñjati, tadeva diyyatīti yojanā. Iminā uposathe dātabbaṃ uposathikanti vacanatthaṃ dasseti. Uposatheti uposathadivase. Ettha ca pañcaddasiyaṃ sace dāyakā ‘‘pakkhika’’nti vatvā denti, pakkhikaṃ nāma. Atha ‘‘uposathika’’nti vatvā denti, uposathikaṃ nāmāti viseso. Pāṭipadeti pāṭipadadivase. Uposathakammenāti uposathakammena hetubhūtena. ‘‘Pāṭipade diyyanakadāna’’nti iminā pāṭipade dātabbaṃ pāṭipadikanti vacanatthaṃ dasseti. Tampi ubhayanti uposathikapāṭipadikavasena ubhayampi taṃ bhattaṃ. Iti imānīti ettha imasaddena itisaddassa imasaddatthabhāvo dassito hoti. Sattapi bhattānīti imasmiṃ senāsanakkhandhake āgatāni saṅghabhattādīni sattapi bhattāni.
ಅಪರಾನಿಪಿ ಚತ್ತಾರಿ ಭತ್ತಾನೀತಿ ಸಮ್ಬನ್ಧೋ। ತತ್ಥಾತಿ ಚತೂಸು ಭತ್ತೇಸು। ‘‘ಆಗನ್ತುಕಾನಂ ದಿನ್ನ’’ನ್ತಿಆದಿನಾ ಆಗನ್ತುಕಭತ್ತನ್ತಿ ಪದಸ್ಸ ಚತುತ್ಥೀಮಜ್ಝೇಲೋಪಸಮಾಸಂ ದಸ್ಸೇತಿ। ಅಞ್ಞತ್ಥ ಪನ ‘‘ಆಗನ್ತುಕಸ್ಸ ಅತ್ಥಾಯ ಆಭತ’’ನ್ತಿಆದಿನಾ ಛಟ್ಠೀಮಜ್ಝೇಲೋಪಸಮಾಸಂ ದಸ್ಸೇತಿ। ಏತ್ಥಾತಿ ಚತೂಸು ಭತ್ತೇಸು। ಸಬ್ಬೇಸನ್ತಿ ಭಿಕ್ಖೂನಂ। ಏಕೋ ಆಗನ್ತುಕೋ ನಿಸೀದತೀತಿ ಸಮ್ಬನ್ಧೋ। ತೇನಾತಿ ಪಠಮಆಗನ್ತುಕೇನ।
Aparānipi cattāri bhattānīti sambandho. Tatthāti catūsu bhattesu. ‘‘Āgantukānaṃ dinna’’ntiādinā āgantukabhattanti padassa catutthīmajjhelopasamāsaṃ dasseti. Aññattha pana ‘‘āgantukassa atthāya ābhata’’ntiādinā chaṭṭhīmajjhelopasamāsaṃ dasseti. Etthāti catūsu bhattesu. Sabbesanti bhikkhūnaṃ. Eko āgantuko nisīdatīti sambandho. Tenāti paṭhamaāgantukena.
ಯೋತಿ ಆಗನ್ತುಕೋ। ಆಗನ್ತ್ವಾಪೀತಿ ಪಿಸದ್ದೋ ಗರಹತ್ಥೋ, ಪಚ್ಛಾ ಪನ ಪಗೇವಾತಿ ಅತ್ಥೋ। ತೇನ ಗಣ್ಹಿತಬ್ಬನ್ತಿ ಯೋಜನಾ। ‘‘ಆಗತದಿವಸೇಯೇವಾ’’ತಿ ಇಮಿನಾ ನ ದುತಿಯದಿವಸಾದೀಸು ಭುಞ್ಜಿತಬ್ಬನ್ತಿ ದಸ್ಸೇತಿ।
Yoti āgantuko. Āgantvāpīti pisaddo garahattho, pacchā pana pagevāti attho. Tena gaṇhitabbanti yojanā. ‘‘Āgatadivaseyevā’’ti iminā na dutiyadivasādīsu bhuñjitabbanti dasseti.
ಕತ್ಥಚೀತಿ ಕಿಞ್ಚಿ ಠಾನಂ। ತನ್ತಿ ಆಗನ್ತುಕಭತ್ತಂ। ನಿಬನ್ಧಾಪಿತನ್ತಿ ನಿಚ್ಚಂ ಠಪಿತಂ। ಅಸನಸಾಲಾಯನ್ತಿ ಅನ್ತೋಗಾಮೇ ಅಸನಸಾಲಾಯಂ। ಅಸತೀತಿ ಅಸನ್ತೇಸು।
Katthacīti kiñci ṭhānaṃ. Tanti āgantukabhattaṃ. Nibandhāpitanti niccaṃ ṭhapitaṃ. Asanasālāyanti antogāme asanasālāyaṃ. Asatīti asantesu.
ಆವಾಸಿಕೋಪೀತಿ ಪಿಸದ್ದೋ ನ ಗಮಿಕೋಯೇವಾತಿ ದಸ್ಸೇತಿ। ಯಥಾ ಆಗನ್ತುಕಭತ್ತಂ ದ್ವೇ ವಾ ತೀಣಿ ವಾ ಸತ್ತ ವಾ ದಿವಸಾನಿ ಲಬ್ಭತಿ, ಏವಂ ಇದಂ ಗಮಿಯಭತ್ತಂ ನ ಲಬ್ಭತೀತಿ ಯೋಜನಾ। ಪನ್ಥನ್ತಿ ಮಗ್ಗಂ। ರುನ್ಧನ್ತೀತಿ ಪಿದಹನ್ತಿ। ಉದಕಂ ವಾ ರುನ್ಧತೀತಿ ಸಮ್ಬನ್ಧೋ। ಏತೇ ಉಪದ್ದವೇತಿ ಚೋರಾದಯೋ ಏತೇ ಉಪದ್ದವೇ। ಓಡ್ಡೇತ್ವಾತಿ ಠಪೇತ್ವಾ।
Āvāsikopīti pisaddo na gamikoyevāti dasseti. Yathā āgantukabhattaṃ dve vā tīṇi vā satta vā divasāni labbhati, evaṃ idaṃ gamiyabhattaṃ na labbhatīti yojanā. Panthanti maggaṃ. Rundhantīti pidahanti. Udakaṃ vā rundhatīti sambandho. Ete upaddaveti corādayo ete upaddave. Oḍḍetvāti ṭhapetvā.
ಏತಸ್ಸಾತಿ ಮಹಾಗಿಲಾನಸ್ಸ। ಪುನ ಏತಸ್ಸಾತಿ ಅನಾಗತಸ್ಸ ಮಹಾಗಿಲಾನಸ್ಸ। ಸಪ್ಪಾಯಭೋಜನನ್ತಿ ಗಿಲಾನಾನಂ ಸಪ್ಪಾಯಭೋಜನಂ। ಮಿಸ್ಸಕಯಾಗುನ್ತಿ ನಾನಾತಣ್ಡುಲೇ ಮಿಸ್ಸೇತ್ವಾ ಪಚಿತಂ ಯಾಗುಂ। ನ ಕುಪ್ಪತೀತಿ ನ ವಿಕಾರಂ ಕರೋತಿ।
Etassāti mahāgilānassa. Puna etassāti anāgatassa mahāgilānassa. Sappāyabhojananti gilānānaṃ sappāyabhojanaṃ. Missakayāgunti nānātaṇḍule missetvā pacitaṃ yāguṃ. Na kuppatīti na vikāraṃ karoti.
ಇದಮ್ಪೀತಿ ಗಿಲಾನುಪಟ್ಠಾಕಭತ್ತಮ್ಪಿ। ತತ್ಥಾತಿ ತಸ್ಮಿಂ ಕುಲೇ। ಅಸ್ಸಾತಿ ಗಿಲಾನಸ್ಸ। ಏವಂ ದಿನ್ನಾನೀತಿ ಏವಂ ವಕ್ಖಮಾನನಯೇನ ದಿನ್ನಾನಿ ಹೋನ್ತಿ। ಪಿಣ್ಡಪಾತಿಕಾನಮ್ಪಿ ವಟ್ಟತೀತಿ ‘‘ಭಿಕ್ಖ’’ನ್ತಿ ಕಪ್ಪಿಯವೋಹಾರೇನ ವುತ್ತತ್ತಾ ಪಿಣ್ಡಪಾತಿಕಾನಮ್ಪಿ ವಟ್ಟತಿ। ನ ವಟ್ಟತೀತಿ ‘‘ಭತ್ತ’’ನ್ತಿ ಅಕಪ್ಪಿಯವೋಹಾರೇನ ವುತ್ತತ್ತಾ ನ ವಟ್ಟತಿ।
Idampīti gilānupaṭṭhākabhattampi. Tatthāti tasmiṃ kule. Assāti gilānassa. Evaṃ dinnānīti evaṃ vakkhamānanayena dinnāni honti. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Na vaṭṭatīti ‘‘bhatta’’nti akappiyavohārena vuttattā na vaṭṭati.
ಅಪರಾನಿಪಿ ತೀಣಿ ಭತ್ತಾನೀತಿ ಸಮ್ಬನ್ಧೋ। ತತ್ಥಾತಿ ತೀಸು ಭತ್ತೇಸು। ಧುರಭತ್ತನ್ತಿ ಏತ್ಥ ಧುರಸದ್ದಸ್ಸ ಧುವಸದ್ದೇನ ಅತ್ಥತೋ ಸದಿಸತ್ತಾ ನಿಚ್ಚತ್ಥೋತಿ ಆಹ ‘‘ನಿಚ್ಚಭತ್ತಂ ವುಚ್ಚತೀ’’ತಿ। ತನ್ತಿ ಧುರಭತ್ತಂ। ತತ್ಥಾತಿ ದುವಿಧೇಸು। ‘‘ಸಙ್ಘಿಕೇ’’ತಿ ಪಾಠಸೇಸೋ ಯೋಜೇತಬ್ಬೋ। ಪುಗ್ಗಲಿಕೇಪೀತಿ ಪಿಸದ್ದೋ ‘‘ಸಙ್ಘಿಕೇ’’ತಿ ಪದಂ ಅಪೇಕ್ಖತಿ। ಪಚ್ಛಾತಿ ಪಠಮಂ ‘‘ಭಿಕ್ಖಂ ಗಣ್ಹಥಾ’’ತಿ ವುತ್ತವಚನತೋ, ವುತ್ತವಚನಸ್ಸ ವಾ ಪರಂ।
Aparānipi tīṇi bhattānīti sambandho. Tatthāti tīsu bhattesu. Dhurabhattanti ettha dhurasaddassa dhuvasaddena atthato sadisattā niccatthoti āha ‘‘niccabhattaṃ vuccatī’’ti. Tanti dhurabhattaṃ. Tatthāti duvidhesu. ‘‘Saṅghike’’ti pāṭhaseso yojetabbo. Puggalikepīti pisaddo ‘‘saṅghike’’ti padaṃ apekkhati. Pacchāti paṭhamaṃ ‘‘bhikkhaṃ gaṇhathā’’ti vuttavacanato, vuttavacanassa vā paraṃ.
ಕುಟಿಂ ಕತ್ವಾ ದಾತಬ್ಬಂ ಭತ್ತಂ ಕುಟಿಭತ್ತನ್ತಿ ದಸ್ಸೇನ್ತೋ ಆಹ ‘‘ಕುಟಿಭತ್ತಂ ನಾಮಾ’’ತಿಆದಿ। ಯನ್ತಿ ಭತ್ತಂ, ನಿಬನ್ಧಾಪಿತನ್ತಿ ಸಮ್ಬನ್ಧೋ, ಸೇನಾಸನವಾಸಿನೋ ಭಿಕ್ಖೂತಿ ಸಮ್ಬನ್ಧೋ। ಯಂ ಪನಾತಿ ಭತ್ತಂ ಪನ, ದಿನ್ನನ್ತಿ ಸಮ್ಬನ್ಧೋ। ತಸ್ಸೇವಾತಿ ಪುಗ್ಗಲಸ್ಸೇವ। ತಸ್ಮಿನ್ತಿ ಪುಗ್ಗಲೇ।
Kuṭiṃ katvā dātabbaṃ bhattaṃ kuṭibhattanti dassento āha ‘‘kuṭibhattaṃ nāmā’’tiādi. Yanti bhattaṃ, nibandhāpitanti sambandho, senāsanavāsino bhikkhūti sambandho. Yaṃ panāti bhattaṃ pana, dinnanti sambandho. Tassevāti puggalasseva. Tasminti puggale.
ವಾರೇನ , ವಾರಂ ಗಹೇತ್ವಾ ವಾ ದಿನ್ನಂ ಭತ್ತಂ ವಾರಭತ್ತನ್ತಿ ದಸ್ಸೇನ್ತೋ ಆಹ ‘‘ವಾರಭತ್ತಂ ನಾಮಾ’’ತಿಆದಿ। ತಮ್ಪೀತಿ ವಾರಭತ್ತಮ್ಪಿ। ನಿಗಮನವಸೇನ ಸಮ್ಪಿಣ್ಡೇತ್ವಾ ದಸ್ಸೇನ್ತೋ ಆಹ ‘‘ಇತಿ ಇಮಾನಿ ಚಾ’’ತಿಆದಿ।
Vārena , vāraṃ gahetvā vā dinnaṃ bhattaṃ vārabhattanti dassento āha ‘‘vārabhattaṃ nāmā’’tiādi. Tampīti vārabhattampi. Nigamanavasena sampiṇḍetvā dassento āha ‘‘iti imāni cā’’tiādi.
ಅಟ್ಠಕಥಾಯನ್ತಿ ಮಹಾಅಟ್ಠಕಥಾಯಂ, ವುತ್ತಾನೀತಿ ಸಮ್ಬನ್ಧೋ। ತತ್ಥಾತಿ ಚತೂಸು ಭತ್ತೇಸು। ವಿಹಾರೇ ಉಪ್ಪನ್ನಂ ಭತ್ತಂ ವಿಹಾರಭತ್ತನ್ತಿ ದಸ್ಸೇನ್ತೋ ಆಹ ‘‘ವಿಹಾರಭತ್ತಂ ನಾಮಾ’’ತಿಆದಿ। ತತ್ರುಪ್ಪಾದಭತ್ತನ್ತಿ ತಸ್ಮಿಂ ವಿಹಾರೇ ದಿನ್ನಖೇತ್ತವತ್ಥುಆದೀಹಿ ಉಪ್ಪಾದಭತ್ತಂ। ತನ್ತಿ ವಿಹಾರಭತ್ತಂ। ಯಥಾತಿ ಯೇನಾಕಾರೇನ, ಪಟಿಗ್ಗಹಿಯಮಾನೇತಿ ಸಮ್ಬನ್ಧೋ। ಅಟ್ಠನ್ನಂ ಸಮೂಹೋ, ಅಟ್ಠ ಪರಿಮಾಣಾನಿ ಯಸ್ಸಾತಿ ವಾ ಅಟ್ಠಕೋ, ತಸ್ಸ ದಿನ್ನಂ ಭತ್ತಂ ಅಟ್ಠಕಭತ್ತಂ। ಏವಂ ಚತುಕ್ಕಭತ್ತನ್ತಿ ಏತ್ಥಾಪಿ। ತಮೇವತ್ಥಂ ದಸ್ಸೇನ್ತೋ ಆಹ ‘‘ಅಟ್ಠನ್ನಂ ಭಿಕ್ಖೂನಂ ದೇಮಾ’’ತಿಆದಿ। ಮಹಾಭಿಸಙ್ಖಾರಿಕೇನಾತಿ ಸಬ್ಬಿನೋನೀತಾದೀಹಿ ಮಹನ್ತೋ ಅಭಿಸಙ್ಖಾರೋ ಮಹಾಭಿಸಙ್ಖಾರೋ, ಸೋ ಏತಸ್ಸ ಅತ್ಥೀತಿ ಮಹಾಭಿಸಙ್ಖಾರಿಕೋ, ತೇನ ಅತಿರಸಕಪೂವೇನ ಪತ್ತೇ ಪಕ್ಖಿಪಿತ್ವಾತಿ ಸಮ್ಬನ್ಧೋ। ‘‘ಥಕೇತ್ವಾ ದಿನ್ನ’’ನ್ತಿ ಇಮಿನಾ ಗೂಹಿತ್ವಾ ದಾತಬ್ಬಂ ಗುಳ್ಹಕಂ, ತಮೇವ ಭತ್ತಂ ಗುಳ್ಹಕಭತ್ತನ್ತಿ ವಚನತ್ಥಂ ದಸ್ಸೇತಿ।
Aṭṭhakathāyanti mahāaṭṭhakathāyaṃ, vuttānīti sambandho. Tatthāti catūsu bhattesu. Vihāre uppannaṃ bhattaṃ vihārabhattanti dassento āha ‘‘vihārabhattaṃ nāmā’’tiādi. Tatruppādabhattanti tasmiṃ vihāre dinnakhettavatthuādīhi uppādabhattaṃ. Tanti vihārabhattaṃ. Yathāti yenākārena, paṭiggahiyamāneti sambandho. Aṭṭhannaṃ samūho, aṭṭha parimāṇāni yassāti vā aṭṭhako, tassa dinnaṃ bhattaṃ aṭṭhakabhattaṃ. Evaṃ catukkabhattanti etthāpi. Tamevatthaṃ dassento āha ‘‘aṭṭhannaṃ bhikkhūnaṃ demā’’tiādi. Mahābhisaṅkhārikenāti sabbinonītādīhi mahanto abhisaṅkhāro mahābhisaṅkhāro, so etassa atthīti mahābhisaṅkhāriko, tena atirasakapūvena patte pakkhipitvāti sambandho. ‘‘Thaketvā dinna’’nti iminā gūhitvā dātabbaṃ guḷhakaṃ, tameva bhattaṃ guḷhakabhattanti vacanatthaṃ dasseti.
ಇಧಾತಿ ಇಮಸ್ಮಿಂ ಲೋಕೇ। ಏಕಚ್ಚೇ ಮನುಸ್ಸಾ ದೇನ್ತೀತಿ ಸಮ್ಬನ್ಧೋ। ‘‘ಭಿಕ್ಖುಪರಿಚ್ಛೇದಜಾನನತ್ಥಂ ಗುಳಕೇ ದೇನ್ತೀ’’ತಿ ಇಮಿನಾ ಗುಳಕೇನ ಭಿಕ್ಖೂ ಗಣೇತ್ವಾ ದಾತಬ್ಬಂ ಭತ್ತಂ ಗುಳಕಭತ್ತನ್ತಿ ವಚನತ್ಥಂ ದಸ್ಸೇತಿ। ಏತ್ಥ ಚ ಪುರಿಮನಯೇ ಳಕಾರೇ ಹಕಾರಸಂಯೋಗೋ ಅತ್ಥಿ, ಪಚ್ಛಿಮನಯೇ ನತ್ಥೀತಿ ದಟ್ಠಬ್ಬಂ। ಗುಳಪಿಣ್ಡಗಣನಾಯ ಭಿಕ್ಖುಗಣನಂ ಜಾನಾತಿ। ಇತೀತಿಆದಿ ನಿಗಮನಂ। ಚೀವರಭಾಜನೀಯಂ ವುತ್ತನ್ತಿ ಸಮ್ಬನ್ಧೋ।
Idhāti imasmiṃ loke. Ekacce manussā dentīti sambandho. ‘‘Bhikkhuparicchedajānanatthaṃ guḷake dentī’’ti iminā guḷakena bhikkhū gaṇetvā dātabbaṃ bhattaṃ guḷakabhattanti vacanatthaṃ dasseti. Ettha ca purimanaye ḷakāre hakārasaṃyogo atthi, pacchimanaye natthīti daṭṭhabbaṃ. Guḷapiṇḍagaṇanāya bhikkhugaṇanaṃ jānāti. Itītiādi nigamanaṃ. Cīvarabhājanīyaṃ vuttanti sambandho.
ಸಬ್ಬಿಆದೀಸು ಭೇಸಜ್ಜೇಸೂತಿ ನಿದ್ಧಾರಣೇ ಭುಮ್ಮಂ, ‘‘ಸಬ್ಬಿಸ್ಸಾ’’ತಿ ಪದಂ ‘‘ಕುಮ್ಭಸತಮ್ಪೀ’’ತಿ ಪದೇ ನಿಸ್ಸಿತಸಮ್ಬನ್ಧೋ।
Sabbiādīsu bhesajjesūti niddhāraṇe bhummaṃ, ‘‘sabbissā’’ti padaṃ ‘‘kumbhasatampī’’ti pade nissitasambandho.
ಪಚ್ಛಾ ಆಗತಾನಂ ದಾತಬ್ಬಮೇವಾತಿ ದುತಿಯಭಾಗೇ ಅದಾತಬ್ಬೇಯೇವ ಪಚ್ಛಾ ಆಗತಾನಂ ದಾತಬ್ಬಮೇವ। ಸಬ್ಬಸನ್ನಿಪಾತಟ್ಠಾನೇಯೇವಾತಿ ಸಬ್ಬೇಸಂ ಭಿಕ್ಖೂನಂ ಸನ್ನಿಪಾತಟ್ಠಾನೇವ। ಭಾಜನೀಯಭಣ್ಡಂ ನಾಮ ಭಾಜನಟ್ಠಾನಂ ಸಮ್ಪತ್ತಸ್ಸೇವ ಪಾಪುಣಾತಿ, ನ ಅಸಮ್ಪತ್ತಸ್ಸ। ಸಬ್ಬಸನ್ನಿಪಾತಟ್ಠಾನೇ ಚ ಯೇಭುಯ್ಯೇನ ಸಮ್ಪತ್ತೋ ಹೋತಿ, ತೇನ ವುತ್ತಂ ‘‘ಸಬ್ಬಸನ್ನಿಪಾತಟ್ಠಾನೇಯೇವಾ’’ತಿ।
Pacchāāgatānaṃ dātabbamevāti dutiyabhāge adātabbeyeva pacchā āgatānaṃ dātabbameva. Sabbasannipātaṭṭhāneyevāti sabbesaṃ bhikkhūnaṃ sannipātaṭṭhāneva. Bhājanīyabhaṇḍaṃ nāma bhājanaṭṭhānaṃ sampattasseva pāpuṇāti, na asampattassa. Sabbasannipātaṭṭhāne ca yebhuyyena sampatto hoti, tena vuttaṃ ‘‘sabbasannipātaṭṭhāneyevā’’ti.
ಯಥಾಠಿತಂಯೇವಾತಿ ಕಿಞ್ಚಿ ಅಭಾಜೇತ್ವಾ ಯಥಾಠಿತಂಯೇವ। ‘‘ದುಗ್ಗಹಿತ’’ನ್ತಿ ವತ್ವಾ ತದತ್ಥಂ ದಸ್ಸೇನ್ತೋ ಆಹ ‘‘ತಂ ಗತಗತಟ್ಠಾನೇ ಸಙ್ಘಿಕಮೇವ ಹೋತೀ’’ತಿ। ಆವಜ್ಜೇತ್ವಾತಿ ಪರಿಣಾಮೇತ್ವಾ। ತಮ್ಪೀತಿ ಥಾಲಕೇ ಪಕ್ಖಿತ್ತಂ ಸಬ್ಬಿಮ್ಪಿ। ಥಿನನ್ತಿ ಘನಭಾವೇನ ತಿಟ್ಠತೀತಿ ಥಿನಂ, ಘನನ್ತಿ ವುತ್ತಂ ಹೋತಿ। ವುತ್ತಪರಿಚ್ಛೇದತೋತಿ ‘‘ದಸ ಭಿಕ್ಖೂ, ದಸೇವ ಚ ಸಬ್ಬಿಕುಮ್ಭಾ’’ತಿ ವುತ್ತಪರಿಚ್ಛೇದತೋ।
Yathāṭhitaṃyevāti kiñci abhājetvā yathāṭhitaṃyeva. ‘‘Duggahita’’nti vatvā tadatthaṃ dassento āha ‘‘taṃ gatagataṭṭhāne saṅghikameva hotī’’ti. Āvajjetvāti pariṇāmetvā. Tampīti thālake pakkhittaṃ sabbimpi. Thinanti ghanabhāvena tiṭṭhatīti thinaṃ, ghananti vuttaṃ hoti. Vuttaparicchedatoti ‘‘dasa bhikkhū, daseva ca sabbikumbhā’’ti vuttaparicchedato.
ಗಾಥಾಯಂ ಪಾಳಿನ್ತಿ ವಿನಯಪಾಳಿಂ। ಅಟ್ಠಕಥಞ್ಚೇವಾತಿ ತಸ್ಸಾ ಅಟ್ಠಕಥಞ್ಚೇವ। ವಿಚಕ್ಖಣೋತಿ ವಿವಿಧಂ ಅತ್ಥಂ ಚಕ್ಖತಿ ಪಸ್ಸತೀತಿ ವಿಚಕ್ಖಣೋ। ಏವನ್ತಿ ಯಥಾವುತ್ತನಯೇನ। ತತ್ರಾಯಂ ಯೋಜನಾ – ಏವಂ ವಿಚಕ್ಖಣೋ ಭಿಕ್ಖು ಪಾಳಿಂ, ಅಟ್ಠಕಥಞ್ಚೇವ ಓಲೋಕೇತ್ವಾ ಅಪ್ಪಮತ್ತೋವ ಹುತ್ವಾ ಸಙ್ಘಿಕೇ ಪಚ್ಚಯೇ ಭಾಜಯೇತಿ।
Gāthāyaṃ pāḷinti vinayapāḷiṃ. Aṭṭhakathañcevāti tassā aṭṭhakathañceva. Vicakkhaṇoti vividhaṃ atthaṃ cakkhati passatīti vicakkhaṇo. Evanti yathāvuttanayena. Tatrāyaṃ yojanā – evaṃ vicakkhaṇo bhikkhu pāḷiṃ, aṭṭhakathañceva oloketvā appamattova hutvā saṅghike paccaye bhājayeti.
ಇತಿ ಪಚ್ಚಯಭಾಜನೀಯಕಥಾಯ ಯೋಜನಾ ಸಮತ್ತಾ।
Iti paccayabhājanīyakathāya yojanā samattā.
ಉಪಡ್ಢಭಾಗೋತಿ ಭಿಕ್ಖೂನಂ ಲದ್ಧಭಾಗತೋ ಉಪಡ್ಢೋ ಭಾಗೋ। ಸೇಸಂ ಸುವಿಞ್ಞೇಯ್ಯಮೇವ।
Upaḍḍhabhāgoti bhikkhūnaṃ laddhabhāgato upaḍḍho bhāgo. Sesaṃ suviññeyyameva.
ಇತಿ ಸೇನಾಸನಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ।
Iti senāsanakkhandhakavaṇṇanāya yojanā samattā.
